Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxvi. Capittel.

1

⁺MAer ghy sone des menschen propheteert op die berghen van Israel, ende ghy sult segghen. Ghy berghen van Israel hoort des Heeren woort.

+ A

2

Dit seyt die Heere Godt. Om dat die viant van v lieden gheseyt heeft. Ey wel ghedaen, die eewighe hoochden zijn ons tot een erffenisse ghegeuen,

3

daerom propheteert ende segt. Dit seyt die Heere God. Om dat ghy verwoest zijt, ende vertreden rontsomme, ende gheworden tot een erffenisse den anderen volcken, ende zijt opghecomen op die lippe der tonghen, ende tverwijt des volcs,

4

daerom ghi berghen van Israel hoort des Heeren des Gods woort. Dit seyt die Heere God den berghen ende hueuelen, den beken ende valleyen, den verwoesten ende den veruallen wanden, ende den verlaten steden, die berooft zijn ende bescimpt van die ander Heydenen int ronde.

5

Daerom dit seydt die Heere Godt. Want ick door tvier van mijnder heeter gramscappen ghesproken hebbe van die ander Heydenen, ⁺ende van gheheel Idumeen lant die mijn lant voor hen seluen ghegheuen hebben tot een erffenisse met blijscappen wt gheheelder herten, ende wter meyninghen, ende sij hebbense wtgheworpen dat sijse verderuen souden,

+ B

6

daerom propheteert ouer dlant van Israel, ende ghy sult segghen den berghen, ende hueuelen, den hoochden ende valleyen. Dit seyt die die Heere Godt. Siet ick heb ghesproken in mijnen grammen torn ende in mijn rasende gramscappe, om dat ghi die bescaemtheyt der Heydenen gheleden hebt

7

Daerom dit seyt die Heere God. Ic heb mijn hant opghehauen dat die Heydenen die rontsomme v sijn selue hen bescaemtheyt draghen souden,

8

maer ghy berghen van Israel spruyt wt v tacken, ende brengt v vruchten voorts mijnen volcke Israel, want het is by dattet come,

9

want siet ic tot v lieden, ende ick sal tot v bekeert worden, ende ghy sult gheackert worden ende sult saet ontfanghen.

10

⁺Ende ick sal in v die menschen vermenichfuldighen, ende alle thuys van Israel, ende die steden sullen bewoont worden, ende die veruallen plaetsen sullen weder opghetimmert worden.

+ C

11

Ende ick sal v veruullen met menschen ende vee, ende die sullen vermenichfuldicht worden ende wassen, ende ick sal v doen woonen als van tbeghinsel, ende ic sal v met meerder goeden begauen dan ghy van tbeghinsel ghehadt hebt, ende ghy sult weten dat ick die Heere ben.

12

Ende ick sal menschen op v brenghen, mijn volck Israel, ende sij sullen v tot een erffenisse besitten, ende ghy sult tot een erffenisse wesen, ende ghy en sult voorts niet meer daer toe doen dat ghy sonder hen soudt zijn.

13

Dit seyt die Heere Godt, om dat sij van v lieden segghen. Ghy zijt een verslinstere der menschen, ende v volck versmachtende,

14

daerom en suldi voorts niet meer menschen eten, ende v volck en suldy voorts niet meer dooden, seyt die Heere Godt.

15

Noch ick en sal in v niet meer laten hooren die versmaetheyt den Heydenen, ⁺ende tverwijt der volcken en suldi gheensins draghen, ende v volck en suldi niet meer verliesen, seyt die Heere Godt.

+ D

16

Ende des Heeren woort is tot my ghesciet segghende.

17

Sone des menschen. Het huys van Israel heeft ghewoont in zijn lant, ende sij hebben dat besmet in hen weghen, ende met hen wercken, ghelijc die onreynicheyt der maensuchtigher vrouwen is haerlieder wech gheworden voor my.

18

Ende ick heb mijn verbolghentheyt wtghestort op henlieden om dbloet dat si ghestort hebben op deerde, ende in hen afgoden hebben si die besmedt,

19

ende ick hebse verstroeyt onder die Heydenen, ende si zijn verwaeyt in die landen nae hen weghen, ende nae hen vonden heb icse gheordeelt.

