Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxix. Capittel.

1

⁺MAer ghy sone des menschen propheteert teghen Gog, ende ghy sult segghen. Dit seydt die Heere Godt. Siet ick seg tot v Gog den prince des hoofts van Mosoch ende Thubal,

+ A

2

ende ick sal v omdraeyen, ende ick sal v verleyden, ende ick sal v doen op comen van die noortsijden, ende ick sal v brenghen op die berghen van Israel.

3

Ende ick sal uwen boghe slaen in v slincke hant, ende v pijlen sal ic wt v rechte hant nederworpen.

4

Op die berghen van Israel suldi vallen ghy ende alle v heyren ende v volcken die met v zijn, den wilden dieren, den voghelen ende allen gheuoghelte, ende den beesten der eerden heb ic v ghegheuen te verslinden.

5

⁺Op daensicht der eerden suldi vallen, want ict hebt ghesproken, seyt die Heere Godt.

+ B

6

Ende ick sal het vier seynden in Magog, ende in die ghene die betrouwelijck woonen in die eylanden, ende si sullen weten dat ick die Heere ben.

7

Ende mijnen heylighen naem sal ick bekent maken int midden mijns volcs Israel, ende ick en sal mijnen heylighen naem niet meer besmetten, ende die Heydenen sullen weten dat ic die Heere die heylighe van Israel ben.

8

Siet het coemt, ende tis ghedaen seyt die Heere God Dits den dach waer aff dat ick ghesproken hebbe.

9

Ende die bewoonders sullen wtgaen wt die steden van Israel, ende si sullen ontsteken ende verbranden die wapenen, den scilden, ende die lancien, ⁺den boghe ende die pijlen, ende die hantstocken, ende die spiessen, ende si sullen die metten viere verbranden seuen iaren,

+ C

10

ende si en sullen gheen houten brenghen van die landen, noch affhouwen van die bosschen, want si sullen die wapenen metten viere verbranden, ende si sullen beroouen die ghene dien si ten rooue gheweest hadden, ende si sullen hen verderuers beroouen, seyt die Heere God.

11

Ende tsal wesen in dien dach, dat ick Gog sal gheuen een vermaerde plaetse tot een graf in Israel, die valleye der wandelaers aen die oostsijde der zee, dwelck sal doen verwonderen die voorby ganghers, ende si sullen Gog daer begrauen ende alle zijn menichte, ende tsal ghenoemt worden die valleye der menichte van Gog.

[p. *665]

12

⁺Ende thuys van Israhel salse begrauen, dat si dlant souden suyueren seuen maenden.

+ D

13

Ende alle tvolc der eerden sal hem begrauen, ende tsal hen eenen vermaerden dach wesen, inden welcken ick gheglorificeert ben, seyt die Heere Godt.

14

Ende si sullen altijt mannen stellen diet dlant doorsoeckende die begrauen sullen ende versoecken die ghene die daer ghebleuen waren op daensicht der eerden, om die te suyueren, ende nae seuen maenden sullen si beghinnen te soecken.

15

Ende si sullen ommegaen het lant doorwandelende, ende als si eens menschen ghebeente sien sullen, soo sullen si dat stellen by eenen tijtel tot dat die begrauers dat begrauen sullen in die valleye van Gogs menichte,

16

Maer den naem vander stadt is Amona, ende si sullen dlant suyueren.

17

Daerom ghy sone des menschen, dit seyt die Heere Godt. Segt allen gheuoghelte, ende alle den voghelen, ⁺ende alle den beesten des velts. Verghadert v, haest v, loopt te samen van allen sijden, tot mijn slachofferande die ick v ten offer doode, een groot slachofferande op die berghen van Israhel, dat ghy moecht vleesch eten, ende bloet drincken.

+ E

18

Der stercker vleesch suldi eten, ende dbloet van die princen der eerden suldi drincken, der rammen, der lammeren, ende der bocken, ende der stieren, ende der ghemester beesten ende alderhande vette dieren.

19

Ende ghy sult het vet des inghewants eten tot versaetheyt, ende ghy sult dbloet drincken tot dronckenheyt, van die slachofferande die ick v lieden ten offer dooden sal,

20

ende ghy sult versaedt worden op mijn tafel, vanden peerde, ende vanden stercken ruyter te peerde, ende van alle die orloochs mannen, seyt die Heere Godt,

21

ende ick sal mijn glorie stellen in die Heydenen, ⁺ende alle die Heydenen sullen mijn ordeel sien dat ick sal ghedaen hebben, ende mijn handt die ick op hen sal gheleydt hebben.

+ F

22

Ende thuys van Israel sal weten dat ic die Heere hen Godt ben van dien dach ende voortaen.

23

Ende die Heydenen sullen weten dat het huys van Israel in zijn boosheyt gheuanghen is, om dat si my verlaten hebben, ende dat ic mijn aensicht van hen gheborghen hebbe, ende dat icse gheleuert hebbe in die handen der vianden, ende dat sij allegader metten sweerde gheuallen zijn,

24

Nae hen onsuyuerheyt, ende nae hen groot misdaet heb ic hen ghedaen, ende ick heb mijn aensicht van hen gheborghen.

25

Daerom dit seyt die Heere God. Nv sal ick die gheuanghenisse van Iacob wederom leyden, ende ick sal ontfermen des gheheels huys van Israel, ⁺ende ick sal mijn gramme liefde aen nemen voor mijnen heyligen naem.

+ G

26

Ende si sullen hen bescaemtheyt draghen, ende alle die ouertredinghe waer mede si ouertreden hebben teghen my, als si in hen lant sullen ghewoont hebben betrouwelijck niemant vreesende.

27

Ende dat icse sal wederom gheleydt hebben van die volcken, ende vergadert van haerder vianden landen, ende dat ick sal gheheylicht zijn in henlieden, in die ooghen van veel Heydenen.

28

Ende si sullen weten dat ick die Heere hen Godt ben, om dat icse sal ouergheuoert hebben onder die natien, ende dat icse sal vergadert hebben op hen lant, ende dat ick niemanden van henlieden daer ghelaten en hebbe.

29

Ende ic en sal mijn aensicht niet meer van hen verberghen, om dat ick mijnen gheest sal wtghestort hebben op tgheheel huys van Israel seyt die Heere Godt.