Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxiiij. Capittel.

1

⁺ENde des Heeren woort is tot my ghesciet, segghende

+ A

2

Sone des menschen, propheteert van die herders van Israel, propheteert ende ghy sult den herders segghen. Dit seydt die Heere Godt. Wee den herders van Israhel die hen seluen voedden, en worden die cudden van die herders niet gheuoedt?

3

Het melc aedt ghy, ende met die wolle werde ghy ghecleedt, ende dat vet was, dat doodde ghy maer mijn cudde en voede ghy niet.

4

Dat cranc was en hebdy niet versterct, ende dat sieck was en hebdi niet ghenesen, dat ghebroken was en hebdy niet verbonden, ende dat verworpen was en hebdi niet wederom ghebracht, ende dat verloren was en hebdi niet ghesocht, maer met strafficheyt hadde heerscappie ouer hen, ⁺ende met macht.

+ B

5

Ende mijn scapen zijn verstroeyt, om datter gheen herder en was, ende si sijn gheworden tot verslinden alle den beesten des velts, ende sij zijn verstroeyt gheworden.

6

Mijn cudden hebben ghedwaelt op alle berghen, ende op alle hooghe hueuelen, ende ouer alle daensicht der eerden zijn mijn cudden verstroeyt, ende daer en was niemant diese versochte, daer en was (seg ick) niemant diese versochte.

7

Daerom ghy herders hoort des Heeren woort.

8

Ick leue seyt die Heere Godt, want om dat mijn cudden gheworden sijn tot eenen rooue, ende mijn scapen tot verslinden allen den beesten des velts, om datter gheen herder en was (want mijn herders en hebben mijn cudde niet versocht, maer die herders voedden hen seluen, ⁺ende mijn cudden en voedden sij niet).

+ C

9

Daerom ghy herders hoort des Heeren woort.

10

Dit seydt die Heere God. Siet ick selue ouer die herders sal mijn cudde versoecken van hen handen, ende ick salse doen ophouden dat sij voortaen het cudde niet meer voeden en sullen, ende dat die herders hen seluen niet meer voeden en sullen, ende ick sal mijn cudde verlossen wt haren monde, ende ten sal henlieden niet meer tot een spijse wesen,

11

want dit seyt die Heere God. Siet ick sal selue mijn scapen versoecken, ende ick salse besoecken

12

ghelijck een herder zijn cudde besoect inden dach als hy is int midden van sijnen verstroeydden scapen, alsoo sal ick mijn scapen besoecken, ende ick salse verlossen van alle die plaetsen in die welcke si verstroeyt waren, inden dach der wolcke ende der duysterheyt.

13

⁺Ende ick salse wtleyden van die volcken, ende ick salse vergaderen van die landen, ende ick salse inleyden in hen lant, ende ick salse voeden op die berghen van Israel, in die rivieren ende in alle die woonsteden der eerden,

+ D

14

In die alder oueruloedichste weyden sal icse voeden, ende op die hooghe berghen van Israel sullen hen weyden wesen, daer sullen sij rusten in die groene cruyden, ende in vette weyden sullen si geuoedt worden op die berghen van Israel.

15

Ick sal mijn schapen voeden, ende ick salse doen rusten, seyt die Heere Godt.

16

Dat verloren was sal ick wederom soecken, ende dat verworpen was sal ick wederom brenghen, ende dat ghebroken was sal ick verbinden, ende dat cranc was sal ick sterck maken ende dat vet ende sterck is sal ick bewaren, ende ick salse voeden met ordeel.

17

Maer ghi mijn cudden dit seydt die Heere Godt. ⁺Siet ick ordeele tusschen vee ende vee der rammen ende der bocken.

+ E

18

En waert v lieden niet ghenoech die goede weyden aff te weyden? daer bouen hebdi die bleuelinghen van uwer weyden vertreden met uwen voeten, ende als ghy dalder puerste water dronct, soo hebdi dander met uwen voeten turbel ghemaect

19

Ende mijn scapen weydden van tghene dat met uwen voeten vertreden was, ende dat v voeten turbel ghemaect hadden dat droncken si,

20

daerom dit sey die Heere God tot v lieden. Siet ic ordeele selue tusschen vet ende magher vee,

21

om dat ghi metten sijden ende scouderen stietet, ende dat ghy met uwen hornen opwierpt alle dat cranck vee, tot dat sij buyten verstroyt worden,

22

soo sal ic mijn cudde behouden, ende ten sal voorts niet meer wesen tot eenen rooue, ende ick sal ordeelen tusschen vee ende vee.

23

⁺Ende ick sal op hen verwecken eenen herder diese voede, Dauid mijnen knecht, hisalse weyden, ende hy sal hen wesen tot eenen herder.

+ F

24

Ende ick die Heere sal hen wesen tot eenen God, ende mijn knecht Dauid een prince int midden van hen, ick die Heere hebt ghesproken.

25

Ende ick sal met hen maken tverbont des vreedts, ende ick sal dalderquaetste beesten doen ophouden vander eerden, ende die in die woestijne woonen sullen vrijlijck slapen in die bosschen.

26

Ende ick salse stellen rontsomme van mijnen hueuele tot een benedictie, ende ick sal eenen reghen neder brenghen in sijnen tijt, het sullen reghenen der ghebenedijdinghen wesen.

27

Ende thout des velts sal zijn vrucht gheuen, ende die eerde sal haer spruytsel gheuen, ende sij sullen in hen lant wesen sonder vreese, ende sij sullen weten dat ick die Heere ben, ⁺als ick die ketenen van hen iock sal in stucken ghebroken hebben, ende hen verlost sal hebben van die hant der gheender die heerscappie ouer hen hebben.

+ G

28

Ende si en sullen niet meer tot eenen rooue wesen den Heydenen, noch die beesten des lants en sullen hen niet verslinden, maer si sullen met betrouwen woonen sonder eenighe veruaertheyt.

29

Ende ick sal hen verwecken dat ghenoemt spruytsel, ende si en sullen voortaen niet meer vermindert wesen van honger op deerde, noch sij en sullen voortaen niet meer tverwijt der Heydenen draghen.

30

Ende sij sullen weten dat ick die Heere hen Godt met hen ben, ende sij mijn volck het huys van Israel, seydt die Heere Godt.

31

Ende ghy mijn cudden, die cudden mijnder weyden sijt menschen, ende ick die Heere v lieder Godt, seyt die Heere Godt.