Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlvi. Capittel.

1

⁺DIt seyt die Heere God. Die poorte van dat binnenste voorhoff die oostwaerts siet, sal ghesloten worden ses daghen in die welcke men werc doet, maer opden sabboth dach sal die open ghedaen worden, maer ooc sal sij gheopent worden inden iersten dach der nieuwer maenden.

+ A

2

Ende die prince sal incomen door den wech van dat portael der poorten van buyten, ende hy sal inden inganc vander poorten staen, ende die priesters sullen zijn brantofferande doen, ende sijn vreedofferanden, ende hy sal aenbidden opden dorpel vander poorten, ende hy sal wtgaen, maer die poorte en sal niet ghesloten worden totten auont toe.

3

Ende het volck des lants sal aenbidden aen die doere van dier poorten, ⁺in die sabbathen, ende in dierste dagen der maenden voor den Heere,

+ B

4

Maer desen brantoffer sal die prince den Heere offeren, inden sabboth dach, ses ombesmette lammeren, ende eenen ombesmetten ram.

5

Ende een sacrificie ephi tot elcken ram, maer van die lammeren het sacrificie dat sijn hant sal gheuen, ende een hin olien, tot elcken ephi,

6

maer opden iersten dach vander maent sal hy offeren een ombesmet calf vanden runderen, ende ses lammeren, ende ses rammen die ombesmet sullen wesen.

7

Ende een ephi tot elc calff ende een ephi tot elcken ram sal hy tot een sacrificie doen maer vanden lammeren alsoo zijn hant vinden sal, ende een hin olien tot elcken ephi.

8

Ende als die prince incomen sal, dat hy ingae door den wech van dat portael der poorten, ende door den seluen wech wtgae.

9

⁺Ende alst volck des lants ingaen sal voor des Heeren aensicht in die hoochfeesten, soo wie door die noortpoorte incoemt om te aenbidden, die gae wte door den wech van die suydtpoorte. Voorts soo wie incoemt door den wech van die suydtpoorte, die gae wte door den wech van die noortpoorte, hy en sal niet wederkeeren door den wech der poorten daer hy door incomen is maer hy sal teghen die ouer wtgaen.

+ C

10

Ende die prince int midden van henlieden sal metten ingaende ingaen ende metten wtgaende wtgaen.

11

Ende in die mercten ende in die hooghe feestdaghen sal het sacrificie van ephi wesen tot elc calf, ende een ephi tot elcken ram, ⁺maer van den lammeren salt sacrificie wesen alsoo zijn hant vinden sal, ende een hin olien tot elcken ephi,

+ D

12

maer als die prince een vrijwillighe heelbrantofferande doet, oft vrijwillighe vreedofferanden den Heere, soo salmen hem die poorte open doen die ten oosten siet, ende hy sal sijn brantofferande doen, ende zijn vreedofferanden ghelijc men dat pleech te doen opden sabboth, ende hi sal wtgaen ende die poorte salmen sluyten nae dat hy wtghegaen is.

[p. *671]

13

⁺Ende hy sal een ombesmet lam van dat selue iaer den Heere alle daghe doen tot eenen brantoffer, des morghens sal hy dat altijt doen,

+ E

14

ende hy sal een sacrificie daer op doen des smorghens vroech het seste deel van een Ephi, ende van olien een derden deel van een hin dattet ghemengt worden met bloeme van tarwen mele. Dits den Heere een wettich sacrificie altijt duerende ende eewich.

15

Ende hy sal een lam ende een sacrificie ende olie doen des morghens vroech tot een eewighe brant offerande,

16

Dit seyt die Heere Godt, Ist dat die prince een ghifte gheeft iemanden van sijnen sonen, soo sal sijn erffenisse sijnder kinderen wesen, sij sullen die erffelijck besitten,

17

Maer ist dat hy een gaue gheeft van sijn erffelijcheyt eenen van sijnen knechten, ⁺soo salt dien toebehoiren totten iare der vrijcheyt ende tsal wederkeeren totten prince, maer sijn erffenisse sal sijnen kinderen toebehoiren.

+ F

18

Ende die Prince en sal van des volcs erffenisse niet nemen met ghewelt, ende van hen besittinghe, maer van sijn besittinghe sal hy een erffenisse sijnen kinderen gheuen, op dat mijn volck niet verstroeyt en worde een iegelijck van sijn besittinghe.

19

Ende hy heeft my ingheleyt door den inganc die daer was aen die sijde der poorten tot die scadtcameren van die heylighe plaetse, tot die priesters, die daer noortwaerts saghen, ende daer was een plaetse streckende nae den westen.

20

Ende hi heeft tot my gheseyt, Dit is die plaetse daer die priesters coken sullen, voor die sonde, ende voor die versoemenisse, ⁺daer sij het sacrificie coken sullen, dat sij niet wt draghen en souden in dat buytenste voorhof ende dat het volck gheheylicht werde.

+ G

21

Ende hy heeft mij wtgheleydt tot dat buytenste voorhoff, ende hy heeft my rontsomme gheleyt door die vier hoecken des voorhoefs, ende siet daer was een cleyn voorhoefken inden hoeck des voorhoefs, elck besonder voorhoefken in die hoecken des voorhoefs.

22

In die vier hoecken des voorhoefs waren die voorhoefkens ghestelt, van veertich cubitus in die lengde, ende dertich in die breydde, van eender maten waren die viere.

23

Ende daer was eenen muer gaende rontsomme die voorhoefkens, ende daer waren kokenen ghemaect onder die poortalen al rontsomme,

24

Ende hy heeft tot my gheseyt. Dit is thuys der kokenen, waer in dat die dienaers van des Heeren huys des volcks slachofferanden coken sullen.

[afbeelding]