Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxvij. Capittel.

1

⁺DIe hant des Heeren is op my gheworden ende heeft my wtgheleydt inden gheest des Heeren. Ende hi heeft my ghelaten int midden des velts, dwelck was vol beenderen.

+ A

2

Ende hy heeft my daerom gheleydt int ronde, ende daer wasser seer vele op daensicht des velts ende seer drooge.

3

Ende hy heeft tot my gheseyt. Sone des menschen meyndy ooc dat dese beenderen leuen sullen? Ende ic heb gheseyt. Heere God ghy wetet.

4

Ende hy heeft tot my geseyt. Propheteert van desen beenderen, ende ghi sult hen segghen. Ghi drooge beenderen hoort des Heeren woort.

5

Dit seyt die Heere Godt tot desen beenderen. Siet ick sal den gheest in v senden, ende ghy sult leuen.

6

Ende ic sal ouer v zenuen gheuen, ende ic sal op v doen vleesch wassen, ende ick sal ouer v trecken een huyt, ende ick sal v eenen gheest gheuen ende ghy sult leuen, ende ghy sult weten dat ick die Heere ben.

7

⁺Ende ick heb ghepropheteert alsoo hy my gheboden hadde, ende daer is een gheluyt ghesciet, die wijle dat ick propheteerde, ende siet daer ghesciede een beroeringhe, ende die beenderen ghinghen aen beenderen, een ieghelijc aen zijn ledt,

+ B

8

Ende ic heb ghesien, ende siet ouer die zijn zenuen, ende vleesch op ghecomen, ende op hen is een huyt ghespreyt, ende si en hadden gheenen gheest.

9

Ende hy heeft tot my gheseyt. Propheteert totten gheest, Propheteert sone des menschen, ende ghy sult totten gheest segghen. Dit seyt die Heere Godt. Van die vier winden coemt gheest, ende blaest in op dese verslaghene, ende laetse weder leuende worden,

10

Ende ic heb ghepropheteert, gelijc hy my gheboden hadde, ende den gheest is daer in ghegaen, ende si hebben gheleeft, ende ghestaen op hen voeten, een heyr wtermaten seer groot,

11

⁺Ende hy heeft tot my gheseydt. Sone den menschen alle dese beenderen, is thuys van Israel, si segghen. Onse beenderen zijn verdroocht, ende onse hope is vergaen, ende wij zijn affghesneden.

+ C

12

Daerom propheteert ende ghy sult tot hen segghen. Dit seyt die Heere Godt. Siet ick sal v grauen open doen, ende v leyden wt uwe grauen mijn volck, ende ick sal v leyden int lant van Israhel.

13

Ende ghy sult weten dat ick die Heere ben, als ick uwe grauen sal open ghedaen hebben, ende v sal wtgheleyt hebben wt uwe grauen mijn volck.

14

Ende als ick mijnen gheest in v sal ghegheuen hebben, ende dat ghy leuen sult, ende ick sal v doen rusten op v eerde, ⁺ende ghy sult weten dat ict die Heere ghesproken hebbe, ende ghedaen, seydt die Heere Godt.

+ D

15

Ende des Heeren woort is tot my ghesciet segghende.

16

Ende ghy sone des menschen, neemt voor v een houdt, ende schrijft daer op Iude ende der kinderen van Israel zijnder ghesellen, ende neemt een ander houdt, ende scrijft daer op Ioseph het houdt van Ephraim ende alle des huys van Israel ende zijnder ghesellen.

17

Ende voecht die te samen het eene aen dandere voor v tot eenen houte, ende si sullen tot een vereeninghe wesen in v hant.

18

Maer als tot v sullen gheseyt hebben die kinderen ws volcs sprekende. En gheefdy ons niet te kennen wat ghy v hier mede wilt?

19

soo suldi tot hen spreken. Dit seydt die Heere Godt. ⁺Siet ick sal tot my nemen Iosephs houdt, dwelck in Ephraims hant is, ende die gheslachten van Israel die aen hem gheuoecht zijn, ende ick sal die te samen gheuen metten houte van Iuda, ende ick sal die maken tot eenen houte, ende si sullen een wesen in zijn hant.

+ E

20

Ende die houten daer ghy op ghescreuen hebt sullen in v hant wesen, voor hen ooghen.

21

Ende ghy sult tot hen segghen. Dit seyt die Heere God. Siet ick sal die kinderen van Israel tot my nemen wt dat midden der natien daer si toe wech ghegaen sijn, ende ic sal hen van alle sijden vergaderen, ende ic salse brenghen tot hen eerde.

22

Ende ick salse maken tot een volck, int lant op die berghen van Israel, ende een coninc sal ouer hen allen heerscappie hebben. Ende ten sullen voorts gheen twee volcken zijn, ⁺noch si en sullen niet meer ghedeelt worden in twee rijcken.

+ F

23

Noch si en sullen voorts niet meer besmedt worden in hen affgoden, ende in hen affgrijselijcheden ende alle boosheden, ende ick salse behouden van allen hen plaetsen in die welcke si ghesondicht hebben, ende ick salse suyueren, ende si sullen my wesen een volck, ende ick sal hen een Godt wesen.

24

Ende mijn knecht Dauid sal een coninck ouer hen sijn, ende een herder van hen allen. In mijn ordeelen sullen si wandelen, ende mijn gheboden sullen si bewaren, ende die doen.

25

Ende si sullen op dlant woonen dat ick mijnen dienaer Iacob ghegheuen hebbe, daer uwe vaderen in ghewoont hebben, ende si sullen daer op woonen, si ende hen kinderen, ende haerder kinder kinderen, tot inder eewicheyt, ende Dauid mijnen dienaer sal hen prince zijn inder eewicheyt.

26

⁺Ende ic sal hen vast maken dat verbont des vreedts, een eewich verbont sal hen wesen, ende ick salse funderen ende vermenichfuldighen, ende ick sal mijn heylichmakinghe gheuen int midden van hen inder eewicheyt.

+ G

27

Ende mijn tabernakel sal

[p. *664]

in henlieden wesen, ende ick sal hen Godt wesen ende si sullen mijn volck zijn.

28

Ende die Heydenen sullen weten dat ick die Heere die heylichmaker ben, als mijn heylichmakinghe zijn sal int midden van hen inder eewicheyt.