Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺INt ierste iaer Balsasars des conincs van Babilonien heeft Daniel eenen droom ghesien, ende het visioen sijns hoofts in sijn bedde, ende hy den droom scrijuende heeft hy dien met een corte redene begrepen, ende cortelijck dien begrijpende heeft hi gheseyt,

+ A

2

Ic sach in mijn visioen des nachts, ende siet die vier winden des hemels streden in die groote zee.

3

Ende vier groote beesten clommen op wter zee, versceyden onder malcanderen.

4

Dierste was als een leuwinne, ende sij hadde vloghelen van eenen arent, ic aensaecht tot dat haer vloghelen wtghetrocken worden, ende sij is wech ghehauen van der eerden, ende sij stont op die voeten als een mensch, ende haer is eens menschen herte ghegheuen.

5

Ende siet een ander beeste ghelijck eenen beyr stont besijden, ende drij rijen waren in haren mont, ende in haer tanden, ende aldus seyden sij haer. Staet op ende eet seer veel vleesch.

6

Nae desen aensach ick, ende siet daer was een

[p. *681]

[afbeelding] ander als eenen lupaert, ende sij hadde vier vloghelen als eenen voghel op haer, ende vier hoofden waren in die beeste, ende haer is macht ghegheuen.

7

Nae desen sach ic int visioen des nachts, ende siet die vierde beeste veruaerlijck ende wonderlijck, ende sterck wtermaten, sij hadde groote ysere tanden etende, ende vernielende, ende dandere met haren voeten vertredende. Maer sij was onghelijck den anderen beesten, die ick voer haer ghesien hadde, ende sij hadde thien hoornen.

8

Ick aenmercte die hoornen, ende siet daer is een ander cleyn hornken ghesproten wt het midden van hen, ende drije vanden iersten hoornen zijn wtgheroeyt van sijnen aensichte, ende siet daer waren ooghen als menschen ooghen in desen horn, ende eenen mont groote dinghen sprekende.

9

Ic sach tot dat die troonen ghestelt sijn gheweest, ende dat die oude van daghen gheseten heeft, sijn cleedt was claer blinckende als sneu, ende dat hayr zijns hoofts als suyuer wolle, zijnen throon was ghelijck vlammen viers, ⁺zijn raderen ghelijck ontsteken vier.

+ D

10

Eenen vierighen ende seer snellen vloet ghinc wt van sijn aensicht, duysentich duysenden dienden hem, ende thienwerf duysentmael hondertich duysenden stonden neffens hem, het ordeel is gheseten, ende die boecken zijn openghedaen.

11

Ick aensach om die stemme der grooter woerden die dien horn sprack, ende ick heb ghesien dat die beeste ghedoodt was, ende dat haer lichaem verdoruen was, ende den viere gheleuert om te verbranden,

12

ende dat die macht van die ander beesten wech ghenomen was, ende dat hen tijden des leuens ghestelt waren tot eenen tijt, ende eenen tijt.

13

Hierom sach ick int visioen des nachts, ende siet met die wolcken quam eene als eens menschen sone, ende hy is totten ouden van daghen ghecomen, ende in sijn aensicht hebben sij hem ghepresenteert.

14

⁺Ende hy heeft hem ghegheuen machticheyt ende eere, ende het rijck, ende alle die volcken, gheslachten, ende talen sullen hem dienen, sijn macht is een eewige macht, die niet en sal wech ghenomen worden, ende sijn rijck dat niet en sal verdoruen worden.

+ E

15

Mijnen gheest vergrouwelde hem, ick Daniel ben veruaert gheweest in dese dinghen, ende die visioenen mijns hoofts hebben my verstoort.

16

Ick ben ghegaen tot eenen vanden ghenen die daer by stonden, ende ic vraechde die waerheyt van alle dese dinghen. Die welcke heeft my gheseyt die beduydenisse der woerden, ende hy heeft my gheleert.

17

Dese vier groote beesten sijn vier rijcken, die opstaen sullen vander eerden.

18

Ende sij sullen ontfanghen het rijck vanden heylighen alderhoochsten Godt, ende sij sullen het rijck behouden tot die eewe, ende tot die eewe der eewen.

19

Daer na heb ick naerstelijck willen weten van die vierde beeste, die seer onghelijck was alle den anderen, ⁺ende wtermaten seer veruaerlijck, haer tanden ende clauwen waren van yser, sy adt ende vernielde, ende die ouerbleuinghen vertreedde sij met haren voeten,

+ F

20

ende van die thien hornen die sij op haer hooft hadde, ende vanden anderen die daer wtghesproten was, waer voer dat die drij hornen gheuallen waren, ende vanden horn die ooghen hadde, ende eenen muyl groote dinghen sprekende, die oock meerder was dan die andere.

21

Ick sach, ende siet dien horn maecte orloghe tseghen die heylighen, ende hy hadde douerhant,

22

tot dat die oude der daghen ghecomen is, ende heeft recht ghedaen den hooghen heylighen, ende den tijt is aenghecomen, ende die heylighe hebben het rijck vercreghen.

23

Ende hy heeft alsoo gheseyt, Die vierde beeste sal het vierde rijck sijn op op deerde, dwelc meerder sal sijn dan alle die rijcken, ende het sal gheheel aertrijc verslinden, ende het sal die vertreden ende heel vernielen.

24

Maer die thien hornen des rijcs sullen thien coninghen sijn, ende daer sal een ander nae die opstaen, ende hy sal machtigher zijn dan dierste, ⁺ende hy sal die drij coninghen vernederen.

+ G

25

Ende hy sal woerden teghen den hoochsten spreken, ende die heylighen des alderhoochsten sal hy vernielen, ende hy sal meynen dat hy soude moghen die tijden ende die wetten verranderen, ende die sullen in sijn handen gheleuert worden tot eenen tijt, ende twee tijden, ende tot die helicht van eenen tijt.

26

Ende het ordeel sal sitten op dat die machticheyt affghenomen, ende ghebroken worde, ende vergae totten eynde toe,

27

ende dat het rijck ende die macht, ende die grootheyt des rijcs die onder al den hemel is, ghegheuen worde den volcke der heylighen des alderhoochsten, wiens rijck is een eewich rijck, ende alle die coninghen sullen hem dienen ende onderdanich sijn.

28

Tot hier toe is het eynde des woerts. Ic Daniel worde seer met mijnen ghedachten ontstelt, ende mijn aensicht is in my verandert. Maer ick heb het woert in mijnen herte bewaert.

[afbeelding]