Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxix. Capittel.

1

⁺INt thiende iaer, in die thiende maent, op den elfsten dach vander maent is des Heeren woert ghesciedt tot my segghende,

+ A

2

Sone des menschen stelt v aensicht teghen Pharao den coninck van Egypten, ende ghi sult van hem propheteren ende van gheheel Egypten.

3

Spreect ende ghy sult segghen. Dit seyt die Heere Godt, Siet ick tot v Pharao coninck van Egypten, ghi grooten draeck, die daer rust int midden van uwen vloeden, ende segt. Den vloet is mijne, ende ick heb my seluen ghemaect.

4

Ende ick sal eenen breydel stellen in v kinnebacken, ende ick sal die visschen van uwen vloeden aen v scellen doen cleuen, ende ic sal v wt trecken wt dat midden van uwen vloeden, ende alle v visschen sullen aen v scellen hanghen.

5

Ende ick sal v worpen in die woestijne, ende alle die visschen van uwen vloet, op daensicht der eerden suldi vallen, ghy en sult niet vergadert worden, ⁺noch te samen ghebracht den beesten der eerden, ende den voghelen des hemels heb ic ghegheuen om te verslinden.

+ B

6

Ende alle die bewoonders van Egypten sullen weten dat ick die Heere ben. Om dat ghi eenen rietstock gheweest hebt den huyse van Israel

7

als sij v metter hant aengrepen, ende ghy sijt ghebroken, ende ghy hebt alle hen scoudere gescoert, ende den ghenen die op v stuenden, sijdi in stucken gebroken, ende ghi hebt allen hen nieren slap gemaect.

8

Daerom dit seyt die Heere Godt, Siet ick sal ouer v een sweert brenghen, ende ick sal van v dooden den mensch ende dat vee.

9

Ende dlant van Egypten sal wesen tot een woestijne, ende tot een wildernisse, ende sij sullen weten dat ic die Heere ben, om dat ghi gheseyt hebt. Den vloet is mijne ende ick heb dien ghemaect.

10

Daerom siet ick tot v ende tot uwe vloeden. Ende ic sal dlant van Egypten gheuen tot woestijnen metten sweerde verwoest, van den torre Syenes tot die palen van der Morianen lant.

11

⁺Daer en sal gheens menschen voet doer gaen, noch gheenen voet der beesten en sal daer gaen, ende ten sal niet bewoont worden veertich iaren lanck.

+ C

12

Ende ick sal dlant van Egypten gheuen verwoest, int midden van die verwoeste landen, ende haer steden int midden der steden die omgheworpen zijn, ende sij sullen verwoest zijn veertich iaren, ende ick sal die Egyptenaers verstroyen in die natien, ende ick salse waeyen in die landen.

13

Want dit seyt die Heere Godt, Nae deynde van veertich iaren sal ick Egypten vergaderen, van die volcken in die welcke sij verstroyt waren.

14

Ende ick sal wederom brenghen die gheuanghenisse van Egypten, ende ic salse stellen int lant van Phathures, int lant van hen gheboorte, ende sij sullen daer wesen tot een nederconincrijck,

15

onder die ander rijcken salt dalder nederste sijn, ende ten sal voertaen niet meer verhauen worden ouer die natien, ⁺ende ick salse verminderen datse gheen heerscappie en sullen hebben ouer die volcken.

+ D

16

Noch sij en sullen den huyse Israel niet meer wesen tot een betrouwen leerende boosheyt, dat sij vlieden souden ende hen volghen, ende sij sullen weten dat ick die Heere Godt ben.

17

Ende tis ghesciet in tseuenentwintichste iaer, in dierste maent in den iersten dach van der maent, dat het woert des Heeren tot my is ghesciedt segghende.

18

Sone des menschen Nabugodonosor die coninck van Babilonien heeft zijn heyr doen dienen met eenen grooten dienst teghen Tyrum, alle hooft is caluwe ghemaect, ende alle scoudere is van haire ghebloodt, ende hem en is gheenen loon ghegheuen noch zijnen heyre, van Tyro, voer den dienst daer mede dat hy my ghedient heeft teghen haer.

19

Daer om dit seyt die Heere Godt. Siet ick sal Nabugodonosor den coninck van Babilonien gheuen int lant van Egypten, ende hy sal haer menichte nemen, ende hy sal haer buiten roouen, ende haeren roof roouen, ende tsal voer den loon zijnen heyre zijn.

[p. *658]

20

Ende voer dwerck waer mede hy my ghedient heeft, heb ic hem dlant van Egypten ghegheuen, om dat sij my ghearbeyt hebben, seyt die Heere Godt,

21

In dien dach sal den horn des huys van Israel wtspruyten, ende ick sal v eenen openen mont gheuen int midden van hen lieden, ende sij sullen weten dat ick die Heere ben.