Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xli. Capittel.

1

⁺ENde hy heeft my gheleydt inden tempel, ende hy heeft die voorvorsten ghemeten ses cubitus van breydde aen deen sijde, ende ses cubitus van breydde aen dander sijde, die breydde van dat tabernakel.

+ A

2

Ende die breydde der poorten was van thien cubitus, ende die sijden van die poorte waren van vijf cubitus aen deen sijde, ende vijf cubitus aen dander sijde, ende hy heeft haer lengde ghemeten van veertich cubitus, ende die breydde van twintich cubitus.

3

Ende daer binnen ghegaen sijnde heeft hy inden voorvorst der poorten ghe-

[p. *667]

meten twee cubitus, ende die poorte van ses cubitus ende die breydde der poorten van seuen cubitus.

4

Ende hy heeft haer lengde ghemeten van twintich cubitus, ende die breydde van twintich cubitus, voor daenschijn des tempels, ende hy heeft tot my gheseyt. Dit is theylich der heylighen.

5

Ende hy heeft den wandt des huys ghemeten van ses cubitus, ende die breydde vander sijden van vier cubitus aen alle sijden rontsomme dat huys.

6

Ende die sijden deen sijde aen dander, waren tweemael drijendertich, ende si waren wtstekende die inghinghen door den wandt des huys, in die sijden rontsom, dat si besluyten souden, ende niet raken den wandt des tempels,

7

⁺Ende daer was een strate int ronde, opwaerts climmende door eenen wendelgraet, ende die leydde tot die eedtcamere des tempels int ronde daerom was den tempel wijder int opperste, ende alsoo ghinckmen opwaerts van beneden tot dat bouenste door dmidden.

+ B

8

Ende ick heb int huys ghesien die hoochde rontsomme, ghefundeerde sijden tot die mate des riets, van ses cubitus ruymte,

9

ende die breydde lancs den wandt der sijden van buyten van vijf cubitus, ende het binnenste huys was in die sijden des huys.

10

Ende tusschen die scadtcameren die breydde van twintich cubitus rontsomme het huys van allen sijden.

11

Ende die doere der sijden ten ghebede, die een doere aenden noortwech, ende die een doere aenden suytwech, ende die breydde der plaetsen totten ghebede was van vijf cubitus int ronde.

12

Ende dat ghestichte dat afghesceyden was ende ghekeert tot den wech die ter zee waerts siet was van die breydde van tseuentich cubitus, maer den wandt des ghestichts was vijf cubitus in die breydde rontsomme, ende zijn lengde was neghentich cubitus.

13

⁺Ende hy heeft des huys lancheyt ghemeten, hondert cubitus, ende dat ghestichte dat afghesceyden was, ende zijn wanden hondert cubitus lengde,

+ C

14

maer die breydde voor daensicht des huys, ende des gheens datter verscheyden was teghen den oosten, was hondert cubitus.

15

Ende hy heeft ghemeten die lancheyt des ghestichts teghen sijn aensicht dat afghesceyden was aen dat achterste, die scatcameren van beyde die sijden van hondert cubitus, ende den binnensten tempel, ende die portalen des voorhoffs.

16

Die dorpels ende die cromme vensteren, ende die scadtcameren int ronde aen drij deelen, teghen elcs dorpel, ende ouertrocken met houte al om int ronde, maer die eerde was tot die vensteren ende die vensteren waren ghesloten op die doeren.

17

Ende tot dat binnenste huys ende van buyten, ouer alle den wandt rontsomme van binnen ende van buyten tot der maten.

18

Ende daer waren Cherubims ende palmboomen constelijck ghemaect, ⁺ende eenen palmboom was tusschen Cherub ende Cherub, ende eenen Cherub hadde twee aensichten.

+ D

19

Eens menschen aensicht bi den palmboom van dese sijde, ende eens leews aensicht neffens den palmboom van dander sijde wtghesneden ouer alle thuys int ronde,

20

vander eerden tot dat opperste der poorten waren Cherubims ende palmboomen wtghegroeft inden wandt des tempels.

21

Den viercanten dorpel, ende daensicht van die heylighe plaetse was aensicht teghen aensicht.

22

Die hoochde vanden houten outaer was van drij cubitus, ende zijn lengde was van twee cubitus ende sijn hoecken ende zijn lengde, ende zijn wanden waren van houte. Ende hy heeft tot my ghesproken dits die tafele voor den Heere.

23

Ende twee doeren waren inden tempel, ende in die alderheylichste plaetse.

24

Ende in die twee doeren van beyde die sijden waren twee doorkens die teghen malcanderen ghevouwen worden, want daer waren twee doeren aen beyde die sijden van die doeren.

25

Ende in die doeren des tempels waren ghesneden Cherubims, ende een ghesneden werck van palmboomen, alsoo die ooc in die wanden wtghesneden waren, waerom dat die houten ooc grooter waren in dat vorste deel des portaels van buyten,

26

waer op dat waren die cromme vensteren, ende die ghelijckenisse der palmboomen, aen deen ende dander sijde, aen die scouderkens des poortaels na die sijden des huys, ende die breydde der wanden.