Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xliij. Capittel.

1

⁺ENde hy heeft my gheleydt ter poorten die totten oosten wech sach.

+ A

2

Ende siet die glorie Godts van Israel ghinck binnen door den oosten wech, ende hy hadde een stemme als een stemme van veel wateren, ende die eerde blincte van zijnder maiesteyt.

3

Ende ick heb een visioen ghesien nae die ghedaente, die ic ghesien hadde, als hi quam dat hy die stadt verderuen soude, ende die ghedaente was nae dat ghesichte dat ick ghesien hadde by den vloet Chobar, ende ick heb gheuallen op mijn aensicht.

4

Ende des Heeren maiesteyt is inden tempel ghegaen, door den wech der poorten die oostwaerts sach.

5

Ende die gheest heeft my opghehauen, ende heeft my ghebracht in dat binnenste voorhoff, ende siet dat huys was veruult met des Heeren glorie.

6

⁺Ende ick heb ghehoort eenen tot my sprekende vanden huyse, ende daer stont een man by my.

+ B

7

Ende hy heeft tot my gheseyt. Sone des menschen dit is die plaetse van mijnen stoel, ende die plaetse van mijnder voeten voetstappen, daer ick woone int midden der kinderen van Israel inder eewicheyt, ende het huys van Israel en sal voortaen mijnen heylighen naem niet besmetten, si ende hen coninghen, in hen oncuyscheden, ende in haerder coninghen vallen, ende in die hoochden.

8

Die haren dorpel ghemaect hebben by mijnen dorpel, ende hen stijlen neffens mijn stijlen, ende daer was eenen muer tusschen my ende henlieden.

Ende sij hebben mijnen heylighen naem besmet in die affgrijselijcheden die sij ghedaen hebben, ⁺waer om dat ickse vernielt hebbe in mijn gramschap.

+ C

9

Nv dan laetse hen oncuyscheyt verre wech stooten, ende haerder coninghen vallen van my, ende ick sal int midden van hen woonen altijt.

10

Maer ghy sone des menschen thoont den huyse van Israel den tempel, ende laetse bescaemt worden van hen boosheden, ende laetse dat ghestichte meten,

11

ende laetse hen scamen van alle die dinghen die si ghedaen hebben. Die figuere des huys ende sijnder timmeragien, inganghen ende wtganghen, ende alle zijn bescrijuinghe, ende alle zijn gheboden, ende alle zijn ordinancie, ende alle zijn wetten thoont hen, ende ghy sultse scrijuen in hen ooghen dat si allen zijn bescrijuinghe bewaren, ⁺ende zijn gheboden, ende dat si die doen.

+ D

12

Dits die wet des huys in dat opperste des berchs. Alle zijn pale int ronde is theylich der heyligen. Dit is dan die wet des huys

13

ende dit zijn die maten des outaers inden warachtichsten cubitus, die eenen cubitus ende een palme hadde, in sijnen gront was eenen cubitus, ende eenen cubitus in die lengde, ende zijn begrijp was tot sijnen wtersten cant, rontsom een palme, dit was oock die groeue des outaers.

14

Ende vanden gront der eerden tot die laetste hoochde twee cubitus, ende die breydde was van eenen cubitus, ende van die minste hoochde tot die meeste hoochde waren vier cubitus, ende die breydde was van eenen cubitus.

15

⁺Maer dat opperste deel des outaers was van vier cubitus, ende van dat opperste des outaers tot bouen toe waren vier hoornen.

+ E

16

Ende dat opperste was van twaelf cubitus in die lengde tot twaelf cubitus in die breydde, viercantich met ghelijcke sijden.

17

Ende dat opperste des outaers van veerthien cubitus in die lengde, door veerthien cubitus in die breydde, in zijn vier hoecken, ende een croone rontsom van die van eenen haluen cubitus, ende sijnen gront was van eenen cubitus int ronde, maer zijn trappen waren ghekeert ten oosten.

18

⁺Ende hy heeft tot my gheseyt. Sone des menschen dit seyt die Heere Godt. Dit zijn die manieren des outaers op wat dach dat hi ghemaect sal wesen, dat daer op die brantofferande gheoffert werde, ende het bloet wtgestort.

+ F

19

Ende ghy sullet gheuen den priesteren, ende den Leuiten die van Sadocs sade zijn die tot my comen, seyt die Heere Godt, dat si my offeren een calf van die runderen voor die sonde.

20

Ende nemende tot v van sijnen bloede sult ghy dat doen op zijn vier hoecken, ende op die vier hoecken vanden oppersten steen, ende op die croone rontsomme, ende ghy sult dat suyueren ende versoenen,

21

Ende ghy sult dat calf nemen dat voor die sonde gheoffert is, ende ghi sult dat verbranden in een verscheyden plaetse des huys buyten die heylighe plaetse.

22

⁺Ende op den tweeden dach suldi eenen ombesmetten bock der gheyten offeren voor die sonde, ende si sullen den outaer suyueren, ghelijck si dien ghesuyuert hebben met den calue.

+ G

23

Ende als ghy voldaen sult hebben dien te suyueren, soo suldy een ombesmedt calf vanden runderen nemen, ende eenen ombesmetten ram van den cudde.

24

Ende ghy sult die offeren in des Heeren aensicht, ende die priesters sullen daer sout op legghen, ende si sullen die offeren tot eenen heelen brantoffer den Heere.

25

Seuen daghen lanc suldi eenen bock offeren voor die sonde alle daghe, ende een calf van dat groot vee, ende eenen ram van tcleyn vee, sullen sij ombesmedt offeren.

26

Seuen daghen sullen si den outaer versoenen ende dien suyueren, ende si sullen zijn hant

[p. *669]

vullen.

27

Ende als die daghen volbracht sullen zijn, op den achtsten dach ende daer ouer, sullen die priesters opden outaer uwe brantofferanden doen, ende die si voor den vrede offeren, ende ick sal v lieden versoent wesen, seyt die Heere Godt.