20

Ende si zijn inghegaen tot die Heydenen tot die welcke si inghegaen zijn, ende si hebben mijnen heylighen naem besmet, als van hen gheseyt worde. Dit is des Heeren volc, ende wt sijnen lande zijn si ghegaen

21

Ende ick heb mijnen heylighen naem ghespaert, den welcken thuys van Israel besmedt hadde onder die Heydenen, totten welcken si in ghegaen waren.

22

⁺Daerom suldi den huyse van Israel segghen. Dit seyt die Heere Godt. Ick en sals om uwen wille niet doen, huys van Israel, maer om mijnen heylighen naem dien ghy besmedt hebt onder die Heydenen, tot die welcke ghy inghegaen zijt.

+ E

23

Ende ick sal mijnen grooten naem heylighen, die onder die Heydenen besmet is, dien ghi besmet hebt int midden van haer, op dat die Heydenen moghen weten dat ic die Heere ben seyt die Heere der heyrscaren, als ick gheheylicht sal wesen in v lieden voor hen,

24

want ick sal v nemen van die Heydenen, ende ick sal v verghaderen van alle die landen, ende ick sal v leyden in v landt.

25

Ende ick sal op v wtstorten suyuer water, ende ghy sult ghesuyuert worden van allen uwe besmettinghen, ende van allen uwe affgoden sal ick v suyueren.

26

Ende ick sal v een nieuwe herte gheuen, ende eenen nieuwen gheest sal ick stellen int midden van v lieden, ende ick sal dat versteent herte van uwen vleesche nemen, ende gheuen v een vlees-

[p. *663]

achtich herte.

27

⁺Ende mijnen gheest sal ick int midden van v lieden stellen, ende ick sal maken dat ghy in mijn gheboden sult wandelen, ende dat ghy mijn ordeelen sult houden, ende doen.

+ F

28

Ende ghy sult woonen in dlant dat ick uwen vaderen ghegheuen hebbe, ende ghy sult my wesen tot een volck, ende ick sal v lieden tot eenen Godt zijn.

29

Ende ic sal v verlossen van alle uwe besmettinghen. Ende ick sal die terwe roepen, ende ick salse vermenichfuldighen, ende ick sal v gheenen hongher op legghen.

30

Ende ic en sal die vrucht der boomen vermenichfuldighen, ende dat groeytsel des velts, op dat ghy tverwijdt des honghers niet meer en draecht onder die Heydenen.

31

Ende ghi sult ghedachtich wesen uwer alderquaetster weghen, ende der wercken die niet goet en zijn, ende v boosheden ende v groote misdaden sullen v mishaghen.

32

Ick en salt om uwen wille niet doen, seyt die Heere Godt, dat si v bekent, Wert bescaemt, ende scaemt v ouer v weghen ghy huys van Israhel.

33

Dit seydt die Heere Godt, opden dach als ick v sal ghesuyuert hebben, ⁺van allen uwen boosheden, ende dat ic die steden sal doen bewoonen, ende dat ick die veruallinghen sal weder op ghetimmert hebben,

+ G

34

ende dat het verwoest lant gheoeffent sal wesen, dat wijlen verwoest was in die ooghen van alle wandelaer,

35

soo sullen si segghen. Dat ongeoeffent lant is gheworden als eenen hoff der wellusticheden, ende die verwoeste ende verlaten ende omghegrauen steden hebben vast besloten gheseten,

36

ende die Heydenen alle die achter ghebleuen sullen wesen rontsomme v, sullen weten dat ick die Heere die verdoruen steden opghetimmert hebbe, ende die ongheoeffende plaetsen beplant, dat ict die Heere ghesproken hebbe ende ghedaen.

37

Dit seyt die Heere Godt. Noch sal dat huys van Israel my daer in vinden dat ict hen doen sal. Ick salse vermenichfuldighen als een cudde der menschen,

38

als een heylich cudde als Iherusalems cudde in zijn hooch feesten. Alsoo sullen die verlaten steden wesen vol cudden der menschen, ende si sullen weten dat ic die Heere ben.