Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺INt derde iaer van Cyrus den coninck van Persen, is dwoert gheopenbaert Daniel ghenoemt Baltassar, eude het was een warachtich woert, ende een groote stercheyt, ende hy heeft die reden verstaen, want het verstant is van noode int visioen.

+ A

2

In die daghen was ick Daniel rouwich, de daghen van drij weken,

3

gheen lustich broot en heb ick gheten, ende vleesch ende wijn en sijn in mijnen mont niet ghegaen, ende ick en ben oock niet ghesalft gheweest met olien, tot dat voleynt waren die daghen van drij weken.

4

Maer op den vierentwintichsten dach der ierster maent, was ic by den grooten vloet welck is Tigris.

5

Ende ic heb mijn ooghen opghehauen ende ghesien, ende siet daer was een man met lijnen ghecleedt ende sijnen lendenen waren omgort met dat fijnste gout,

6

ende zijn lichaem was als eenen Chrysolitus steen, ⁺ende sijn aensicht was als die ghedaente des blixems, ende zijn ooghen als een berrende lampe, ende sijn armen ende die leden die nederwaerts sijn totten voeten toe, zijn als die ghedaente van blinckende metael, ende die stemme van sijnen woerden is als een stemme der menichten.

+ B

7

Ende ic Daniel heb alleen het visioen ghesien, maer die mannen die met my waren en hebbens niet ghesien, maer een wtermaten groote veruaertheyt ouerviel henlieden, ende sij liepen in een verborghen plaetse,

8

ende ic alleen verlaten sijnde heb dit groot visioen ghesien, ende in my en is gheen stercheyt ghebleuen, maer mijn ghedaente is in my oock verandert gheweest, ende ick ben onmachtich geworden, ende ic en hadde gheen macht,

9

Ende ick hebbe die stemme van sijnen woerden ghehoort, ende hoorende lach ick heel verslaghen op mijn aensicht, ende mijn aensicht cleefde vast aen deerde.

10

⁺Ende siet een handt heeft my gheraect ende heeft my opghericht op mijn knyen, ende op die vingheren van mijnen handen.

+ C

11

Ende hy heeft tot my gheseyt, Daniel man der begeerten, verstaet die woerden die ic tot v spreke, ende staet in uwen graet, want ic ben nu ghesonden tot v. Ende doen hy my dit woert gheseyt hadde, soo heb ic beuende ghestaen.

12

Ende hi heeft tot my gheseyt. En wilt niet vreesen Daniel. Want vanden iersten dach dat ghi v herte ghestelt hebt om te verstaen, dat ghy v pijninghen soudt voer ws Godts aensicht, soo zijn v woerden verhoort, ende ic ben ghecomen om uwe woerden.

13

Maer die prince van der Persen rijck heeft my wederstaen eenentwintich daghen, ende siet Michael een vanden iersten Princen, is ghecomen tot mijnder helpen, ende ick ben daer ghebleuen by den coninck van Persen.

14

⁺Ende ick ben ghecomen dat ick v leeren soude die dinghen die uwen volcke toecomende sijn in die wterste daghen, want dat visioen duert noch tot veel daghen.

+ D

15

Ende doen hy my sprack met aldusdanighe woerden, soo heb ick mijn aensicht ter eerden nedergheworpen, ende ick heb ghesweghen.

16

Ende siet als een ghelijckenisse van des menschen sone heeft mijn lippen gheraect, ende mijnen mont opendoende heb ic gesproken, ende ic heb gheseyt totten ghenen die teghen my stont, Mijn Heere in v ghesicht sijn mijn voechselen der leden ontbonden, ende in my en is gheen cracht ghebleuen.

17

Ende hoe sal mijns Heeren knecht moghen spreken met mijnen Heere? daer en is gheen cracht in my ghebleuen,

[p. *684]

Maer ooc soo wort mijnen adem besloten.

18

Hierom heeft my anderwerf gheraect eene wesende ghelijck des menschen ghesichte, ende hy heeft my versterct

19

ende gheseyt. Ende wilt niet vreesen ghy man der begheerten, Vrede sij met v, wert versterct, ende weest vroem. Ende doen hy met my sprack soo ben ick vroem gheworden ende ic heb gheseyt. Spreect mijn Heere, want ghy hebt my versterct.

20

Ende hi heeft gheseyt, en weet ghy niet waerom dat ic tot v ghecomen ben? Ende nv sal ick wederom keeren, dat ick strijden soude teghen den coninck van Perssen. Als ick dan wtquam, soo openbaerde hem die prince der Griecken comende,

21

maer nochtans sal ick v vercondighen, datter openlijc gheteekent is in die scriftuere der waerheyt, ende niemant en is mijn helper in alle dese dinghen, dan Michael v lieder prince.

[afbeelding]