Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xx. Capittel.

1

ENde het is ghesciet int seuenste iaer, ⁺in die vijfste maent in den thienden dach der maent, dat die mannen vanden ouders van Israel ghecomen zijn, om den Heere te vraghen, ende sij zijn voer my gheseten.

+ A

2

Ende des Heeren woert is tot my ghesciedt segghende,

3

Sone des menschen spreect tot die ouders van Israel, ende ghy sult tot hen segghen, Dit seyt die Heere Godt, Sijdi ghecomen om my te vraghen? Soe warachtelijck als ick leue, ick en sal v niet antwoerden seyt die Heere Godt.

4

Ist dat ghijse ordeelt, ist dat ghy ordeelt sone des menschen? thoont hen haerder vaderen affgrijselijcheden.

5

Ende ghy sult tot hen segghen, Dit seyt die Heere Godt, opden dach als ick Israel vercoren hebbe, ende mijn hant op ghehauen hebbe voer tgheslachte des huys van Iacob, ende hen gheopenbaert heb int lant van Egypten, ende mijn hant opghehauen hebbe om haren wille segghende, Ick

[p. *650]

ben de Heere v Godt,

6

In dien daghe heb ick mijn handt voer hen opghehauen, dat icse leyden soude wten lande van

Egypten, int lant dat ick hen voersien hadde vloeyende van melck ende honich, welck is wtnemende bouen alle landen.

7

Ende ick heb tot hen gheseyt, Een ieghelijck worp wech die arghernissen van zijnen ooghen, ende en wilt niet besmet worden in die affgoden van Egypten, ick ben die Heere v lieder Godt.

8

Ende sij hebben my verwect tot gramscap, ende sij en hebben my niet willen hooren, een ieghelijck en heeft die affgrijselijcheyt zijnder ooghen niet wech gheworpen, noch sij en hebben die affgoden van Egypten niet ghelaten, ende ick heb gheseyt, dat ic mijn verbolghentheyt op hen lieden wtstorten soude, ende dat ick mijn gramscap in hen volbrenghen soude, int midden van dlant van Egypten.

9

Ende ick hebt ghedaen om mijnen naem, dat dien niet ghescent en soude worden voer die Heydenen, in der welcker midden sij lieden waren, ende onder die welcke ick hen lieden gheopenbaert ben, ⁺dat icse soude wtleijden wten lande van Egypten.

+ B

10

Daerom heb icse wtghedreuen wten lande van Egypten, ende ick hebse wtgheleyt in die woestijne.

11

Ende ick heb hen mijn gheboden ghegheuen, ende mijn ordeelen heb ic hen ghetoont, die welcke een mensch doende daer in leuen sal.

12

Daer bouen heb ick hen mijn Sabbathen ghegheuen, dat die een teeken souden wesen tusschen my ende hen, ende dat sij weten souden dat ick die Heere ben die hen heylich make.

13

Ende thuys van Israel hebben my tot gramscap verwect in die woestijne, in mijn gheboden en hebben sij niet ghewandelt, ende mijn ordeelen hebben sij verworpen, die welcke een mensch doende daer in leuen sal, ende mijn Sabbathen hebben sij crachtelicken seer ontsuyuert. Hier om heb ick gheseyt dat ick mijn rasende gramscap wtstorten soude op hen in die woestijne, ende dat ickse vernielen soude.

14

Ende ick hebt ghedaen om mijns naems wille, op dat dien niet ghesceynt en soude worden voer die Heydenen, wt die welcke icse wtghedreuen hadde in hen aenscouwen.

15

Daer om heb ick mijn hant op henlieden ghehauen in die woestijne, dat icse niet en soude brenghen int lant dat ic hen ghegheuen hadde vloeyende van melck ende honich, het beste van allen landen.

16

Om dat sij mijn ordeelen verworpen hebben, ende in mijn gheboden niet ghewandelt en hebben, ende mijn Sabbathen ontsuyuert hebben, want hen herte ghinck nae die affgoden.

