Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlij. Capittel.

1

⁺ENde hy heeft my wtgheleydt tot dat buytenste voorhof door den wech noortwaerts leydende, ende hy heeft my ghebracht in die scadtcamer die daer was teghen dat afghescheydde ghestichte, ende teghen dat huys noortwaerts streckende.

+ A

2

In daensicht der lengden, hondert cubitus van die noortdoere, ende der breydden vijftich cubitus,

3

teghen die twintich cubitus des binnenste voorhofs, ende teghen tpauiment met steenen ghepaueyt van dat buytenste voorhoff, daer het poortael was gheuoecht aen dat drijvoudich poortael.

4

Ende voor die scadtcameren een wandelplaetse van thien cubitus der breydden, tot die binnenste des weechs siende, van eenen cubitus. Ende hen doeren waren ten noorden,

5

daer die scadtcameren int opperste neerder waren, want si onderhielden die poortalen die wt dien wtstaken, van donderste ende van middelste des ghestichts,

6

⁺Want het waren drij solderinghen, ende sij en hadden gheen columnen, ghelijck die columnen van die voorplaetsen waren, daerom staken sij wt van die onderste ende van die middelste vander eerden vijftich cubitus.

+ B

7

Ende den omgaenden buytensten muer achter die scadtcameren die daer waren inden wech van dat buytenste voorhoff voor die scatcameren zijn lengde was van vijftich cubitus,

8

want die lengde van die scadtcameren des buytenste voorhoffs was vijftich cubitus, ende die lengde voor daensicht des tempels, hondert cubitus.

9

Ende onder dese scadtcameren was eenen inganck der gheender die daer in ghinghen vanden oosten van dat buytenste voorhof.

10

In die breetheyt van den omgaenden muer des voorhofs die daer was teghen den oosten wech in dansicht van dat affghesceyden ghestichte, ende voor dat ghestichte waren die scadtcameren.

11

⁺Ende eenen wech voor hen aensichte, nae die ghelijckenisse der scadtcameren, die inden noorden wech waren, nae hen lengde alsoo was oock hen breydde, ende alle haren inganck, ende ghelijckenissen,

+ C

12

ende hen doeren waren nae die doeren der scadtcameren die inden wech waren siende suytwaerts, een doere int hooft vanden wech, welcken wech was voor het affghesceyden portael den ghenen die door den oosten wech in ghinghen.

13

Ende hy heeft tot my gheseyt. Die scadtcameren vanden noorden, ende die scadtcameren vanden suyden, die voor dat afghesceyden ghestichte sijn, dit sijn die heylighe scadtcameren, in die welcke die priesters eten, die totten Heere comen int heylich der heyligen, daer sullen si theylich der heyligen legghen ende die offerande voor die sonde, ende voor die versuemenisse, want die plaetse is heylich,

14

Maer als die priesters sullen inghecomen zijn, soo en sullen si niet wtgaen wt die heylighe plaetsen tot in dat buytenste

[p. *668]

voorhof, ende daer sullen si hen cleederen te bewaren legghen, daer si in dienen, want si heylich zijn, ende si sullen met anderen cleederen ghecleedt worden, ende alsoo sullen si voorts gaen totten volcke.

15

⁺Ende als hy die maten van dat binnenste huys volbracht hadde, soo heeft hy my wtgheleyt door den wech der poorten die daer sach tot den oosten wech, ende hy heeft dien ghemeten aen alle sijden rontsomme.

+ D

16

Ende hy heuet ghemeten teghen den oosten wint metten meet riete vijf hondert rieten, met den meet riete rontsomme.

17

Ende hy heeft ghemeten teghen den noorden wint, vijf hondert rieten metten meet riete rontsomme.

18

Ende teghen den suyden wint heeft hy vijf hondert rieten ghemeten, metten meet riet rontsomme.

19

Ende teghen den westen wint heeft hy vijf hondert rieten ghemeten, metten meet riete.

20

Nae die vier winden heeft hy haren muer ghemeten aen allen sijden rontsomme, die lengde vijf hondert cubitus, ende die breyde vijf hondert cubitus, ondersceydende tusschen die heylighe plaetse, ende des ghemeyns volcs plaetse.

[afbeelding]