Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺Int derde iaer des rijcs van Balsasar den coninck is my een visioen gheopenbaert. Ick Daniel nae tghene dat ick ghesien hadde int beghinsel,

+ A

2

heb ghesien in mijn visioen als ick was int casteel Susan dwelck is int landtscap van Elam, ende ick heb ghesien in een visioen dat ick was op die poorte Vlai.

3

Ende ic heb mijn ooghen opghehauen, ende ghesien, ende siet daer stont eenen ram voer dat broeck hebbende hooghe hoornen, ende den eenen hoogher dan den anderen, ende opwassende.

[p. *682]

4

Hier nae heb ick eenen ram ghesien metten hoornen waeyende teghen den westen, ende teghen noorden, ende teghen suyden, ende alle die beesten en mochten hem niet wederstaen, noch verlost werden van sijnder hant, ende hy heeft ghedaen nae sijnen wille, ende hy is groot gheworden.

5

Ende ic verstont, ende siet daer quam eenen bock der gheyten vanden westen op daensicht van tgheheel eertrijck, ende hy en raecte die eerde niet. Maer den bock hadde eenen wtnemenden hoorn tusschen zijn ooghen.

6

Ende hy is ghecomen tot die ghehornden ram, den welcken ic hadde sien staen voer die poorte, ⁺ende hy is tot hem gheloopen metten ghewelde van sijnder stercheyt.

+ B

7

Ende als hy ghecomen was by den ram, soo is hy op hem fel gheworden, ende hy heeft den ram gheslaghen, ende hy heeft sijn twee hoornen al in stucken ghebroken, ende den ram en mocht hen niet wederstaen, ende als hy hem ter eerden gheworpen hadde, heeft hy hem vertreden, ende niemant en mochte den ram verlossen wt sijn hant.

8

Ende den bock der gheyten is bouen maten seer groot gheworden, ende doen hy opghewassen was, soe is zijnen grooten horn ghebroken, ende daer sijn vier hornen ghesproten onder dien, nae die vier winden des hemels.

9

⁺Ende wt eenen van dien is een cleyn hornken wtghecomen, ende het is groot gheworden teghen dat suyden, ende teghen dat oosten, en teghen die stercheyt.

+ C

10

Ende het is groot gheworden tot die stercheyt des hemels, ende het heeft nedergheworpen van die stercheyt, ende van die sterren ende het heeftse vertreden.

11

Ende tot den prince der stercheyt ist groot gheworden, ende het heeft van hem wech ghenomen het eewich sacrificie, ende het heeft nederworpen die plaetse van sijnder heylichmakinghen.

12

Ende daer is macht ghegheuen teghen het daghelijcs sacrificie om der sonden wille, ende die waerheyt sal neder gheworpen worden in die eerde, ende het salt doen, ende tsal voerspoedich wesen.

13

⁺Ende ick heb ghehoort eenen vanden heylighen sprekende, ende den eenen heylighen heeft den anderen gheseyt, ick en weet niet wien, segghende. Hoe langhe sullen het visioen ende het eewich sacrificie, ende die sonde der verwoestighen die ghesciet is, ende die heylighe plaetse, ende die stercheyt vertreden worden?

+ D

14

Ende hy heeft hem gheseyt. Totten auont ende morghenstont, twee duysent drij hondert, ende die heylighe plaetse sal ghesuyuert worden.

15

Ende het is ghesciet als ic Daniel het visioen sach, ende dat verstant sochte, siet soe heefter voer mijn aenscouwen ghestaen als die ghedaente van eenen man.

16

Ende ick heb des mans stemme ghehoort tusschen Vlai, ende hy heeft gheroepen ende gheseyt, Gabriel doet desen het visoen verstaen.

17

Ende hy is ghecomen, ende heeft ghestaen daer by daer ick stont. Ende als hy ghecomen was, soo ben ic vreesende gheuallen op mijn aensicht, ende hy heeft tot my gheseyt, Sone des menschs verstaet, dat in den tijt des eyndes dat visioen volbracht sal worden.

18

Ende doen hy tot my sprack, soo ben ick ter eerden plat nedergheuallen, ende hi heeft my gheraect, ende ghestelt in mijnen rechten stant,

19

ende hy heeft tot my gheseyt, Ick sal v toonen, wat dinghen datter toecomende sijn int wterste vander maledictien, want den tijt heeft sijn eynde.

20

Den ram den welcken ghi ghesien hebt hornen hebbende, dat is die coninck der Meden ende der Persen.

21

⁺Maer den bock der gheyten dats der griecken coninck, ende den grooten horn die tusschen zijn ooghen was, hy is dierste coninck.

+ F

22

Maer datter (nae dat dien ghebroken was) viere voer hem opghestaen sijn, daer sullen vier coninghen van sijnen volcke opstaen, maer niet in sijn stercheyt.

23

Ende nae hen rijck, als die boosheden sullen ghewassen sijn, soe salder een coninck opstaen ontscamel van aensichte, ende verborghen redenen verstaende,

24

ende sijn stercheyt sal vroom werden, maer niet in zijn crachten, ende bouen dat men gheloouen mach, sal hijt al verwoesten, ende hy sal voerspoedich wesen, ende hi salt doen. ⁺Ende hy sal die sterke dootslaen, ende het volck der heylighen

+ G

25

nae sijnen wille, ende het bedroch sal voerspoedich ghemaect werden in zijn hant, ende hi sal sijn herte groot maken, ende hi salder in die ouer vloedicheyt van alle dinghen seer veel dooden, ende hy sal teghen den prince der princen opstaen, ende sonder hant sal hy vernielt worden.

26

Ende dat visioen van tsauonts ende smorghens datter gheseyt is dat is warachtich, daerom teekent ghy dat visioen, want het sal nae veel daghen wesen.

27

Ende ic Daniel heb ghequeelt, ende hebbe sieck gheweest een deel daghen, ende als ick opghestaen was, soo dede ick des conincs wercken, ende ic verwonderde my van dat visioen, ende daer en was niemant diet bediedde.