17

⁺Ende mijn ooghe heeft ouer hen ghespaert, dat icse niet dooden en soude, noch ick en hebse niet heel vernielt in die woestijne.

+ C

18

Maer ick heb tot hen kinderen gheseyt in die wildernisse, In uwer vaderen gheboden en wilt niet wandelen, noch en bewaert hen ordeelen niet, noch en wert met haren affgoden niet ontsuyuert.

19

Ic ben die Heere v lieder Godt, wandelt in mijn gheboden, ende bewaert mijn ordeelen ende doet die.

20

Ende heylicht mijn Sabbathen, op dat die een teeken zijn moghen tusschen my ende v lieden, ende datmen wete dat ick die Heere v lieder Godt ben.

21

Ende die kinderen hebben my tot gramscap verwect, sij en hebben in mijn gheboden niet ghewandelt, ende mijn ordeelen en hebben sij niet bewaert dat sij die doen souden, die welcke als een mensch doet, soo sal hy daer in leuen, ende mijn Sabbathen hebben sij ghebroken, ende ick heb ghedreycht dat ick mijn rasende gramscap op hen storten soude, ende dat ick mijn gramscap op hen volbrenghen soude, in die woestijne.

22

Maer ick heb mijn hant affghekeert, ende ick hebt ghedaen om mijnen naem dat niet en soude ghesceynt worden voer die Heydenen, wt die welcke ick hen wtghedreuen hebbe in haer lieder ooghen.

23

⁺Wederom heb ick mijn hant opghehauen teghen henlieden in die woestijne, dat icse soude verstroeyen onder die natien, ende wannen in die landen,

+ D

24

om dat sij mijn ordeelen niet ghedaen en hadden, ende mijn gheboden verworpen hadden, ende mijn Sabbathen ghebroken hadden, ende dat hen ooghen nae haerder vaderen affgoden gheweest hadden.

25

Daer om heb ick henlieden oock gheboden ghegheuen die niet goet en waren, ende ordeelen daersij niet in leuen en sullen.

26

Ende ick hebse besmet in hen offeranden, als sij offerden alle dat die moeder open doet, om hen misdaden, ende sij sullen weten dat ick die Heere ben.

27

Daer om spreect totten huyse van Israel ghy sone des menschen, ende ghy sult tot hen segghen. Dit seyt die Heere Godt. Noch hebben v vaderen my oock daer mede gheblasphemeert, doen sij my versmaedt hadden versmadende,

28

ende dat icse gheleyt hadde int lant, waer op dat ick mijn hant ghehauen hebbe dat ict hen gheuen soude, ⁺sij hebben alle hooghe hueuelen ghesien, ende alle loouerachtighe boomen, ende sij hebben daer hen slachofferanden gheoffert, ende sij hebben daer die creytinghe van hen offerande ghegheuen, ende sij hebben daer den rueck van hen soeticheyt ghestelt, ende sij hebben hen vochtighe offeranden gheoffert.

+ E

29

Ende ick heb tot hen gheseyt, Wat is die hoochde daer ghy henen gaet? Ende zijnen naem is ghenoemt hoochde tot op desen dach toe.

30

Daerom segt totten huyse van Israel. Dit seyt die Heere Godt, Voerwaer ghi wort in uwer vaderen wech besmet, ende nae hen arghernissen dedrijfde ghy lieden oncuyscheyt,

31

ende in die offerande van uwen ghiften, als ghy v kinderen doert vier leydt, worde ghy besmedt in alle v affgoden tot heden toe, ende sal ick v lieden antwoerden huys van Israel? Soe warachtelijck als ick leue, seyt die Heer Godt, ick en sal v lieden niet antwoerden.

32

Ende tghedachte ws herten en sal oock niet ghescieden, der gheender die segghen. Wy sullen zijn als die Heydenen, ende als die gheslachten der eerden, dat wy eeren sullen den houten ende steenen.

