Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiij. Capittel.

1

⁺ENde des Heeren woert is tot my ghesciedt segghende,

+ A

2

Sone des menschen. Daer hebben twee vrouwen gheweest eender moeder dochteren.

3

Ende sij hebben oncuyscheyt bedreuen in Egypten, in hen ioncheyt hebben sij oncuyscheyt bedreuen, daer worden hen borsten ghedruct, ende die mammekens van haerder iuecht ghebroken.

[p. *653]

4

Ende hen namen waren Oolla die outste, ende Ooliba haer suster die ioncste, ende ick hebse ghehadt, ende sij hebben my sonen ende dochteren ghebaert. Voerts waren hen namen Samaria Oolla, ende Ierusalem Ooliba.

5

Aldus heeft Oolla bouen my oncuyscheyt bedreuen, ende sij heeft gheraest op haer boeleerders die Assyrianen die haer by quamen,

6

ghecleedt met blau sijde, op die princen ende wethouderen, op alle die ionghelinghen der lusticheyt, op die ruyters beclimmers der peerden.

7

Ende sij heeft haer oncuyscheden ghegheuen op hen alle die wtghecoren sonen der Assyrianen, ende in alle die ghene op die welcke sij van liefden raesden, in hen onsuyuerheden is sij besmet gheweest.

8

Daer bouen oock en heeft sij haer oncuyscheden die sij in Egypten ghehadt hadde niet ghelaten. Want die hebben ooc met haer gheslapen in haer ioncheyt, ende die hebben die borsten van haerder ioncheyt ghebroken, ende si hebben hen oncuyscheyt op haer wtgestort.

9

Daerom heb icse gheleuert in die hant van haren boeleerders, in die handen der kinderen van Assur, ouer der welcker wellusticheyt sij gheraest heeft.

10

⁺Sij hebben haer scandelijckheyt ontdect, haer sonen ende dochteren hebben sij ghenomen, ende haer hebben sij metten sweerde dootgheslaghen, ende het zijn vermaerde vrouwen gheworden, ende sij hebben ordeelen in haer bedreuen.

+ B

11

Dwelck als haer suster Ooliba ghesien hadde, soo heeft sij meer dan die gheraest van onsuyuer wellusticheyt, ende sij heeft haer oncuyscheyt bouen haers susters oncuyscheyt

12

tot die sonen der Assyrianen ontscamelijck gheboden, den vorsten ende wethouderen die tot haer quamen ghecleedt met cleederen van versceyden colueren, den ruyteren die peerde reden, ende den ionghelinghen die allegader van wtnemende maecsel waren.

13

Ende ick heb ghesien dat den eenen wech van hen beyden besmet was.

14

Ende sij heeft haer oncuyscheden vermeerdert. Ende als sij ghesien hadde die ghescilderde mannen aen den want, die beelden van die Chaldeen met verwen wtgheteekent,

15

ende die met ridderlijcke riemen om hen lendenen ghegort, ende gheuerwede hoeden op hen hoofden, die ghedaente van alle die vorsten die ghelijckenisse der sonen van Babilonien, ende des lants de Chaldeen daer zij in gheboren zijn,

16

soo heeft sij gheraest ouer die, metter begherlijcheyt haerder ooghen, ende sij heeft boden tot hen ghesonden in Chaldeen.

17

Ende als die kinderen van Babilonien tot haer ghecomen waren, tot der borsten bedde, soe hebben sij haer besmedt met haer lieder oncuysche wercken, ende sij is van hen besmet gheweest, ende haer ziele is versaet gheweest van die.

18

⁺Sy heeft ooc haer oncuyscheden bloot ghemaect, ende haer scandelijcheyt ontdect, ende mijn ziele is van haer ghesceyden, ghelijc mijn ziele ghesceyden was van haer suster.

+ C

19

Want sy heeft haer oncuyscheden vermenichfuldicht, ghedenckende der daghen haerder ioncheyt, in die welcke sij oncuyscheyt ghedaen heeft int dlant van Egypten.

20

Ende sij heeft gheraest van wellusticheyt op hen versaminghe, der welcker vleesch is als der ezelen vleesch, ende als der peerden vloet is haerlieder vloet.

21

Ende ghy hebt versocht die groote misdaet van uwer ioncheyt, als v borsten in Egypten ghedruct zijn, ende die mammen uwer iuecht ghebroken.

22

Daerom Ooliba dit seyt die Heere Godt, Siet ick sal alle uwe lief hebbers verwecken teghen v, waer aff dat v ziele versaet is gheweest, ende ick sal die teghen v vergaderen al rontsomme,

23

die sonen van Babilonien, ende alle die Chaldeussche edele, ende tyrannen ende princen alle die sonen der Assyrianen ionghelinghen van wtnemenden maecsel, vorsten ende alle wethouderen, die princen der princen, ende die vermaerde beryders der peerden.

24

⁺Ende sij sullen ouer v comen bereyt met waghenen ende raderen, een menichte van volcken, met pansieren, ende scilden, ende helmen, sullen sij teghen v ghewapent werden, van allen syden, ende ick sal voer hen lieden ordeel gheuen, en sij sullen v ordeelen nae hen ordeelen.

