Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxi. Capittel.

1

⁺ENde dwoert des Heeren is tot my ghesciedt segghende,

+ A

2

Sone des menschen stelt v aensicht tot Ierusalem, ende druypt tot die heylighe plaetsen, ende propheteert tseghen die eerde van Israel.

3

Ende ghy sult den lande van Israel segghen. Dit seyt die Heere God, Siet ick tot v, ende ick sal mijn sweert wt sijn sceyde worpen, ende ic sal in v dootslaen den rechtuerdighen ende den ongoddelijcken.

4

Ende om dat ick onder v ghedoot hebbe den rechtuerdighen, ende den ongoddelijcken, daer om sal mijn sweert wt sijn sceyde gaen tot alle vleesch vanden suyden totten noorden toe.

5

Op dat alle vleesch mach weten, dat ick die Heere mijn onwederroepelijck sweert wt sijn sceyde ghetrocken hebbe.

6

Ende ghy sone des menschen sucht met gantsche ghebrokentheyt der lendenen, ende met bitterheden versucht voer hen lieden.

7

⁺Ende als sij v sullen segghen. Waer om suchte ghy? soo suldi segghen. Om tghehoor, want het coemt, ende alle herte sal verdwijnen, ende alle handen sullen ommachtich worden, ende alle gheest sal cranck worden, ende ouer alle knyen sullen wateren vloeyen, siet het coemt, ende tsal ghescieden, seyt die Heere Godt,

+ B

8

Ende des Heeren woert is tot my ghesciedt segghende.

9

Sone des menschen propheteert, ende ghi sult segghen, Dit seyt die Heere Godt, Spreect, Het sweert, het sweert is scerp ghemaect ende gheslepen.

10

Om slachofferanden te dooden ist scerp ghemaect, ende om dat blincken soude soo ist ghepolijstert, ghy die mijns soons scepter roert, hebt alle boomen affgehouwen,

11

ende ick hebt ghegheuen om te scauen, datmen metter hant houden mach, dit is het ghescerpt sweert, ende dit is ghepolijstert, om dat soude wesen in die hant des dootslaenders.

12

⁺Roept ende huylt ghy sone des menschen, want dit sweert is ghecomen in mijn volck, dit is in alle die vorsten van Israel die ghevloden waren, sij sijn den sweerde gheleuert met mijnen volcke, daerom slaet metter hant op v dgye,

+ C

13

want het is gheproeft, ende dat alst den scepter omgeworpen heeft, ende ten sal niet sijn seyt die Heere Godt,

14

Daer om ghy sone des menschen propheteert, ende slaet hant teghen hant, ende laet het sweert twee dobbel worden, ende laet drijvoudt worden het sweert der verslaghenen, dit is tsweert des grooten dootslachs datse doet verbaest worden,

15

ende metter herten verdwijnen, ende het vermenichfuldicht die vallinghen. In alle hen poorten heb ick ghegheuen die verstooringhe des scerpen sweerdts, ende dat gheslepen is om te blincken, ghecleedt ten slaghe.

16

Wert scerp, gaet ter rechter sijden oft ter slincker, werwaerts dat den lust ws aensichts is.

17

⁺Ende ick sal oock hantgheslach maken met deen hant teghen dander, ende ick sal mijn verbolghentheyt volbrenghen. Ick die Heere hebt ghesproken.

+ D

18

Ende des Heeren woert is tot my ghesciedt segghende,

19

Ende ghy sone des menschen stelt voer v twee weghen, dat het sweert des conincs van Babilonien come, wt eenen lande sullen sij beyde comen, ende metter hant sal hy daer nae gheraden int beghinsel des weechs van der stadt sal hijt gheraden.

20

Ghy sult den wech stellen dat het sweert come tot Rabbath der kinderen van Ammon, ende tot Iudam in die aldervaste Ierusalem.

21

Want die coninck van Babilonien heeft ghestaen in den tweescheydighen wech int hooft van twee weghen, soeckende waerseggherie, menghende die pijlen heeft hy die affgoden ghevraecht, ende wt die inghewanden raet ghesocht.

22

Aen zijn rechte hant is die waerseggherie ghesciedt ouer Ierusalem, ⁺dat hy die instrumenten om die mueren te breken stellen soude, dat hy zijnen mont open doen soude in den dootslach, dat hy zijn stemme soude opheffen int ghehuyl, dat hy die ghereetscappen om die mueren te breken stellen soude teghen die poorten, dat hy den dijck te hoop draghen soude, dat hy bolwercken opmaken soude.

+ E

23

Ende hy sal wesen als te vergheefs een antwoerde der waerseggherien soeckende in hen ooghen, ende der Sabbathen ledicheyt nae volghende, maer hy sal der boosheyt ghedencken om te verwinnen.

24

Daer om ditseyt die Heere Godt, Om dat ghy ghedachtich hebt gheweest uwer boosheyt, ende v ouertredinghen ontdect hebt, ende v sonden zijn openbaer gheworden in alle uwe ghedachten. Om dat ghy (seg ick) dier ghedachtich sijt gheweest, soo suldi metter hant gheuanghen worden.

25

Maer ghy onreyn ende ongoddelijck vorst van Israel, wiens dach coemt inden voerghescicten dach der boosheyt.

26

Dit seyt die Heere Godt. ⁺Neempt aff den mytere, doet wech die croone, en ist dese niet die den nederen ver

+ F

[p. *652]

heuen heeft, ende den hooghen vernedert?

27

Tot boosheyt, boosheyt, boosheyt, sal ick die stellen, ende dat en is niet ghedaen tot dat hy quam, wien het ordeel toebehoort, ende ick salt hem ouerleueren.

28

Ende ghy sone des menschen propheteert, ende segt. Dit seyt die Heere Godt tot die kinderen van Ammon, ende tot hen verwijt, ende ghy sult segghen, Sweert, sweert, trect v wter sceyden om te dooden, slijpt v dat ghy moecht dootslaen ende blincken.

29

Alsmen v ydel dinghen sach, ⁺ende loghenen propheteerde, dat ghy soudt ghegheuen werden op die halsen der ghewonder ongoddelijcker, der welcker dach coemt inden voergheschicten tijt der boosheyt.

+ G

30

Keert weder om tot v sceyde in die plaetse daer ghy in ghescapen sijt, int lant van uwer gheboorten sal ick v ordeelen,

31

ende ic sal op v wtstorten mijn verbolghentheyt, int vier van mijnder rasender gramscap sal ick op v blasen, ende ick sal v gheuen in die handen der onwijser menschen, ende der gheender die verderffenisse maken.

32

Ghy sult een spijse des viers zijn, v bloet sal int midden des lants zijn, ghy sult vergheten worden, want ick die Heere hebt ghesproken.