Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxviij. Capittel.

1

⁺ENde des Heeren woert is tot my ghesciedt segghende.

+ A

2

Sone des menschen segt den prince van Tyrus. Dit seyt die Heere God, Om dat v herte verhauen is, ende dat ghy gheseyt hebt. Ick ben Godt, ende in Gods stoel ben ic gheseten int herte vander zee, daer ghi een mensch sijt, ende niet Godt, ende ghy hebt v herte ghegheuen als Gods herte.

3

Siet ghi sijt wijser dan Daniel, alle secreet en is voer v niet verborghen,

4

in v wijsheyt ende voersienicheyt hebdi v stercheyt ghemaect, ende ghy hebt gout ende siluer vercreghen in v scatten.

5

In die menichfuldicheyt van uwer wijsheyt, ⁺ende in v comenscap hebdi v stercheyt vermenichfuldicht, ende v herte is verhauen in v machticheyt.

+ B

6

Daerom dit seyt die Heere Godt. Om dat v herte verhauen is als Gods herte.

7

Daerom siet ic sal vreemde luyden op v aenbrengen, dalderstercste der heydenen, ende sij sullen hen sweerden bloot maken ouer die schoonheyt van uwer wijsheyt, ende sij sullen v schoonheyt besmetten.

8

Sy sullen v dootslaen ende neder trecken, ende ghy sult steruen in die verderffenisse der ghedoodder in therte der zee,

9

Suldi dan segghende spreken. Ick ben Godt voer die ghene die v dooden sullen, daer ghy een mensch zijt, ende niet Godt, in die hant der gheender die v dooden?

10

⁺Ghy sult die doodt der ombesnedene steruen in die handt der vreemden, want ic hebt gesproken seyt die Heere God.

+ C

[p. *657]

11

Ende des Heeren woert is tot my ghesciet segghende, Sone des menschen, Heft op een beclaghinghe ouer den coninck van Tyrus,

12

ende ghy sult hem segghen. Dit seyt die Heere Godt, Ghy teeken der ghelijckenisse, vol wijsheyt, ende volmaect van scoonheyt.

13

In die wellusticheden van Godts paradijs hebdi gheweest, alle costelijck ghesteente was v ouerdecsel. Sardius, Topasius, ende Iaspis, Chrysolitus, ende Onix, ende Berillus, Sapphirus ende Carbunculus, ende Smaragdus, tgout is dwerck uwer schoonheyt, ende v gaten zijn bereydt gheweest op den dach als ghy ghemaect zijt.

14

⁺Ghy waert Cherub wtghestrect ende ouerdeckende, ende ick heb v ghestelt inden heylighen berch Godts, int midden van die vierighe steenen hebdi ghewandelt.

+ D

15

Ghi waert volcomen in uwe weghen van den dach van uwer sceppinghen, tot datter boosheyt in v gheuonden was.

16

In die menichte van uwen comenscappen hebben v binnenste veruult gheweest met boosheyt, ende ghy hebt ghesondicht, ende ic heb v wtgheworpen van Gods berch, ende ic heb v verdoruen. O ghy bescermende Cherub wt dat midden van die vierighe steenen.

17

Ende v herte is opghehauen in uwe schoonheyt. ⁺Ghy hebt v wijsheyt verdoruen in uwe schoonheyt. Ick heb v in deerde gheworpen, voer der coninghen aensicht heb ick v ghegheuen dat sij v sien souden.

+ E

18

In die menichte van uwen boosheden, ende in die boosheyt van uwe comenscappen hebdi uwe heylichmakinghe besmet, daerom sal ic een vier wtbrenghen wt dat midden van v dat v ete, ende ic sal gheuen tot asschen op deerde voer daenscijn van alle die v sien sullen.

19

Alle die v sien sullen in die heydenen sullen hen seer verwonderen van v, ghy sijt niet gheworden, ende ghi en sult niet wesen inder eewicheyt.

20

Ende dwoert des Heeren is tot my ghesciet segghende.

21

Sone des menschen stelt v aensicht teghen Sydon, ⁺ende ghi sult van haer propheteren

+ F

22

ende segghen. Dit seyt die Heere Godt. Siet ic segghe tot v Sidon, ende ick sal gheglorificeert worden in midden van v. Ende sij sullen weten dat ick die Heere ben, als ick in haer ordeelen sal ghedaen hebben, ende dat ick in haer sal gheheylicht zijn.

23

Ende ic sal in haer senden die pestilencie, ende bloet in haer straten, ende die verslaghene sullen int midden van haer vallen metten sweerde rontsomme, ende sij sullen weten dat ick die Heere ben.

24

Ende sij en sal den huyse van Israel niet meer wesen een struycsele der bitterheyt, ende eenen dorne pijne inbrenghende van allen sijden, rontsomme van die ghene die hen teghen zijn, ⁺ende sij sullen weten dat ic die Heere Godt ben,

+ G

25

Dit seyt die Heere Godt. Als ic thuys van Israel sal vergadert hebben van die volcken onder die welcke dat sij verstroyt zijn, dan sal ick henlieden gheheylicht worden voer die heydenen, ende sij sullen in hen lant woonen, dat ick mijnen knecht Iacob ghegheuen hebbe.

26

Ende sij sullen daer in sonder vreese woonen, ende sij sullen huysen timmeren ende wijngaerden planten, ende sij sullen betrouwelijck woonen, als ick die ordeelen sal ghedaen hebben in alle die ghene die hen teghen zijn rontsomme, ende sij sullen weten dat ick die Heere hen Godt ben.