Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺IN dierste iaer van Darius Assuerus sone van den sade der Meden, die heerscappie ghehadt heeft ouer der Chaldeen rijck

+ A

2

int ierste iaer zijns rijcs, heb ic Daniel verstaen in die boecken het ghetal der daghen, waer aff het woert des Heeren ghedaen is gheweest tot Ieremiam den propheet. Dat veruult souden worden die tseuentich iaren der verlatenissen van Ierusalem.

3

Ende ick heb mijn aensicht ghestelt totten Heere mijnen Godt om te bidden, ende te smeeken met vasten, met eenen sack, ende met asschen.

4

Ende ic heb den Heere mijnen Godt ghebeden, ende heb beleden, ende gheseyt, Ic bidde v Heere Godt groot ende veruaerlijck, bewarende het verbont ende die bermherticheyt den ghenen die v lief hebben, ende v gheboden bewaren.

5

Wy hebben gesondicht, wy hebben boosheyt ghedaen, wi hebben ongoddelijck gheleeft, ⁺ende wy sijn affgheweken van uwen gheboden, ende ordeelen.

+ B

6

Wy en hebben niet onderdanich gheweest uwen dienaeren den propheten die ghesproken hebben in uwen naeme tot onzen coninghen, onse princen, onse vaderen, ende alle den volcke des lants.

7

V Heere sij rechtuerdicheyt, maer ons bescaemtheyt des aensichts, ghelijck dat heden is den mannen van Iuda, ende den bewoonders van Ierusalem, ende gheheel Israel. Den ghenen die by sijn, ende den ghenen die verre sijn in alle die landen, waer toe dat ghyse wtgheworpen hebt om hen boosheden waer mede sij teghen v ghesondicht hebben.

8

Heere ons sij bescaemtheyt des aensichts, onsen coninghen onsen princen, ⁺ende onsen vaderen die ghesondicht hebben.

+ C

9

Maer v onsen Heere onsen Godt sij bermherticheyt, ende ghenade, want wy sijn van v wech ghegaen,

10

ende wy en hebben die stemme des Heeren ons Godts niet ghehoort, dat wy wandelen souden in zijn wet, die hy ons ghestelt heeft doer zijn dienaers die Propheten.

11

Ende alle Israel heeft v wet ouertreden, ende sij sijn affgheweken dat sij v stemme niet hooren en souden, ende die vermalendijdinghe ende vervloeckinghe heeft op ons ghedrupt, die ghescreuen is int boeck van Moyses Gods knecht, want wy hebben teghen hem ghesondicht.

12

Ende hy heeft sijn woerden gheuesticht die hi op ons ghesproken hadde, ende ouer onse princen die ons gheordeelt hebben dat hy

[p. *683]

ouer ons brenghen soude een groot quaet, hoedanich noeyt gheweest en is onder alle den hemele, ghelijcker ghedaen is in Ierusalem.

13

Alser ghescreuen is in Moyses wet, alle dit quaet is op ons ghecomen, ende wy en hebben v aensicht niet ghebeden Heere onse Godt, dat wy wederom keeren souden van onse boosheden, ende dat wy dencken souden v waerheyt.

14

Ende die Heere heeft ghewaect ouer die quaetheyt, ende hy heeft die op ons ghebracht, rechtuerdich is die Heere onse Godt in alle zijn wercken die hy ghedaen heeft. Want wy en hebben sijn stemme niet ghehoort.

15

⁺Ende nu o Heere onse Godt die v volck wtgheleydt hebt wten lande van Egypten doer een stercke hant, ende hebt v seluen eenen naem ghemaect nae desen dach, wy hebben ghesondicht, wy hebben boosheyt gedaen.

+ D

16

Heere in alle uwe rechtuerdicheyt laet doch (bid ic) v gramscap, ende uwen rasenden toren afghekeert worden van uwe stadt Ierusalem, ende van uwen heylighen berch. Want om onse sonden ende om onser vaderen boosheyt sijn Ierusalem, ende v volc tot een versmaetheyt, alle den ghenen die rontsomme ons zijn.

17

Daerom hoort nu onse Godt ws knechts gebedt, ende sijn smeekinghen, ende thoont v aensicht op v heylighe plaetse, dwelck verwoest is om ws selfs wille.

18

⁺Neycht Heere uwe oore, ende hoort, opent v ooghen ende siet onse voerwoestinghe, ende die stadt waer op dat uwen naem aengheroepen is, want wy en storten onse ghebeden niet in onse rechtuerdicheden voer v aensicht, maer in uwe vele bermherticheden,

+ E

19

Verhoort Heere, wert versoent Heere, Aenmerct ende doeghet, en wilt niet vertoeuen om v seluen mijn God, want uwen naem is aengeroepen op die stadt ende op v volc.

20

Ende doen ic noch sprack ende badt, ende beleedt mijn sonden, ende die sonden mijns volcs van Israel, ende dat ic mijn ghebeden storte voer mijns Gods aensicht voer den heylighen berch mijns Godts,

21

doen ick noch sprack int ghebedt, siet die man Gabriel dien ic ghesien hadde int visioen van ierst haestelijck vlieghende heeft my gheraect ten tijde van dat auonts sacrificie.

22

⁺Ende hy heeft my gheleert ende tot my ghesproken, ende gheseyt. Daniel nu ben ic wtghecomen dat ic v leeren soude, ende dat ghijt verstaen soudt.

+ F

23

Van tbeghinsel van uwen ghebeden is dwoert wt ghegaen, ende ic ben ghecomen om dat ict v soude te kennen gheuen, want ghy een man der begheerten sijt, ende ghy aenmerct die redene ende verstaet het visioen.

24

Tseuentich weken sijnder cort ghestelt op v volck, ende op v heylighe stadt op dat die ouertredinghe voleynt werde, ende dat die sonde een eynde neme, ende dat die boosheyt te niet ghedaen worde, ende dat die eewighe rechtuerdicheyt aenghebrocht werde, ende dat het visioen ende die prophetie volbrocht werde, ende dat die heylighe der heylighen ghesalft werde.

25

⁺Daerom weet ende aenmerct van den wtganck des woerts dat Ierusalem wederom ghetimmert soude werden, tot Christum den vorst sullen seuen weken, ende tweentsestich weken wesen, ende die strate sal wederom opghetimmert werden, ende die mueren in die benautheyt der tijden.

+ G

26

Ende nae die tweentsestich weken sal Christus ghedoodt werden, ende ten sal sijn volck niet sijn dat hem loochenen sal. Ende het volck sal die stadt, ende die heylighe plaetse verderuen metten toecomende vorst, ende haer eynde sal verwoestheyt wesen, ende nae deynde vander orloghen die voerghescicte verwoestinghe.

27

Ende hy heuet verbont vast ghemaect met vele binnen een weke, ende int midden vander weken sal die slachofferande vergaen, ende het sacrificie, ende inden tempel sal die affgrijselijcheyt der verwoestinghe sijn, ende tot die voleyndinghe, ende totten eynde sal die verwoestinghe dueren.