33

Soe warachtelijck als ick leue seyt die Heere Godt, ick sal met een stercke hant ende met eenen wtghestrecten arm, ende met een wtghestorte rasende gramscap ouer v lieden regneren.

34

⁺Ende ick sal v lieden wtleyden van die volcken, ende v lieden vergaderen van die landen, onder die welcke ghy verstroeyt sijt, met een stercke hant, ende met eenen wtghestrecten arm, ende met een wtghestorte rasende gramscap sal ick ouer v regneren.

+ F

35

Ende ick sal v lieden brenghen in die wildernisse der volcken, ende ick sal daer met v lieden gheordeelt worden aensicht teghen aensicht,

36

ghelijck ick met een ordeel ghestreden hebbe teghen v vaders in die woestijne des lants van Egypten, alsoo sal ick v ordeelen, seyt die Heere,

37

Ende ick sal v onder mijnen scepter brenghen, ende ick sal v brenghen in die landen des verbonts.

38

Ende ick sal van v lieden die ouertreders, ende ongoddelijcke kiesen, ende ick salse leyden wten lande van hen pelgrimagie, ende int lant van Israel en sullen sij niet comen, ende ghy sult weten dat ick die Heere ben,

39

ende ghy het huys van Israel. Dit seyt

[p. *651]

die Heere Godt, Wandelt een ieghelijck nae v lieder affgoden, ende dient hen. Maer ist dat ghi daer in my ooc niet en hoort, ende dat ghi mijnen heylighen naem voertaen besmet met uwen ghiften, ende met uwen affgoden

40

op mijnen heylighen berch, op den hooghen berch van Israel, seyt die Heere Godt, daer my alle thuys van Israel dienen sal, alle (seg ick) int lant int welcke sy my behaghen sullen, ende daer sal ick v ierste gauen soecken, ende het beghinsel van uwen thienden, in alle uwe heylichmakinghen.

41

Tot eenen rueck der soeticheyt sal ick v lieden ontfanghen, als ic v wtgheleyt sal hebben wt die volcken, end v vergadert van die landen, waer in ghy verstroyet sijt, ende ick sal in v lieden gheheylicht worden in die ooghen der natien.

42

Ende ghy sult weten dat ick die Heere ben, als ick v sal ghebracht hebben totten lande van Israel, int lant, waer voer dat ick mijn hant opghehauen hebbe, dat ict uwen vaderen gheuen soude.

43

Ende ghy sult daer ghedachtich wesen uwer weghen, ende alle uwer grooter misdaden waer mede ghy besmet sijt gheweest, ⁺ende ghy sult v seluen mishaghen in v aenscouwen in alle uwe quaetheden, die ghy ghedaen hebt.

+ G

44

Ende ghy sult weten dat ick die Heere ben, als ick v sal wel ghedaen hebben om mijnen naem, ende niet nae v quade weghen, noch nae v alderquaetste misdaden ghy huys van Israel, seyt die Heere Godt,

45

Ende dwoert des Heeren is tot my ghesciedt segghende,

46

Sone des menschen stelt v aensicht teghen den wech van tsuyden, ende druypt totten suyden wint, ende propheteert totten woude vanden suydenschen acker.

47

Ende ghy sult den bossche van suyden segghen, hoort des Heeren woert, dit seyt die Heere Godt, Siet ick sal in v een vier aensteken, ende ick sal in v verbranden alle tgroen hout, ende alle tdrooch hout, ende die vlamme der onstekinghe en sal niet wtgheblusscht worden, ende alle die ghedaente sal in haer verbrant worden van den suyden totten noorden.

48

Ende alle vleesch sal sien dat ick die Heere dat ontsteken hebbe, ende ten sal niet wtghebluscht worden.

49

Ende ick heb ghesetyt, Ay, Ay, Ay Heere Godt, sij segghen van my. En spreect dese niet met parabelen?