Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxviij. Capittel.

1

⁺ENde des Heeren woort is tot my gheschiet segghende.

+ A

2

Sone des menschen stelt v aensicht teghen Gog ende dlant van Magog, den prince des hoofts van Mosoch ende Tubal ende propheteert van hen,

3

ende ghy sult tot hen segghen. Dit seydt die Heere Godt. Siet ick segghe v Gog den prince des hoofts van Mosoch ende Thubal,

4

ende ick sal v omdraeyen, ende ick sal eenen breydel stellen in v kinnebacken, ende ick sal v wtleyden ende alle v heyr, die peerden ende ruyters te peerde alle ghecleedt met pansieren, een groote menichte, spiessen ende scilden, ende sweerden aengrijpende,

5

die Persen Morianen, ⁺ende Lybianen met hen alle ghewapent met scilden ende helmen,

+ B

6

Gomer ende alle zijn hoopen, Thuys van Thogorma die sijden vanden noorden, ende alle haer macht, ende veel volcken met v.

7

Bereyt ende beschict v, ende alle v menichte die tot v ghehoopt is, ende weest hen tot een ghebodt.

8

Nae veel daghen suldy versocht worden, int wterste der iaren suldy totten lande comen, dat wederghekeert is vanden sweerde, ende vergadert is van veel volcken, tot die berghen van Israel, die eenpaerlijck verwoest hebben gheweest. Dit lant is vanden volcken wtghebrocht, ende si sullen allegader daer betrouwelijc in woonen.

9

Ende ghy sult opclimmende als een tempeest comen, ⁺ende als een wolcke, dat ghy die eerde soudt ouerdecken, ghy ende alle uwe scaren, ende veel volcken met v.

+ C

10

Dit seyt die Heere Godt. In dien dach sullen die woorden op v hert comen, ende ghy sult dalder quaetste ghedachte dencken,

11

ende ghy sult segghen. Ick sal opclimmen totten lande sonder muer, ick sal comen tot die rustende, ende sonder vreese woonende. Dese woonen alle sonder muer, si en hebben gheen grendelen oft poorten,

12

om dat ghy die bueten soudt roouen, ende den roof aengrijpen om dat ghi v handen brenghen soudt op die ghene die verwoest waren gheweest, ⁺ende namaels tot haren iersten staet weder ghestelt, ende ouer tvolck dat verghadert is wt den Heydenen, dat heeft begonnen te besitten ende te wesen een bewoonder vanden nauel der eerden,

+ D

13

Saba ende Dedan, ende die coopluyden van Tharsis, ende allen hen leeuwen sullen v segghen. Coemde ghy om die roouen te nemen? siet om den roof te roouen hebdi v menichte vergadert, dat ghy nemen soudt siluer ende gout, ende wechdragen huysraet ende rijcdom, ende dat ghy ontallijcke roouen soudt roouen.

14

Daerom propheteert sone des menschen, ende ghi sult segghen tot Gog. Dit seyt die Heere Godt. ⁺En suldijt niet weten op dien dach als mijn volck Israel betrouwelijck woonen sal?

+ E

15

ende ghi sult van v plaetse comen van die sijden vanden noorden, ghy ende veel volcken met v allegader beclimmers der peerden, een groote verghaderinghe ende een crachtich heyr.

16

Ende ghy sult op mijn volck Israel climmen als een wolcke, dat ghy dlant ouerdecken soudt. In die wterste daghen suldi zijn, ende ick sal v brenghen op mijn lant, op dat die Heydenen my kennen moghen, als ick in v sal gheheylicht worden in hen ooghen o Gog.

17

Dit seyt die Heere Godt. Sijdi dan die ghene van wien ick ghesproken hebbe in die oude daghen, in die hant van mijnen knechten die propheten van Israel, ⁺die ghepropheteert hebben in die daghen van dien tijden, op dat ick v op hen brenghen soude?

+ F

18

Ende tsal wesen in dien dach, inden dach van Gogs aencoemste op dlant van Israel, seydt die Heere Godt, dat mijn verbolghentheyt opclimmen sal in mijn rasende gramscap

19

Ende in mijnen heeten torn, ende int vier van mijnder gramscappen heb ict ghesproken, want in dien dach sal een groote beroerte wesen op dlant van Israel,

20

ende van mijn aensicht sullen beroert worden die visschen der zee, ende die voghelen des hemels, ende die beesten des velts, ende alle cruypende ghedierte, dat op deerde beroert wort, ende alle die menschen die op daensicht der eerden sijn, ⁺ende die berghen sullen omgheworpen werden, ende die thuynen sullen vallen, ende alle muer sal nedervallen op deerde.

+ G

21

Ende ic sal teghen hem te samen roepen op alle mijn berghen dat sweert seyt die Heere Godt, eens ieghelijcs sweert sal in sijnen broeder ghestiert worden.

22

Ende ick sal hem ordeelen metter pestilencie ende met bloede, ende met eenen crachtighen slachreghen, ende met onmetelijcke hagelsteenen, vier ende solpher sal ick reghenen op hem, ende op zijn heyr, ende op veel volcken die met hem zijn.

23

Ende ick sal groot ghemaect ende gheheylicht worden, ende ick sal bekent worden in die ooghen van veel Heydenen, ende si sullen weten dat ick die Heere ben.