Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxv. Capittel.

1

⁺ENde des Heeren woort is tot my gheschiet segghende.

+ A

2

Sone des menschen stelt v aensicht teghen den berch van Seir, ende ghy sult

[p. *662]

van hem propheteeren, ende hem segghen.

3

Dit seyt die Heere Godt. Siet ick tot v ghy berch van Seir, ende ick sal mijn hant wtsteken ouer v, ende ick sal v maken verlaten ende verwoest,

4

v steden sal ick verderuen ende ghy sult verwoest wesen, ende ghy sult weten dat ic die Heere ben.

5

Om dat ghy een eewich viant sijt gheweest, ende dat ghy die kinderen van Israel besloten hebt in die handen des sweerts, ⁺inden tijt van hen tribulatie inden tijt der wterster boosheyt.

+ B

6

Daerom soo warachtelijc als ic leue, seyt die Heere God, soo sal ic v den bloede leueren, ende het bloet sal v veruolghen, ende als ghi tbloet hatet, so sal dbloet v veruolghen.

7

Ende ic sal den berch van Seir gheuen verwoest ende verlaten ende ick sal van hem wech nemen den gaenden ende den wedercomenden.

8

Ende ick sal zijn berghen veruvllen met sijnen verslaghenen, op v hueuelen, ende in v valleyen, ende in die beken sullen die verslaghene metten sweerde vallen.

9

⁺Tot eewighe woestijnen sal ick v leueren ende v steden en sullen niet bewoont worden, ende ghy sult weten dat ick die Heere Godt ben,

+ C

10

om dat ghy gheseyt hebt. Twee volcken, ende twee landen sullen mijne zijn, ende ick salse ter erffenissen besitten, als die Heere daer was.

11

Daerom soo warachtelijck als ick leue seyt die Heere Godt, soo sal ick doen nae uwe gramscap, ende nae v nijdicheyt die ghy ghedaen hebt henlieden hatende, ende ick sal door hen bekent werden als ic v sal gheordeelt hebben.

12

Ende ghy sult weten dat ic die Heere alle uwe scimpernien ghehoort hebbe die ghy ghesproken hebt van die berghen van Israel segghende. ⁺Sij zijn verlaten, si zijn ons ghegeuen om te verslinden.

+ D

13

Ende ghy zijt opghestaen ouer my met uwen mont, ende ghy hebt v woorden tot lasteringhe ghesproken teghen my, ic hebt ghehoort.

14

Dit seyt die Heere God. Als alle dlant blijde wesen sal, so sal ick v tot een woestijne maken.

15

Ghelijc ghy v verblijt hebt ouer die erffelijcheyt des huys van Israel om dat verdoruen is, alsoo sal ick v doen, ghy sult verdoruen wesen ghy berch van Seir, ende gheheel Idumeen lant, ende sij sullen weten dat ick die Heere ben.