Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlvij. Capittel.

1

⁺ENde hy heeft my omghekeert tot die poorte des huys, ende siet daer ghinghen wateren wt van onder den dorpel des huys ten oosten, want des huys aensicht sach nae den oosten maer die wateren daelden neder aen die rechte sijde des tempels, aen die suytsijde des outaers.

+ A

2

Ende hy heeft my wtgheleyt door den wech van die noortpoorte, ende hy heeft my ghekeert totten wech buyten die buytenste poorte, den wech die oostwaerts sach, ende siet die wateren waren ouervloedende aen die rechte sijde.

3

Als die man wtghinck oostwaerts, diet seelken in syn handt hadde, so heeft hy ooc ghemeten duysent cubitus, ende hy heeft my doert water gheleydt tot den enckelen toe.

4

Wederom heeft hy duysent ghemeten, ende hi heeft my doort water gheleydt tot den knien toe, ende hy heefter duysent ghemeten, ende hy heeft my doort water gheleyt totten lendenen toe.

5

Ende hi heefter duysent ghemeten, die beke daer ick niet doorgaen en mocht, want die wateren van die diepe beke waren opghehauen, diemen niet doorgaen en mach.

6

⁺Ende hy heeft tot my gheseyt, Voorwaer ghy sone des menschen hebbet ghesien. Ende hy heeft my wtgheleyt ende ghekeert totten oeuer der beken.

+ B

7

Ende als ick my omghekeert hadde, siet soo waren in den oeuer der beken wtermaten veel boomen aen beyde die sijden.

8

Ende hy heeft tot my gheseydt, dese wateren die wtgaen tot die hoopen des oostsauels, ende dalen neder tot die effen landen der woestijnen, sullen in die zee gaen, ende wtgaen, ende die wateren sullen ghenesen worden

9

Ende alle leuende ziele die cruypt werwaerts dat die beke coemt die sal leuen, ende daer sullen veel ghenoech visschen zijn nae dat dese wateren tot daer sullen ghecomen zijn, ende si sullen ghenesen worden, ende si sullen alle leuen waer toe dat die beke coemt.

10

Ende die visschers sullen daer op staen, van Engaddi tot Engallim salt een drooginghe der netten zijn. Daer sullen vele ghedaenten van sijnen visschen zijn, ghelijck die visschen der grooter zee van seer grooter menichten,

11

ende in haer oeueren ende in die broeckachtighe plaetsen en sullen sij niet ghenesen worden, want sij sullen tot soutgroeuen ghegheuen worden.

12

⁺Ende op die beke sullen aen zijn oeueren van beyde sijden alderhande vrucht draghende boomen op scieten, daer en sal gheen loof af vallen, ende zijn vrucht en sal niet faelgeren, tot elcker maent salt ierste vruchten voorts brenghen, want zijn wateren sullen wt die heylighe plaetse gaen, ende zijn vruchten sullen tot een spijse wesen, ende zijn bladeren tot medecijne.

+ C

13

Dit seyt die Heere Godt, dit is die pale waer in ghi dlant besitten sult, in die twaelf gheslachten van Israhel, want Ioseph heeft een dobbel coordeken.

14

Maer ghi sultse besitten elc ghelijckelijc als zijn broeder, waer op dat ick mijn hant ghehauen hebbe, dat ickse uwen vaderen gheuen soude, ende dit lant sal v lieden vallen tot een besittinghe.

15

Ende dit is des lants pale aen die noortsijde van die groote zee den wech Hethalon alsmen coemt nae Sedada

16

Emath Berotha Sabarim die daer is tusschen die pale van Damascus, ende van die by ligghende palen van Emath, het huys van Thichon welck is by die pale van Auran.

17

Ende die pale sal wesen vander zee tot dat voorhof Enon die pale van Damascus, ende vanden noorden totten noorden die pale van Emath, die noortsijde.

18

⁺Maer die oostsijde vant midden van Auran, ende van dmidden van Damascus, ende van dmidden van Galaad, ende van dmidden des lants van Israel is die Iordane sceydende aen die oostsee, ghy sult oock meten die oostsijde.

+ D

19

Maer die suytsijde is van Thamar tot die wateren des wedersegghens van Cades, ende die beke tot die

[p. *672]

groote zee, ende dit is die suydt sijde ten suyden.

20

Ende die sijde der zee, Die groote zee van die byligghende pale recht doere tot datmen coemt tot Emath, dits die sijde vander zee.

21

Ende ghy sult v lieden dit lant deylen, nae die gheslachten van Israel,

22

ende ghy sult die v lieden tot een erffenisse maken, ende den aencomelinghen die tot v lieden comen sullen die kinderen winnen sullen int midden van v lieden, ende sij sullen v lieden wesen als ingheborene onder die kinderen van Israel. Sy sullen met v die besittinghe deylen int midden der gheslachten van Israel.

23

Maer in wat gheslachte dat een aencomelinck is, daer suldi hem een besittinghe gheuen, seyt die Heere Godt.