Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvi. Capittel.

1

⁺ENde tis ghesciedt int elfste iaer, op den iersten dach der maent, dat het woert des Heeren tot my ghesciedt is segghende,

+ A

2

Sone des menschen, Om dat Tyrus gheseyt heeft van Ierusalem. Wel aen, die poorten der volcken zijn ghebroken, sij is tot mi ghekeert, ic sal veruult worden, sij is verwoest.

3

Daer om dit seyt die Heere Godt, Siet ic tot v Tyre, ende ic sal tot v doen opcomen veel volcken, ghelijck die stormende zee opcoemt.

4

Ende sij sullen die mueren van Tyro breken, ende haer torren verderuen, ende ick sal haer ghestubbe van haer scrabben, ende ick salse gheuen tot eenen alder claersten steen,

5

Het sal een plaetse wesen om die visch netten te drooghen int midden der zee, want ic hebt ghesproken, seyt die Heere Godt, ende sij sal tot een beroouinghe den Heydenen wesen.

6

Ende haer dochteren oock die int velt zijn, sullen metten sweerde dootgheslaghen worden, ende sij sullen weten dat ick die Heere ben,

7

Want dit seyt die Heere Godt, Siet ic sal tot Tyrum brenghen Nabugodonosor den coninck van Babilonien vanden noorden, den coninck der coninghen, ⁺met peerden ende waghenen, ende rosvolck, ende met een groote vergaderinghe, ende volck.

+ B

8

V dochteren die opt velt zijn sal hy metten sweerde dootslaen, ende hy sal v omlegghen met bolwercken, ende hy sal eenen wal te hoop draghen int ronde, ende hy sal teghen v den scilt opheffen.

9

Ende die instrumenten om die mueren te bestryden, ende te bestooten sal hy bereyden teghen v mueren, ende v torren sal hy verderuen met zijn orloochsche wapenen,

10

met die ouervloedicheyt van zijnen peerden sal v hen ghestubbe ouerdecken. Van tgheluyt des rosvolcs, ende der raderen, ende der waghenen sullen v mueren beroert worden, als hy wt v poorten sal ghegaen zijn, als doer den inganck van een ghebroken stadt,

11

met zijnder peerden clauwen sal hy alle v straten vertreden, v volck sal hy metten sweerde slaen, ende v edele staende beelden sullen op deerde vallen.

12

Sy sullen v rijcdommen verderuen, sij sullen v coopgoeden beroouen, ende v mueren verderuen, ⁺ende v heerlijcke huysen sullen sij om worpen, ende v steenen, ende v houten, ende v ghestubbe sullen sij int midden der wateren stellen.

+ C

13

Ende ick sal doen rusten die menichte van uwen liedekens, ende tgheluyt van uwen herpen

14

en sal v maken tot een alderblinckenste steenrootse, ghy sult een plaetse wesen om die netten te drooghen, noch ghy en sult voerts niet meer opghetimmert worden, want ick hebt ghesproken seyt die Heere Godt,

15

Dit seyt die Heere Godt Tyro. En sullen van tgheluyt uwer vallinghen, ende van dat suchten uwer ghedoodder als die ghedoot sullen werden int midden van v, die eylanden niet beweecht worden?

16

Ende alle die princen der zee sullen van hen stoelen nederdalen, ende sij sullen hen mantels afflegghen, ende hen cleederen van versceyden verwen sullen sij wech worpen, ende sij sullen met verwonderinghe beuanghen worden, sij sullen op deerde sitten, ende verbaest zijnde van uwen onuersienlijcken val sullen sij hen verwonderen.

17

⁺Ende op v een beclaghinghe opnemende sullen sij tot v segghen. Hoe sijdi vergaen die in die zee woont, ghy heerlijcke stadt, die sterck gheweest hebt in zee met uwen bewoonders, die welcke alle menschen ontsaghen.

+ D

18

Nu sullen die scepen verbaest zijn inden dach van uwer vreesen, ende die eylanden sullen ontstelt worden in die zee, om datter niemant wt v en coemt.

19

Want dit seyt die Heere Godt, als ic v sal ghegheuen hebben tot een verwoeste stadt ghelijc die steden die niet bewoont en worden, ende als ick den afgront ouer v sal ghebracht hebben, ende dat v veel wateren ouerdect sullen hebben.

20

Ende dat ic v sal nederghetrocken hebben metten ghenen die inden poel nederdalen tot dat eewich volck, ende dat ic v ghestelt sal hebben int wterste lant, ghelijck die oude woestijnen met die ghene die in den poel ghebracht worden, dat ghy niet bewoont en wordet voerts als ic glorie sal ghegheuen hebben int lant der leuender,

21

soe sal ick v te niete brenghen, ende ghy en sult niet zijn, ende ghesocht zijnde en suldi voerts niet meer gheuonden worden inder eewicheyt, seyt die Heere Godt.