+ D

25

Ende ick sal mijn gramme liefde in v setten, die sij met v hanteren in die rasende gramscap, uwen nase ende v ooren sullen sij affsnyden, ende datter ouerblijft dat sullen sij metten sweerde al in stucken houwen, sij sullen v sonen, ende v dochteren vanghen, ende v wterste sal metten viere verslint worden.

26

Ende sy sullen v blooten van uwen cleederen, ende sij sullen die vaten uwer glorien nemen.

27

Ende ick sal v groote misdaet doen ophouden van v, ende v oncuyscheyt vanden lande van Egypten, ende ghy en sult v ooghen oock niet opheffen tot henlieden, ende ghy en sult Egypten niet meer ghedencken.

28

Want dit seyt die Heere Godt, Siet ic sal v leueren in die hant der gheender die ghy haet, in die handen der gheender van die welcke v ziele versaedt is.

29

⁺Ende sij sullen met v doen in hate, ende sij sullen alle v arbeyden wech nemen, ende sij sullen v naect laten, ende vol scandelijcheyt, ende die scandelijcheyt van uwer oncuyscheden sal ontdect worden, v groote misdaet, ende v hoereringhen.

+ E

30

Sy hebben v dese dinghen ghedaen, om dat ghy oncuyscheyt ghedaen hebt nae die Heydenen, onder die welcke ghy besmet zijt in hen affgoden.

31

In ws susters wech hebdi ghewandelt, ende ick sal haren kelck in v hant gheuen.

32

Dit seyt die Heere Godt, ws susters kelck suldi drincken diep, ende breedt, ghy sult tot bespotten ende tot beghecken wesen die dalder meest houdende sijt.

33

Met dronckenheyt ende pijne suldi veruult worden, met den kelck des truerens, ende der droefheyts, metten kelck van v suster Samaria.

34

Ende ghy sult dien drincken, ende wt drincken tot den ghist toe, ende zijn brockelinghen suldi verslinden, v borsten suldi verscoeren, want ick hebt ghesproken seyt die Heere Godt.

35

Daerom dit seyt die Heere Godt. Want ghy mijns vergheten hebt, ende hebt my gheworpen achter v lichaem, draecht ghi oock v misdaet, ende v oncuyscheden.

36

⁺Ende die Heere heeft tot mi gheseyt segghende, Sone des menschen. En ordeeldi niet ooc Oollam, ende Oolibam, ende en vercondichdi hen niet hen groote misdaden?

+ F

37

Want sij hebben ouerspel ghedaen, ende daer is bloet in hen handen, ende met hen affgoden hebben sij oncuyscheyt bedreuen, daer bouen hebben sij hen sonen die sij my ghebaert hebben, hen gheoffert om te verslinden.

38

Maer sij hebben my dit ooc ghedaen. Sy hebben mijn heyleghe plaetse ontsuyuert op dien dach, ende mijn Sabbathen hebben sij ontheylicht,

39

Ende doen sij hen kinderen haren affgoden offerden, ende dat sij ghinghen in mijn heylighe plaetse, op dien dach, om dat sij die ontsuyueren souden, soe hebben sij desen dinghen oock ghedaen int midden van mijnen huyse.

40

Sy hebben ghesonden tot die mannen die van verre quamen, tot die welcke zij eenen bode ghesonden hadden, Aldus siet sij zijn ghecomen, om die welcke ghi v ghewasschen hebt, ende hebt v ooghen al om bestreken met stybius, ende ghi zijt verciert gheweest met alderhande vrouwen cieraet.

41

Ghi hebt gheseten in een

[p. *654]

alderscoonste bedde, ende daer is een tafel verciert gheweest voer v, mijn ruecwerck ende mijn salue hebdi daer op ghestelt.

42

Ende aen die tafel was een stemme van een verhuegende menichte ende in die mannen van die menichte der menschen aenghebracht worden, ende quamen van die woestijne die hebben arm ringhen in hen handen ghedaen, ende schoon croonen op hen hoofden.

43

Ende ick heb haer gheseyt die ghesleten was in die ouerspelen. Nu sal dese in haer oncuyscheyt oock oncuyscheyt bedrijuen.

44

Ende sij sijn tot haer inghegaen als ook tot een ghemeyn oneerbaer vrouwe, alsoo ghinghen sij binnen tot Oollam ende Oolibam, die boose vrouwen.

45

⁺Daerom zijn die mannen rechtuerdich. Dese sullense ordeelen nae het ordeel der ouerspeelsteren, ende nae doordeel der gheender die bloet wtstorten, want sij sijn ouerspeelsteren, ende dbloet is in hen handen.

+ G

46

Want dit seyt die Heere Godt, Brengt tot hen die menichte, ende leuertse tot een gherucht ende tot eenen roof.

47

Ende laetse ghesteent worden met die steenen der volcken, ende laetse met hen sweerden doersteken worden, hen sonen ende dochteren sullen sij dooden, ende hen huysen sullen sij metten viere verbranden.

48

Ende ick sal die groote misdaet van der aerden afdoen, ende alle die vrouwen sullen leeren dat sij niet en doen nae hen groote misdaet.

49

Ende sij sullen v groote misdaet op v lieden gheuen, ende die sonden van uwen affgoden suldi draghen, ende ghy sult weten dat ick die Heere Godt ben.