Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xix. Capittel.

1

⁺ENde ghy neemt aen een ghescrey ouer die princenvan Israel,

+ A

2

ende ghy sult segghen. Waerom heeft v moeder die leuwinne onder die leuwen gheslapen, int midden der leukens, waerom heeft sij haer ionghen opghevoet?

3

Ende sij heeft een van haren ionghen leukens wtghebracht, het is een leuw gheworden, ende het heeft gheleert den roof roouen, ende menschen eten.

4

Ende die Heydenen hebben van hem ghehoort, ende sij hebben hem, niet sonder hen wonden, gheuanghen, ende sij hebben hem in ketenen ghebracht int dlant van Egypten.

5

⁺Die welcke als sij ghesien heeft dat sij cranck gheworden was ende dat haer verbeyden verloren was, soo heeft sij eenen van haren leukens ghenomen, sij heeft hem tot eenen leuw ghemaect.

+ B

6

Die welcke wandelde onder die leuwen, ende hy is eenen leuw gheworden, ende hy heeft gheleert den roof roouen, ende menschen verslinden,

7

hy heeft gheleert weduwen maken, ende hen steden tot verwoestheyt brenghen, ende dlant is verwoest gheweest, ende haer volheyt van die stemme sijns ghebrieschs.

8

Ende die volcken zijn tot hem vergadert van allen sijden van die lantcsappen, ⁺ende sij hebben haerlieder net op hem wtghesprayt, in hen wonden is hy gheuanghen.

+ C

9

Ende sij hebben hem in een bewaernisse ghesteken, ende in ketenen hebben sij hem ghebracht totten coninck van Babilonien, ende sij hebben hem in den kercker ghesteken, datmen zijn stemme voertaen niet meer hooren en soude op die berghen van Israel.

10

V moeder is ghelijck eenen wijngaert in v bloet, opt water gheplant gheweest, haer vruchten ende haer looueren zijn ghewassen wt veel wateren,

11

ende haer sijn gheworden vaste roeden tot sceptren der gheender die heerscappie hebben, ende haer lengde is opghehauen onder die looueren, ⁺ende sij heeft haer hoocheyt ghesien in die menichte van haren rancken.

+ D

12

Ende sij is wtghetrocken in die gramscap, ende nedergheworpen op deerde, ende den berrenden wint heeft haer vruchten verdroocht, sij sijn verdorret, ende die roeden van haer macht zijn verdroocht, tvier heeftse gheten.

13

Ende nu is sij ouergheplant in die woestijne, int ombewandelt ende dorstich lant.

14

Ende daer is een vier wtghegaen wt die roeden haerder rancken, dwelck haer vrucht gheten heeft ende in haer en was gheen stercke roede, den scepter der heerscappender. Het is een beweeninghe, ende tsal tot een beweeninghe zijn.