Den gheheelen Bybel, Inhoudende het oude ende nieuwe Testament (Leuvense bijbel 1548)

[p. *680]

Dat .vi. Capittel.

1

⁺HEt heeft Dario belieft, ende hy heeft ouer het rijck ghestelt hondert ende twintich drossaten, dat die zijn souden in alle zijn rijck.

+ A

2

Ende ouer hen drij princen, van die welcke Daniel die eene was. Dat die drossaten desen rekeninghe doen souden, ende dat die coninck gheen moeyte hebben en soude.

3

Aldus heeft Daniel te bouen ghegaen alle die princen ende drossaten, want den gheest Gods was meerder in hem. Maer die coninc dachte hem te stellen ouer alle het rijck.

4

Waer om dat die princen ende drossaten een oorsake sochten om teghen Daniel te vinden van des rijcs weghen, ende sij en hebben gheen sake oft quaet vermoeden connen vinden, om dat hy ghetrouwe was, ende datter gheen scult ende quaet vermoeden in hem te vinden en was.

5

Hierom hebben die mannen gheseyt. Wy en sullen teghen desen Daniel gheen oorsake vinden, dan by auontueren in sijns Gods wet.

6

⁺Doen hebben die princen ende drossaten den coninck looselijck ingheblasen ende hebben aldus tot hem ghesproken. Coninck Darius leeft inder eewicheyt,

+ B

7

alle die princen des rijcs ende die wethouderen, ende drossaten, ende raetsheeren, ende rechters hebben eenen raet ghesloten datter een coninclijck ghebodt wtgae, ende eenen wtroep. Dat alle die ghene die eenighe bede bidt van eenighen Godt ende mensche, tot dertich daghen toe, dan alleen van v coninck, gheworpen werde in den cuyl der leuwen.

8

Hierom dan o coninck vesticht het vonnis, ende scrijft dat ghebodt, op datment niet en verandere, datter gheordineert is vanden Meden ende Persen, ende dat niemande gheorloft en sij dat te ouertreden.

9

Ende die coninck Darius heeft dat ghebodt openbaer ghestelt, ende vast ghemaect.

10

Dwelck als Daniel beuonden hadde, dat is datter een wet ghestelt was, soe is hy in sijn huys ghegaen, ⁺ende die vensteren openghedaen hebbende in sijn eedtcamer teghen Ierusalem drijmael sdaechs buychde hy sijn knyen, ende hy aenbadt, ende beleedt voer sijnen God, ghelijck hy te voren ooc ghewoon was te doene.

+ C

11

Hier om dese mannen seer naerstelijc ondersoeckende hebben Danielem beuonden sijnen Godt biddende, ende aenroepende.

12

Ende aencomende hebben sij den coninck ghesproken vanden wtroep. O coninck en hebdi niet ghestelt, dat alle mensch die iemant badt vanden goden ende vanden menschen tot dertich daghen toe, dan v coninck, gheworpen soude worden in der leuwen cuyl? Tot die welcke heeft die coninck antwoerdende gheseyt, Dats een warachtich woort, nae tvonnisse der Meden ende der Persen, datmen niet en mach ouertreden.

13

Doen hebben sij antwoerdende gheseyt voer den coninck. ⁺Daniel van die kinderen der gheuanckenissen van Iuda en heeft op v wet niet gheacht, ende van den wtroep die ghy ghestelt hebt, maer tot drij tijden des daechs bidt hy met zijnen ghebede.

+ D

14

Welck woert als die coninck ghehoort hadde, soo is hy ghenoech bedroeft gheweest, ende hy heeft zijn herte ghestelt om Danielem dat hy hem verlossen soude, ende tot den onderganck der sonnen arbeydde hy om hem te verlossen.

15

Maer die mannen den coninck verstaende, hebben tot hem gheseyt. Weet coninck, dat dit een wet is der Meden ende der Persen, datmen alle ghebodt dat die coninck stelt, niet en mach veranderen.

16

Doen heuet die coninck gheboden, ende sij hebben Daniel aenghebracht, ende sij hebben hem gheworpen inden cuyl der leuwen. Ende die coninck heeft tot Daniel gheseyt, V Godt dien ghy altijt eert, die sal v verlossen.

17

⁺Ende daer is eenen steen ghehaelt, ende gheleydt opden mont vanden cuyl den welcken die coninck toe gheseghelt heeft met zijnen rinck, ende met den rinck van sijnen edelen mannen, datter niet ghedaen en soude werden teghen Daniel.

+ E

18

Ende die coninck is ghegaen in zijn huys, ende hy is slapen ghegaen sonder auontmael te eten, ende daer en sijn gheen spijsen voer hen ghebracht, ende daer toe is den slaep oock van hem wech ghegaen.

19

Doen is die coninck des smorghens vroech opstaende, haestelijck ghegaen tot der leuwen cuyl,

20

ende nakende der leuwen cuyl heeft hy Daniel met weenender stemmen aengheroepen, ende heeft hem aenghesproken. Daniel des leuende Godts knecht. V Godt, den welcken ghy altijt dient, meyndi dat hy v oock heeft moghen verlossen van die leuwen?

21

Ende Daniel den coninck antwoerdende heeft gheseyt. ⁺Coninck leeft inder eewicheyt.

+ F

22

Mijn Godt heeft zijnen engel ghesonden, ende heeft der leuwen muylen ghesloten, ende sij en hebben my niet ghehindert, om datter voer hem rechtuerdicheyt in my gheuonden is. Maer oock voer v coninck en heb ick gheen misdaet ghedaen.

23

Doen is die coninck seer verblijdt gheweest van hem, ende hy heeft beuolen datmen Danielem wthalen soude wt den cuyl, ende Daniel is wt den cuyl ghebracht, ende daer en is gheen quetsuere in hem gheuonden, om dat hy zijnen Gode ghelooft hadde.

24

Maer doer des conincs gebodt sijn daer ghebracht die mannen die Danielem besculdicht hadden, ende sij sijn inder leuwen cuyl gheworpen, sij ende hen kinderen, ende hen huysvrouwen, ende sij en zijn niet ghecomen tot dat pauiment des cuyls, die leuwen en hebbense ghegrepen, ⁺ende sij hebben alle hen beenderen in stucken ghebroken.

+ G

25

Doen heeft Darius ghescreuen alle den volcken, gheslachten, ende talen, woonende in alle deertrijck. Den vrede werde v lieden vermenichfuldicht.

26

Van my is een ghebodt ghestelt datmen in alle mijn heerlijcheyt ende rijck ontsien, ende vreesen sal Daniels Godt, want hy is die leuende Godt, ende eewich tot in die eewicheyt, ende sijn rijc en sal niet verstroyt werden, ende sijn macht is inder eewicheyt.

27

Hy is een verlosser ende salichmaker, doende teekenen, ende wonderlijcheden inden hemel ende in die eerde, die Danielem verlost heeft wt der leuwen cuyl.

28

Ende Daniel is ghestadich ghebleuen tot het rijck van Darius, ende het rijck Cyri van Persen.