Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxij. Capittel.

1

⁺ENde dwoert des Heeren is tot my ghesciedt segghende.

+ A

2

Ende ghy sone des menschen en ordeeldi niet, en ordeeldi niet die stadt des bloedts?

3

ende ghy sult hen alle hen affgrijselijcheden toonen, ende segghen, Dit seyt die Heere Godt, Een stadt bloetstortende int midden van haer seluen op dat haren tijt comen soude. Ende die affgoden ghemaect heeft teghen haer seluen, op dat sij besmedt soude worden.

4

In v bloet dat van v wtghestort is hebdi misdaen, ende in uwe affgoden die ghi ghemaect hebt sijdi besmet, ende ghy hebt v daghen doen ghenaken, ende ghy hebt den tijt van uwen iaren aenghebracht. Daer om heb ick v tot een versmaetheyt den Heydenen ghegheuen, ende tot een bespottinghe alle den landen

5

die by ende die verre van v zijn, die sullen van v triumpheren ghy besmette, edele, groot van verderffenisse.

6

⁺Siet die princen van Israel hebben elck met haren arm in v gheweest om bloet wt te storten.

+ B

7

Vader ende moeder hebben sij versmaetheden aenghedaen in v, den vreemdelinck hebben sij tonrecht besculdicht int midden van v, die weese ende die weduwe hebben sij by v bedroeft.

8

Mijn heylighe plaetsen hebdi versmaet, ende mijn Sabbathen hebdi besmet.

9

Achterclappende mannen hebben in v gheweest, om bloet wt te storten, ende op die berghen hebben sij binnen v ghegheten, groote misdaet hebben sij ghedaen int midden van v.

10

Die scamelijcheden des vaders hebben sij ontdect in v die onsuyuerheyt der maensuchtigher vrouwen hebben sij vernedert in v.

11

⁺Ende een ieghelijck heeft in zijns naesten huysvrouwe affgrijselijcheyt bedreuen, ende die sweger heeft zijn behoude dochter onbehoorlijck besmet in v, die broeder heeft zijn suster zijns vaders dochter vercracht in v.

+ C

12

Sy hebben ghiften by v ontfanghen om bloet wt te storten. Woecker ende ouerscot hebdi ontfanghen, ende v naeste hebdi ghierichlijck onrecht ghedaen, ende ghy hebt mijns vergheten seyt die Heere Godt,

13

Siet ick heb mijn handen tsamen gheslaghen ouer v ghiericheyt die ghy ghedaen hebt, ende opt bloet datter ghestort is int midden van v.

14

Salt v herte verdraghen, oft sal v hant te bouen comen in die daghen die ick v doen sal? Ick die Heere hebt ghesproken, ende ick salt doen.

15

Ende ick sal v verstroyen in die natien, ende ick sal v wannen in die landen, ⁺ende ick sal v onsuyuerheyt doen vergaen van v,

+ D

16

ende ick sal v besitten in daensicht der Heydenen, ende ghy sult weten dat ick die Heere ben.

17

Ende dwoert des Heeren is tot my ghesciet segghende,

18

Sone des menschen thuys van Israel is my ghekeert tot eenen scuym, alle dese metael ende tin, ende yser, ende loot int midden vant forneys zijn scuym van siluer gheworden.

19

Daer om dit seyt die Heere Godt, om dat ghy alle verkeert zijt in scuym daerom siet ic sal v vergaderen int midden van Ierusalem

20

met een vergaderinghe van siluer, ende metael, ende tin, ende yser, ende loot, int midden des forneys, dat ic daer in vier onsteken soude om te smelten, alsoo sal ick v vergaderen in mijn rasende gramscap, ende in mijnen torn, ende ick sal rusten, ende ick sal v smelten.

21

⁺Ende ick sal v vergaderen, ende ick sal v ontsteken int vier van mijnder rasender gramscap, ende ghy sult ghesmolten werden int midden van dat.

+ E

22

Ghelijck tsiluer ghesmolten wort int midden van tforneys, alsoo suldi int midden van Ierusalem zijn, ende ghy sult weten dat ick die Heere ben, als ick mijn verbolghentheyt sal wtghestort hebben op v lieden.

23

Ende des Heeren woert is tot my ghesciedt segghende,

24

Sone des menschen segt haer. Ghi zijt een onreyn eerde, ende niet bereghent inden dach der rasender gramscap.

25

Een ghesworen verbont der propheten is int midden van haer, ghelijck eenen leuw brieschende, ende den roof roouende, soo hebben sij die zielen verslint, sij hebben rijcdommen ende ghelt ontfanghen, ⁺sij hebben haer weduwen vermenichfuldicht int midden van haer.

+ F

26

Haer priesters hebben mijn wet versmaedt, ende sij hebben mijn heylighe plaetse besmedt, tusschen heylich ende niet heylich en hebben sij gheen ondersceydt ghehadt, ende tusschen den besmetten ende suyueren en hebben sij niet verstaen, ende van mijn Sabbathen hebben, sij hen ooghen affghekeert, ende ick worde besmet int midden van henlieden.

27

Haer princen int midden van haer waren als woluen den roof grijpende, om bloet wt te storten, ende om zielen te verderuen, ende om ghierichlijck nae winninghen te staen.

28

Ende haer propheten plactense sonder beslach, siende ydel dinghen, ende propheterende hen loghenen, ⁺segghende, Dit seyt die Heere Godt, als die Heere niet ghesproken en heeft.

+ G

29

Die volcken des lants deden onrechte besculdinghen, ende sij roofden gheweldelijck, den behoeftighen ende den armen quelden sij, ende den aencomelinck verdructen sij met onrechte besculdinghe sonder ordeel.

30

Ende ick hebbe wt henlieden eenen man ghesocht die eenen thuyn daer teghen stellen soude, ende die staen soude teghen my voer dlant dat ics niet verderuen en soude, ende ick en hebs niet gheuonden.

31

Ende ick heb op hen mijn verbolghentheyt wtghestort, int vier van mijnder gramscappen heb icse verslonden, haren wech heb ic op hen hooft wederom vergouden seyt die Heere Godt.