Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvij. Capittel.

1

⁺ENde dwoert des Heeren is tot my ghesciedt segghende.

+ A

2

Daer om ghy sone des menschs, neempt op Tyrum een beclaghinghe,

3

ende ghy sult Tyro segghen, die inden inganck der zee

[p. *656]

woont, der volcken comenscappe tot veel eylanden, Dit seyt die Heer Godt, O Tyre ghy hebt gheseyt, Ick ben van volmaecte cierlijcheyt,

4

ende int hert vander zee gheleghen. V naeghebueren die v ghetimmert hebben die hebben v cierlijcheyt volmaect,

5

met abeel boomen van Sanir hebben sij v opghetimmert met alle die solderinghen der zee. Sy hebben den Cederboom van Lybanus ghenomen dat sij v eenen mastboom souden maken.

6

Sy hebben eycken van Basan ghescaeft tot uwe roeyriemen, ende v scipbancken der roeyers hebben sij v ghemaect van yuoir wt Indien, ⁺ende die roufkens van die eylanden van Italien.

+ B

7

Versceyden costelijck lijnwaet van Egypten is v gheweuen tot een zeyl, dat aen den mast soude ghehanghen worden. Hemelsblau sijde, ende purpurlaken van die Eylanden Elisa zijn v ouerdecsel gheworden.

8

Die bewoonders van Sidon ende die van Arad heben v royers gheweest. V wijse Tyre zijn v stiermannen gheworden.

9

Die oude mannen van Giblien, ende haer wijse hebben scipluyden ghehadt totten dienst van uwen versceyden huysraet, alle die scepen der zee, ende hen scipluyden hebben gheweest int volck van uwer comenscap.

10

Die perssen ende Lidianen, ende Libianen waren in v heyr v orloochsche mannen, den scilt ende den helm hebben sij in v ghehanghen om v vercieringhe.

11

Die sonen van Arad met haren heyren waren op v mueren rontsomme. ⁺Maer die Pigmeen die in v torren waren hebben ooc hen pijlkokeren aen v mueren ghehanghen rontsomme, sij hebben v schoonheyt volmaect.

+ C

12

Die van Cartagien v coopluyden hebben met die menichte van alderhande rijcdommen met siluer, yser, ten, ende loot v mercten veruult.

13

Griecken lant Thubal ende Moloch dese hebben v coopluyden gheweest slauen, ende metalen huysraet hebben sij uwen volcke aenghebracht.

14

Van thuys Thogorme hebben sij peerden, ende rijders te peerde, ende muylen ghebracht tot uwer merct.

15

Die kinderen van Dedan waren v coopluyden, veel eylanden sijn die comenscap van uwer hant, sij hebben yuooren ende Hebeninen tanden verwisselt om uwen prijs.

16

Die Sirier was v coopman om die menichte van uwen wercken, Peerlen, ende purpure, ende ghebeelt werck, ende costelijck fijn lijnwaet, ende sijde, ende chodchod hebben sij voertsghestelt in v merct.

17

⁺Iuda ende dlant van Israel die hebben v coopluyden gheweest in wtghelesen terwe, sij hebben balsame, ende honich ende olie, ende termentijn te coop ghestelt in v merct.

+ D

18

Die van Damascus is v coopman gheweest in die menichte van uwen wercken, in die menichte van versceyden rijckelijcheden, in vetten wijn, in wollen van die beste verwe.

19

Dan ende Griecke lant, ende Mozel hebben in v mercten voertsghestelt constelijck ghemaect yser werck, ende stacte, ende calamus in v comenscappen.

20

Die van Dedan waren v coopmannen in tapijten om te sitten.

21

Arabien ende alle die princen van Cedar, sij waren coopluyden van uwer hant, met lammeren, ende rammen, ende bocken, sijn v coopluyden tot v ghecomen.

22

Die vercoopers van Saba ende Reema, sij zijn v coopluyden gheweest, met alle die costelijcste specerien, ende costelijck ghesteente, ende gout, ⁺dwelck sij voerghestelt hebben in v merct.

+ E

23

Haran ende Chenne ende Eden v coopluyden, Saba, Assur ende Chelmad v vercoopers.

24

Sij waren v coopluyden in menigherley dinghen, met dec cleederen van hemelsblau verwe, ende van versceyden beeldwerck, ende van costelijcke scatten, die omwonnen ende ghebonden waren met seelen, Cederboomen hadden sij ooc in v comenscappen.

25

Die scepen der zee waren v principaelste in v comenscap, ende ghi sijt veruult gheweest ende wtermaten, seer heerlijck gheweest int hert vander zee,

26

in veel wateren hebben v roeyers v ghebrocht, den suyden wint heeft v vernielt int herte van der zee.

27

V rijcdommen ende v scatten, ende v menigherande instrumenten. V scipluyden, ende v stierlieden die uwen huysraet hielden, ⁺ende ouer v volck waren, ende oock mede v orloochsche mannen die in v waren met alle v menichte die int midden van v is, sullen vallen int hert vander zee in den dach van uwen val.

+ F

28

Van tgheluyt des roepens van uwen stiermannen sullen die scipvloten verstoort worden.

29

Ende sij sullen van haren scepen nederdalen alle die den roeyriem hielden, die scipluyden ende alle die stiermannen der zee sullen opt lant staen.

30

Ende sij sullen op v iammerlijck ghecrysch maken met een groote stemme, ende sij sullen bitterlijck roepen, ende ghestubbe op hen hoofden worpen, ende met asschen sullen sij bespraeyt worden.

31

Ende sij sullen op v een caluheyt sceren, ⁺ende sij sullen omgort worden met hairen cleederen, ende sij sullen v beweenen in die bitterheyt der zielen, met een alderbitterste ghescrey.

+ G

32

Ende sij sullen op v aennemen eenen droeuen sanck, ende sij sullen v beclaghen. Welck stadt isser als Tyrus, die stom gheworden is int midden vander zee?

33

Die inden wtganck van uwen comenscappen vander zee veel volcken vol ghemaect hebt, in die menichte van uwen rijcdommen, ende van uwen volcken hebdi die coninghen der eerden rijck ghemaect.

34

Nu sijdi vander zee ghebroken, v rijcdommen zijn in de diepten der wateren, ende alle v menichte die int midden van v was is gheuallen.

35

Alle die bewoonders der eylanden hebben hen seer verwondert van v, ende alle hen coninghen metten tempeest gheslaghen hebben hen aensichten verandert.

36

Die coopluyden der volcken hebben op v ghespot ghy zijt tot niet ghebracht, ende ghy en sult niet zijn tot inder eewicheyt.