Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xliiij. Capittel.

1

⁺ENde hy heeft my omghekeert totten wech van die buytenste poorte der heyligher plaetsen die oostwaerts siet, ende die was ghesloten

+ A

2

Ende die Heere heeft tot my gheseyt. Dese poorte sal ghesloten sijn, sij en sal niet gheopent werden, ende gheen man en sal door haer ingaen, want die Heere Israels Godt is door haer ingheghaen, ende sij sal voor den prince ghesloten zijn.

3

Die prince sal selue in haer sitten om broodt te eten voor den Heere, door den wech van dat portael der poorten sal hy incomen ende door haren wech sal hi wtgaen.

4

Ende hy heeft my ghebracht door den wech van die noortsche poorte, voor daenschijn des huys, ende ick heb ghesien, ende siet die glorie des Heeren heeft des Heeren huys veruult, ende ick heb op mijn aensicht gheuallen.

5

⁺Ende die Heere heeft tot my gheseyt. Sone des menschen stelt v herte, ende siet met uwen ooghen, ende hoort met uwen ooren alle dat ick spreke tot v van alle die ceremonien van des Heeren huys, ende van alle sijnen wetten, ende ghy sult v herte stellen in die weghen des tempels, door alle die wtganghen van die heylighe plaetse.

+ B

6

Ende ghy sult segghen tot den huyse van Israel dat my creytende is. Dit seyt die Heere Godt. Laet v genoech wesen alle uwe boose misdaden huys van Israel,

7

om dat ghy vreemde kinderen inbrengt die ombesneden van herten zijn, ende ombesneden van vleessche, dat sij in mijn heylighe plaetse sijn souden, ende dat sij mijn huys besmetten souden, ende ghi offert mijn brooden, dat vet des inghewants, ende dbloet ende ghy breect mijn verbont in allen v groote misdaden.

8

Ende ghy en hebt die gheboden van mijn heylighe plaetse niet ghehouden, ende ghi hebt bewaerders van mijn bewaringhen ghestelt in mijn heylige plaetse voor v seluen.

9

⁺Dit seyt die Heere Godt. Alle vreemdelinck ombesneden van herten, ende ombesneden van vleesche en sal in mijn heylighe plaetse niet gaen, alle vreemde sone die int midden der kinderen van Israel is.

+ C

10

Maer oock die Leuiten die verre van my ghesceyden zijn in die dolinghe der kinderen van Israel, ende hebben van my ghedoelt nae hen affgoden ende hebben hen boosheyt ghedraghen.

11

Sij sullen in mijn heylighe plaetse des huys bewaerders sijn, ende doerwaerders van de poorten des huys, ende dienaers des huys, sij sullen des volcks slachofferanden dootslaen, ende sij sullen in hen aensicht staen, om hen te dienen.

12

Om dat sij hen ghedient hebben voor daenschijn van haren affgoden, ende sij sijn den huyse van Israel gheworden tot een struycsele der boosheyt, ⁺Daer om heb ick mijn hant opghehauen op hen, seyt die Heere Godt, ende sy hebben hen boosheyt gedraghen,

+ D

13

ende sij en sullen tot mij niet ghenaken, dat sij tpriesterscap voor my souden bedienen, noch sij en sullen tot alle mijn heylighe plaetse niet comen neffens dat heylich der heylighen, maer sy sullen hen beschaemtheyt draghen, ende hen groote misdaden, diese ghedaen hebben.

14

Ende ick salse gheuen tot doorwaerders des huys, in allen sijnen dienst, ende in alle dinghen die in haer ghedaen sullen worden.

15

Maer die priesters Leuyten Sadocs sonen, die die ceremonien van mijn heylighe plaetse bewaert hebben, als die kinderen van Israhel van my doelden, die sullen tot my comen, om my te dienen, ende sij sullen in mijn aensicht staen om my het vet des inghewandts, ende het bloet te offeren, seyt die Heere Godt.

16

⁺Sij sullen in mijn heylighe plaetse gaen, ende sij sullen tot mijn tafel gaen, dat sij mij dienen, ende mijn ceremonien bewaeren.

+ E

17

Ende als sij in die poorten des binnenste voorhoefs comen sullen, soo sullen sij met lijnen cleederen ghecleedt worden, ende op hen en sal niet wullens comen, als sij dienen in die poorten van dat binnenste voorhoff, ende daer innewaerts,

18

Lijnen huyuen sullen op hen hoofden sijn, ende lijnen nedercleederen sullen aen hen lendenen sijn, ende sij en sullen niet toeghegort worden int sweet.

19

Ende als sy wt dat buytenste voorhoff sullen gaen totten volcke, soo sullen sij hen ontcleeden van haren cleederen daer sij in ghedient hadden, ende sij sullen die besijden legghen in de schadtcamer van die heylighe plaetse, ende sij sullen hen met ander cleederen cleeden, ende sij en sullen tvolck niet heylighen in hen cleederen.

20

Maer hen hooft en sullen si niet sceren, nocht hen hayr voeden, maer scerende sullen si hen hoofden al rontsomme sceren.

21

⁺Ende alle priester en sal gheenen wijn drincken, als hy int binnenste voorhof gaen sal.

+ F

22

Ende een weduwe ende een verstooten vrouwe en sullen sij tot gheen huysvrouwe nemen, maer maechden van tsaet des huys van Israel, maer ooc een weduwe die eens priesters weduwe is sullen si nemen ten houwelijcke.

23

Ende si sullen mijn volck leeren wat ondersceyt datter is tusschen tghene dat heylich is ende dat besmet is, ende tusschen reyn ende onreyn sullen sij hen toonen.

24

Ende alsser eenighen tweedracht is, soo sullen si in mijn ordeelen staen, ende ordeelen, sij sullen mijn wetten ende mijn gheboden in alle mijn hooghe feestdaghen bewaren, ende mijn sabbathen sullen sij heylighen.

25

Ende tot eenen dooden mensch en sullen sij niet ingaen, op dat si niet besmet en worden, dan tot vader ende moeder, ende sone, ende dochter, ende broeder, ende suster, die haren tweeden man niet ghehadt en heeft in die welcke sullen sij ontsuyuert worden,

26

ende nae dat hy ghesuyuert sal wesen, soo salmen hem seuen daghen tellen.

27

⁺Ende opden dach sijns ingancs in die heylighe plaetse tot dat binnenste voorhof om my te dienen in die heylighe plaetse sal hy voor zijn sonde offeren, seyt die Heere God.

+ G

28

Sij en sullen gheen erffenisse hebben, ick ben hen erffenisse, ende ghy en sult hen gheen besittinghe gheuen in Israhel, want ick ben hen besittinghe.

29

Die slachofferande, ende die offerande voor die sonde ende voor die versoemenisse sullen sij eten, ende alle beloefde gaue in Israel sal hen toebehooren.

30

Ende die ierstelinghen van alle ierste gheborene, ende alle die vochtighe offeranden, van alle datter gheoffert wert, sullen den priester toe behooren, ende die beste van uwen spijsen suldy den priester gheuen dat hi die ghebenedijdinge sijnen huyse oplegghe.

31

Alle dat van selfs ghestoruen is, ende dat van eenighe beeste gheuanghen is, van den voghelen, ende cleynen vee, dat en sullen die priesters niet eten.