Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxv. Capittel.

1

⁺ENde des Heeren woert is tot my ghesciedt segghende,

+ A

2

Sone des menschen stelt v aensicht teghen die kinderen van Ammon, ende ghy sult van hen propheteren.

3

Ende ghy sult tot die kinderen van Ammon segghen. Hoort dat woert des Heeren Gods. Dit seyt die Heere Godt. Om dat ghy gheseyt hebt, wel aen wel aen, ouer mijn heylighe plaetse, om dat die besmet is, ende ouer dlant van Israel om dattet verwoest is, ende ouer thuys van Iuda om dat sij in die gheuanghenisse gheleyt zijn.

4

Daer om sal ick v den kinderen vanden oosten tot een erffenisse gheuen, ende sij sullen hen scaeps stallen in v stellen, ende sij sullen in v stellen hen tenten, sij sullen v coren vruchten eten, ende sij sullen v melck drincken.

5

Ende ick sal Rabbath gheuen tot een

[p. *655]

wooninghe der kemelen, ende die kinderen van Ammon tot een rustplaetse des veets, ende ghy sult weten dat ick die Heere ben.

6

Want dit seyt die Heere Godt, om dat ghy metter hant blijde gheslach hebt ghemaect, ⁺ende metten voete ghesmeten, ende hebt v verblijt met gheheelder begheerten ouer dlant van Israel,

+ B

7

daerom sal ick mijn hant wtsteken op v, ende ick sal v leueren tot een beroouinghe der heydenen, ende ick sal v dootslaen van die volcken, ende verderuen van die landen ende vernielen, ende ghi sult weten dat ick die Heere ben.

8

Dit seyt die Heere Godt. Om dat Moab ende Seir gheseyt hebben. Siet ghelijck alle die Heydenen, alsoo is dat huys van Iuda,

9

daer om siet ick sal Moabs scoudere ontdecken van die steden van zijnen steden, seg ic, ende van zijnen palen die heerlijcke der eerden. Bethiesimoth ende Beelmeon ende Chariathaim.

10

Den kinderen vanden oosten metten kinderen van Ammon, ende ick salse gheuen tot erffenisse, datter voertaen gheen ghedenckenisse der kinderen van Ammon, onder die Heydenen en sij.

11

⁺Ende in Moab sal ick ordeelen doen, ende sij sullen weten dat ic die Heere ben.

+ C

12

Dit seyt die Heere Godt, Om dat Idumea wrake ghedaen heeft, dat sij haer wreken soude van die kinderen van Iuda, ende heeft ghesondicht misdoende, ende heeft wrake begheert van henlieden.

13

Daerom dit seyt die Heere Godt. Ick sal mijn hant wtsteken op Idumeen, ende ick sal van haer wech nemen den mensch ende dat vee, ende ic salse woest maken van tsuyden, ende die in Dedan zijn die sullen metten sweerde vallen.

14

Ende ick sal mijn wrake gheuen ouer Idumeen doer Israels mijns volcs hant, ende sij sullen in Edom doen nae mijn gramscap, ⁺ende nae mijnen rasenden torn, ende sij sullen mijn wrake weten seyt die Heere Godt.

+ D

15

Dit seyt die Heere God. Om dat die Palestijnen wrake ghedaen hebben, ende hebben hen seluen ghewroeken met gheheelder herten, doot slaende ende volbrenghende die oude viantscappen,

16

daer om dit seyt die Heere Godt. Siet ick sal mijn hant wtsteken op die Palestijnen, ende ic sal die dootslaghers dootslaen, ende ic sal die bleuelinghen van dat lantscap aen die zee vernielen,

17

ende ic sal in hen lieden groote wraken doen, straffende in rasende gramscap, ende sij sullen weten dat ic die Heere ben, als ic mijn wrake sal ghegheuen hebben op hen lieden.