Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlviij. Capittel.

1

⁺ENde dit zijn die namen der gheslachten van die noortpalen by den wech van Hethalon, alsmen gaet nae Emath dat voerhoff van Enan, die pale van Damascus, noortwaerts neffens den wech van Emath. Ende die zee sal haer wesen die oostsijde, Dan eene.

+ A

2

Ende aen die pale van Dan van die oostpale tot die sijde der zee, Aser eene.

3

Ende op die pale van Aser, van die oostsijde tot die zijde der zee, Nephthali eene.

4

Ende op die pale van Nephthali van die oostsijde tot die zijde der zee, Manasse eene.

5

Ende op die pale van Manasse, van die oostsijde, tot die zijde der zee, Ephraim eene.

6

Ende op die pale van Ephraim, van die oostzijde tot die sijde der zee, Ruben eene.

7

Ende op die pale van Ruben van die oostsijde tot die sijde der zee, Iuda een.

8

Ende op die pale van Iuda, van die oostsijde tot die sijde der zee sullen die ierstelinghen zijn die ghy wtsceyden sult, tot vijuentwintich duysent van breydde ende lengde, ghelijck elcke deelen besonder van die oostsijde tot die sijde der zee, ende die heylighe plaetse sal in haer midden wesen.

9

Die ierstelinghen die ghy den Heere wtsceyden sult, sullen wesen die lengde van vijuentwintich duysent, ende die breydde van thien duysent.

10

Ende dit sullen die ierstelinghen zijn der heyligher plaetse der priesteren, tot den noorden van lengden vijuentwintich duysent, ende tot die zee van lengden thien duysent. Maer oock ten oosten van breydden thien duysent, ⁺ende totten middach van lengden vijuentwintich duysent, ende die heylighe plaetse des Heeren sal int midden van haer wesen.

+ B

11

Den priesters sal die heylighe plaetse toebehooren, van Sadocs kinderen, die mijn ceremonien bewaert hebben, ende niet ghedoelt en hebben, als die kinderen van Israel doelden, ghelijck die Leuijten ooc ghedoelt hebben.

12

Ende die ierste gauen van die ierstelinghen des lants sullen hen lieden wesen theylich der heylighen, nae die pale der Leuiten.

13

Maer oock den Leuiten desghelijcs, nae die palen der priesters vijuentwintich duysent van lengden, ende van breydden thien duysent. Alle die lengde was van vijuentwintich duysent, ende die breydde van thien duysent.

14

Ende sij en sullen daer aff niet vercoopen, noch verwisselen, noch die ierstelinghen des lants en sullen niet ouerghesedt worden, want sij zijn den Heere gheheylicht.

15

Maer die vijf duysent die daer oueren in die breydde doer die vijuentwintich duysent sullen die ongeheylijchde plaetsen der stadt wesen tot een wooninghe, ende tot voersteden, ende die stadt sal wesen int midden van haer.

16

Ende dit zijn haer maten. Aen die nootsijde, vijfhondert, ende vier duysent, ende aen die suytsijde, vijfhondert ende vier duysent, ende aen die oostsijde, vijfhondert ende vier duysent, ende aen die westsijde vijfhondert ende vier duysent.

17

Ende die voersteden der stadt aen die noortsijde sullen zijn tweehondert, ende vijftich, ⁺ende ten suyden twee hondert vijftich, ende ten oosten twee hondert vijftich duysent, ende ter zee waerts, tweehondert vijftich.

+ C

18

Maer datter ouer is in die lengde nae dierste gauen der heyligher plaetsen thien duysent ten oosten, ende thien duysent ten westen, sullen wesen als dierste gauen der heyligher plaetsen, ende hen corenvruchten sullen wesen tot brooden den ghenen die de stadt dienen.

19

Ende die der stadt dienen die sullen wercken wt alle die gheslachten van Israel.

20

Alle die ierstelinghen van vijuentwintich duysent, by die vijuentwintich duysent int viercante sullen affghesceyden worden tot die ierste gauen der heyligher plaetsen, ende tot een besittinghe der stadt.

21

Maer datter ouerblijft, dat sal den prince toe behooren van alle die sijden der ierster gauen van die heylighe plaetse, ende tot een besittinghe der stadt teghen ouer die vijuentwintich duysent der ierster gauen, tot de oostpale. Ende oock aen die zee teghen ouer die vijuentwintich duysent tot die pale der zee, desghelijcs salt ooc in des princen deel wesen, ende tsullen der heyligher plaetsen ierster gauen wesen, ende die heylighe plaetse des tempels in zijn midden.

22

Maer vander Leuiten besittinghe, ende van die besittinghe der stadt int midden der deelen sal den prince toebehooren, tot die pale van Iuda, ende tot die pale van Beniamin, ende het sal den prince toebehooren.

23

Ende deu anderen gheslachten van die oostsijde, tot die westsijde Beniamin eene.

24

Ende teghen die pale van Beniamin van die oostsijde tot die westsijde Simeon eene.

25

⁺Ende op Simeons pale van die oostsijde tot die westsijde Issachar eene.

+ D

26

Ende op die pale van Issachar van die oostsijde tot die westsijde, Zabulon eene.

27

Ende op die pale van Zabulon van die oostsijde tot die sijde der zee, Gad eene.

28

Ende op die pale van Gad, tot die suytsijde suytwaerts, ende het eynde sal wesen van Thamar, tot die wateren des wedersegghens van Cades, die erffenisse teghen die groote zee.

29

Dit is dlant dat ghy ten lote sult stellen den gheslachten van Israel, ende dit zijn haer deylinghen seyt die Heere Godt.

30

Ende dit sijn die wtganghen der stadt. Van die noortsijde suldi meten vijfhondert, ende vier duysent.

31

Ende der stadt poorten alle den gheslachten van Israel, drij poorten vant noorden. Rubens poorte eene. Iudas poorte eene. Leuijs poorte eene.

32

Ende aen die oostsijde, vijfhondert ende vier duysent, ende drij poorten. Iosephs poorte eene. Beniamins poorte eene. Dans poorte eene.

33

Ende tot die suytsijde suldi meten vijfhondert ende vier duysent, Simeons poorte eene. Issachars poorte eene. Zabulons poorte eene.

34

Ende tot die westsijde, vijfhondert ende vier duysent, ende hen poorten drij, Gads poorte eene. Asers poorte eene, Nephthalijs poorte eene.

35

Int ronde achtien duysent, ende den naem der stadt van dien dach. Die Heere aldaer.

Hier eyndet die prophetie van Ezechiel.