Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlv. Capittel.

1

⁺ENde als ghy dlant sult beghinnen te deylen metten lote, so sceydt wt dierste gauen den Heere dat geheylicht sij van dlant, in die lengde van vijuentwintich duysent, ende in die breydde thien duysent, dit sal geheylicht wesen aen alle zijn palen rontsomme.

+ A

2

Ende het sal van allen sijden gheheylicht worden

[p. *670]

vijf hondert bi vijf hondert, aen vier sijden alomme, ende vijftich cubitus in zijn voorsteden rontsomme.

3

Ende van dese mate suldi meten die mate van vijuentwintich duysent, ende in die breydde van thien duysent, ende daer in sal den tempel zijn, ende theylich der heylighen.

4

Die gheheylichde plaetse des lants sal den priesteren den dienaers van die heylighe plaetse toebehooren, ⁺die tot des Heeren dienst ghaen, ende tsal hen plaetse wesen tot huysen, ende tot een heylighe plaetse der heylicheyt.

+ B

5

Ende vijuentwintich duysent lengden, ende thien duysent breydden sullen den Leuiten toebehooren, die den huyse dienen, sij sullen twintich scatcameren besitten.

6

Ende die besittinge der stadt suldi gheuen in die breydde vijf duysent, ende in die lengde vijuentwintich duysent, nae die affsceydinghe van die heylighe plaetse, den gheheelen huyse van Israhel.

7

Ende den prince suldi gheuen aen deen ende dander sijde, tot een afsceyden der heyligher plaetsen, ende tot een besittinghe der stadt, teghen daensicht van dat afsceyden der heyligher plaetsen, ende teghen daensicht vander stadt besittinghe, ⁺van die sijde der zee, tot die zee toe, ende van die oostsijde totten oosten toe. Ende die lengde nae elc deel van die westpale tot die oostpale,

+ C

8

Vanden lande sal sijn besittinghe wesen in Israel, ende die princen en sullen niet meer mijn volck beroouen, maer sij sullen dlant den huyse van Israel gheuen nae hen gheslachten.

9

Dit seyt die Heere Godt. Latet v ghenoech wesen ghy princen van Israel, laet achter die boosheyt ende den roof, ende doet recht ende rechtuerdicheyt, sceydt v palen van mijnen volcke, seydt die Heere Godt.

10

Een rechtuerdighe waghe, ende een rechtuerdighe ephi mate, ende een rechtuerdighe batus mate suldi hebben,

11

ephi ende batus sullen ghelijck ende van eender maten wesen, ⁺alsoo dat batus houde het thiende deel van corus mate, ende ephi het thiende deel van corus mate, nae die corus mate sal hen verghelijcken wesen.

+ D

12

Ende een sicle heeft twintich hellinghen, voorts twintich siclen ende vijuentwintich siclen, ende vijfthien siclen maken een pont.

13

Ende dit sijn die ierstelinghen die ghy nemen sult, het seste deel van ephi van een corus mate tarwen, ende het seste deel van ephi van een corus mate ghersten.

14

Ende die mate der olien, Een batus olien is dat thienste deel van een corus mate, ende thien batus maken een corus mate, want thien batus maten vullen een corus mate

15

ende eenen ram van een cudde van twee hondert van die ghene die de kinderen van Israel voeden tot een sacrificie, ⁺ende tot een brantofferande, ende tot vreedofferanden, om te versoenen voor henlieden, seydt Godt die Heere.

+ E

16

Alle tvolck des lants sal ghehouden worden in dese ierstelinghen den prince in Israel.

17

Ende bouen den prince sullen zijn brantofferanden, ende het sacrificie ende die vochtighe offeranden in die hoochtijden, ende in die nieuwe maenden, ende in die sabbathen, in alle die hooghe feestdaghen des huys van Israhel, sal hy sacrificie doen voor die sonde, ende brantofferande, ende vreedofferanden, om te versoenen voor thuys van Israel.

18

Dit seyt die Heere God. In dierste maent, inden iersten dacht vander maent, suldi nemen een calf wt die runderen ombesmet ende ghy sult die heylighe plaetse suyueren.

19

⁺Ende die priester sal nemen vanden bloede dat voor die sonden sijn sal, ende hy sal dat stellen aen die stijlen des huys, ende aen die vier hoecken van dat opperste des outaers, ende aen die stijlen der poorten van dat binnenste voorhoff.

+ F

20

Ende alsoo suldy doen op den seuensten dach der maent voor elcken die onwetende is gheweest, ende met dwalinghe bedroghen is gheweest, ende ghy sult suyueringhe doen voor thuys.

21

⁺In dierste maent opden veerthiensten dach der maent sal v lieden dat hoochtijt van paesschen zijn, seuen daghen salmen ongheheefde brooden eten.

+ G

22

Ende die prince sal op dien dach offeren voor si seluen ende voor alle tvolc des lants een calf voor die sonde,

23

ende int hoochtijt van seuen daghen sal hy den Heere een brantofferande doen, seuen calueren, ende seuen rammen sonder smette alle daghe seuen daghen lanc, ende voor die sonde eenen bock der gheyten.

24

Ende hy sal een sacrificie Ephi tot elck calf doen, ende een ephi tot elcken ram, ende hy sal een hin mate olie doen tot elcken ephi.

25

In die seuenste maent opden vijfthiensten dach vander maent int hoochtijt sal hi doen alst voorseyt is tot seuen daghen, soo wel voor die sonde, als tot die brantofferande, ende in dat sacrificie ende in die olie.