Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiiij. Capittel.

1

⁺ENde des Heeren woert is tot my ghesciedt int neghenste iaer, in die thienste maent, op den thiensten dach der maent segghende,

+ A

2

Sone des menschen scrijft v den naem van desen daghe in den welcken die coninck van Babilonien versterct is teghen Ierusalem heden.

3

Ende ghy sult segghen doer een ghemeyn segwoert tot dat creytende huys een parabele, ende ghi sult tot hen spreken. Dit seyt die Heere Godt, stelt eenen pot, stelt eenen (seg ick) ende doet daer water in.

4

Vergadert zijn stucken in dien, alle goede stucken, wtghecoren, ende vol beenderen den achtersten bout, ende die scoudere.

5

Neemt tot v een dalder vetste scaep, legt ooc hoopen van beenderen onder dien pot, ⁺zijn cokernie heeft seer heet ghesoden, ende zijn beenderen zijn van een ghesoden int midden van dien.

+ B

6

Daer om dit seyt die Heere Godt. Wee der stadt des bloets, den pot wiens roest in hem is, ende zijnen roest en is van hem niet vergaen, by deelen, ende by zijn deelen worpt hem wt, dlot en is op hem niet gheuallen,

7

want zijn bloet is int midden van hem, op eenen alder glatsten steen heeft hi dien wtghestort, hi en heeft hem niet wtgestort op deerde, dat hi soude mogen ouerdect worden metten ghestubbe,

8

om dat ic mijn verbolgentheyt daer ouer brenghen soude, ende met een wrake wreken, soe heb ic zijn bloet ghegheuen op eenen glatsten steen, ⁺om dat niet bedect en soude worden.

+ C

9

Daerom dit seyt die Heere Godt, Wee der stadt des bloets, wiens vier ic groot maken sal.

10

Vergadert die beenderen die ic metten vier ontsteken sal, tvleesch sal verteert worden, ende alle die vergaderinge sal gecooct worden, ende die beenderen sullen verdwijnen.

11

Stelt ooc dien pot op vierighe colen ydel, op dat zijn metael heet worden ende smelte, ende dat int midden van hem ghesmolten werde sijn besmettinghe, ende dat sijn roesticheyt verteert worde.

12

Met veel arbeyts isser ghesweedt, ende wtermaten groote roesticheyt en is van hem niet wtghegaen, noch doert vier.

13

V onsuyuerheyt is zeer eyselijck, want ick heb v willen suyueren, ⁺ende ghi en sijt niet ghesuyuert van v vuylicheden, maer ghi en sult oock niet eer ghesuyuert worden tot dat ic mijn verbolghentheyt sal doen rusten in v.

+ D

14

Ic die Heere hebt ghesproken. Het sal comen, ende ic salt doen, ic en sal niet voerbygaen, noch sparen, noch ic en sal niet te vreden gestelt worden, na v wegen ende na v vonden sal ic v ordeelen seyt die Heere.

15

Ende des Heeren woert is tot my gesciet seggende,

16

Sone des menschen siet ic neme van v die begeerlijcheit uwer oogen, doer ende plage, ende ghi en sult niet claghen, noch screyen, noch v tranen en sullen niet vloeyen.

17

Versucht al swijghende, ghi en sult der dooden bescreyinghe niet doen, ⁺v croone sij rontsom v ghebonden, ende v scoenen sullen aen v voeten zijn, noch ghi en sult v aensicht met gheen cleedt bedecken, noch ghy en sult die spijsen der rouwigher niet eten.

+ E

18

Hierom heb ic totten volcke ghesproken des morghens vroech, ende mijn huysvrouwe is tsauonts ghestoruen. Ende ic heb smorghens ghedaen, alsoe hy my beuolen hadde.

19

Ende tvolc heeft tot my gheseyt. Waerom en gheefdi ons niet te kennen wat dese dinghen beteekenen die ghi doet?

20

Ende ic heb tot hen gheseyt. Des Heeren woort is tot my ghesciedt seggende,

21

Spreect den huyse van Israel. Dit seyt die Heere God, Siet ic sal mijn heylige plaetse ontreynighen, ⁺die houerdie van uwen rijcke, ende die begheerlijcheyt uwer ooghen, ende waer af dat v ziele beanxt is, ende v sonen ende v dochteren die ghi achterghelaten hebt sullen metten sweerde vallen.

+ F

22

Ende ghy sult doen ghelijck ic ghedaen hebbe uwen mont en suldi met gheen cleedt bedecken, ende die spijse der gheender die rouwe maken en suldi niet eten.

23

Ghy sult croonen op v hoofden hebben, ende scoenen aen v voeten, ghy en sult niet claghen noch weenen, maer ghy sult verdwijnen in v boosheden, ende een ieghelijck sal tot zijnen broeder suchten.

24

Ende Ezechiel sal v lieden wesen tot een wonder teeken der toecomender dinghen, nae alle die dinghen die hy ghedaen heeft suldi doen, ⁺als dit comen sal, ende ghy sult weten dat ick die Heere Godt ben.

+ G

25

Ende ghy sone des menschen siet inden dach als ic hen stercheyt van henlieden nemen sal, ende die blijscap der weerdicheyt, ende die begheerlijcheyt van haer lieder ooghen, waer op dat hen zielen rusten, hen sonen ende hen dochteren.

26

In dien dach als die vliedende tot v coemt dat hijt v vercondighen soude.

27

In dien dach (seg ic) sal uwen mont open ghedaen worden metten ghenen die gheuloden is, ende ghy sult spreken, ende voerts niet meer swijghen, ende ghy sult henlieden tot een wonder teeken zijn, ende ghi sult weten dat ick die Heere ben.