Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxij. Capittel.

1

⁺ENde tis gheschiet int twaelfste iaer in die twaelfste maent in den iersten dach der maent, dat het woert des Heeren tot my ghesciedt is segghende.

+ A

2

Sone des menschen neemt aen een beclaghinde op Pharao den coninck van Egypten, ende ghy sult tot hem segghen. Den leuw der Heydenen sijdi ghelijck gheworden, ende den draeck die in die zee is, ende ghi waeydet metten horn in v vloeden, ende ghy verstoordet die wateren met uwen voeten, ende ghi vertreddet haer vloeden.

3

Daerom dit seyt die Heere Godt. Ic sal ouer v mijn net strecken in die menichte van veel volcken, ende ick sal v wt trecken met mijn groot vischnet

4

ende ic sal v op dlant worpen, op daensicht des ackers sal ic v wechworpen, ende ic sal alle die voghelen des hemels op v doen woonen, ⁺ende ic sal van v versaden alle die beesten der eerden,

+ B

5

ende ick sal v vleesch gheuen op die bergen, ende ic sal die hueuelen veruullen met uwen ettere.

6

Ende ick sal die eerde nat maken metten stanck van uwen bloede op die berghen, ende die valleyen sullen van v veruult worden.

7

Ende als ghi ghedoot sijt soo sal ick die hemelen ouerdecken, ende ick sal haer sterren doen swert worden, die sonne sal ick met een wolcke bedecken, ende die mane en sal haer licht niet gheuen.

8

Alle die lichten des hemels sal ick doen trueren ouer v, ende ick sal duysternisse gheuen op v lant seyt die Heere Godt,

9

Ende ick sal therte van veel volcken creyten, als ick uwe vernielinghe sal ghebracht hebben in die Heydenen ouer die landen die ghi niet en weet.

10

⁺Ende ick sal veel volcken seer doen verwonderen ouer v ende hen coninghen sullen met wtermaten seer grooten grouwel vreesen ouer v, als mijn sweert sal beghinnen te vlieghen op hen aensichten, ende sij sullen elck haestelijck verbaest worden voer hen ziele in den dach van haren val.

+ C

11

Want dit seyt die Heere Godt, Des conincs van Babilonien sweert sal v comen,

12

met die sweerden van die stercke sal ick v menichte ter neder werpen, alle dese volcken zijn onverwinnelijck, ende sij sullen die houerdie van Egypten verderuen, ende haer menichte sal verstroyt worden.

13

Ende ick sal vernielen allen hen beesten die daer waren op veel wateren, ende den voet des menschen en salse voertaen niet meer verstooren, noch der beesten clauwe en salse niet meer turbel maken.

14

⁺Dan sal ick hen wateren seer puer maken, ende hen vloeden sal ick als olie aenbrenghen, seyt die Heere Godt,

+ D

15

Als ick dlant van Egypten sal woest ghemaect hebben, ende dlant sal verwoest worden van zijn volheyt, als ick alle hen bewoonders sal gheslaghen hebben, ende sij sullen weten dat ick die Heere ben.

16

Het is een bescreyinghe, ende sij zullen hem bescreyen, die dochteren der Heydenen sullen hem bescreyen, ouer Egypten, ende ouer zijn menichte sullen sij hem bescreyen seyt die Heere Godt,

17

Ende tis ghesciedt int twaelfste iaer, in den vijfthiensten dach der maent, dat het woert des Heeren is ghesciet tot my segghende,

18

Sone des menschen. Singt een druckelijck claghende liedeken ouer die menichte van Egypten, ende trect die selue neder, ende die dochteren der machtigher volcken totten wtersten lande met die ghene die inden poel nederdalen.

19

⁺Hoe dat ghy schoonder zijt? daelt neder, ende slaept metten onbesnedenen.

+ E

20

Int midden vanden onbesnedenen sullen sij metten sweerde vallen, tsweert is ghegheuen, sij hebben haer aenghetrocken ende alle haer volcken.

21

Die machtichste van die vrome sullen tot haer spreken wt dat midden der hellen, di met haren helpers nederghedaelt zijn, ende hebben gheslapen ombesneden, ghedoodt metten sweerde.

22

Daer is Assur ende alle zijn menichte, rontsom hem sijn zijn grauen, alle die verslaghene, ende die metten sweerde gheuallen zijn.

23

Der welcker grauen ghegheuen zijn in die wterste poelen, ende zijn menichte is gheworden rontsomme zijn graff, allegader verslaghen ende metten sweerde vallende, die hier voertijts een veruaertheyt ghegheuen hadden int lant der leuender.

24

⁺Daer is Elam ende alle zijn menichte, rontsomme sijn graf, alle dese zijn verslaghen, ende metten sweerde vallende die onbesneden nederghedaelt sijn tot die wterste eerde, die hen vreese ghestelt hebben int lant der leuender, ende si hebben hen scandelijcheyt ghedraghen metten ghenen die inden poel nederghedaelt zijn.

+ F

25

Int midden van die verslaghene hebben sij zijn rustplaetse ghestelt, in alle zijn volcken, rontsom hem is zijn graff, alle dese waren ombesneden ende ghedoodt metten sweerde, want sij hebben veruaertheyt ghegheuen int dlant der leuender, ende sij hebben hen scandelijcheyt ghedraghen metten ghenen die inden poel nederdalen, int midden van die verslaghene zijn sij ghestelt.

[p. *660]

26

Daer is Mosoch ende Tubal, ende alle sijn menichte, rontsomme hem sijn zijn grauen, alle dese waren ombesnedenen ende verslaghen, ende metten sweerde vallende, want sij hebben hen vreese ghegheuen int lant der leuender.

27

Ende sij en sullen niet slapen met die stercke ende met die vallende ende ombesnedene die ter hellen nederghedaelt sijn met haren wapenen, ende hebben hen sweerden ghestelt onder hen hoofden, ende hen boosheden waren in hen ghebeente, want sij sijn eenen grouwel van die stercke gheworden int lant der leuender.

28

Daerom suldi ghy ooc int midden van die ombesnedene vernielt worden ende ghy sult slapen metten ghenen die verslaghen zijn metten sweerde.

29

⁺Daer is Idumea ende haer coninghen, ende allen haer vorsten die ghegheuen sijn met haren heyre metten ghenen die verslaghen sijn metten sweerde, ende die metten ombesnedenen ontslapen sijn, ende metten ghenen die nederghedaelt zijn inden poel.

+ G

30

Daer sijn alle die princen vanden noorden ende alle die iaghers, die wech gheleydt zijn metten verslaghenen, vreesende, ende in hen stercheyt bescaemt, die gheslapen hebben ombesneden metten ghenen die verslaghen sijn metten sweerde, ende hebben hen bescaemtheyt ghedraghen, metten ghenen die inden put nederdalen,

31

Pharao heeftse ghesien, ende hy is vertroost gheweest ouer alle sijn menichte die verslaghen is metten sweerde, Pharao ende alle zijn heyr, seyt die Heere Godt,

32

want hy heeft zijn vreese ghegheuen int lant der leuender, ende hy is ontslapen int midden van die ombesnedene met den ghenen die metten sweerde verslaghen zijn, Pharao ende alle zijn menichte, seyt die Heere Godt.