Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviij. Capittel.

1

⁺ENde des Heeren woert is tot my ghesciedt segghende, Wat ist

+ A

2

dat ghy onder v lieden die parabel keert, in dit ghemeyn segwoert int lant van Israel? segghende, Die vaderen hebben eenen sueren druyf gheten, ende der kinderen tanden worden boomich.

3

Ic leue seyt die Heere Godt, ist dt v lieden dese parabele meer wesen sal tot een ghemeyn segwoert in Israel.

4

Siet alle zielen sijn mijne, ghelijck des vaders ziele, alsoo is des soons ziele mijne, die ziele die sondicht die sal steruen.

5

Ende ist dat een man rechtuerdich is, ende dat hi ordeel ende rechtuerdicheyt doet,

6

dat hy op die berghen niet en eet, ende sijn ooghen niet op en heft tot die affgoden des huys van Israel, ende dat hi sijns naesten huysvrouwe niet en sceyndt, ende tot gheen maensuchtighe vrouwe en gaet.

7

⁺Ende dat hy gheenen mensch en bedroeft, dat hy zijnen sculdenaer den pant wederom gheeft, dat hy met ghewelt niet en rooft, dat hy sijn broot den hongherighen gheeft, ende dat hy den naecten met een cleede bedect.

+ B

8

Op woeker niet en leent, ende dat hy niet meer en ontfanct, dat hi sijn hant van boosheyt affkeert, ende dat hy warachtich ordeel doet tusschen man ende man,

9

dat hy in mijn gheboden wandelt, ende mijn ordeelen bewaert, op dat hi die waerheyt doe, dese is rechtuerdich, hy sal dleuen leuen, seyt die Heere Godt,

10

Maer ist dat hy genereert eenen sone die een bloetstortende mordenaer is, ende dat hy een van desen dinghen doet,

11

ende dat hy voerwaer alle die dinghen niet en doet, maer is op die berghen etende, ende sijns naesten huysvrouwe ontsuyuerende.

12

⁺Den behoeftighen ende den armen bedroeuende, roouen roouende, den pant niet wedergheuende, ende sijn ooghen opheffende tot die affgoden, affgrijselijcheyt doende,

+ C

13

ten woecker gheuende, ende meer ontfanghende, meyndi dat sulck leuen sal? hy en sal niet leuen, als hy dese versmadelijcke dinghen ghedaen heeft, hy sal die doot steruen, sijn bloet sal in hem wesen.

14

Maer ist dat die eenen sone genereert, die welcke siende alle sijns vaders sonden die hy ghedaen heeft, vreest, ende dat hy desghelijcs niet en doet,

15

dat hy op die berghen niet en eet, ende sijn ooghen niet op en heft op die affgoden des huys van Israel, ende dat hy sijns naesten huysvrouwe niet en sceynt.

16

Ende

[p. *649]

gheenen man en bedroeft, den pant niet en behoudt, ende gheenen roof en rooft, ⁺zijn broot den hongherighen gheeft, ende den naecten bedect met eenen cleede.

+ D

17

Sijn hant affkeert van dat onrecht des armes, dat hy gheenen woecker ende ouerscot en ontfanct, dat hy mijn ordeelen doet, ende in mijn gheboden wandelt, dese en sal in sijns vaders boosheden niet steruen, maer sal het leuen leuen.

18

Sijn vader want hy tonrecht besculdicht heeft, ende ghewelt ghedaen sijnen broeder, ende quaet ghewracht heeft int midden sijns volcs siet die is ghestoruen in sijn boosheyt.

19

Ende ghy segt, Waerom en sal die sone sijns vaders boosheyt niet draghen? Dats daerom, want die sone heeft ordeel ende rechtuerdicheyt ghedaen, alle mijn gheboden heeft hy bewaert, ende hy heeft die ghedaen, hy sal dleuen leuen.

20

Een ziele die sondicht die sal selue steruen, die sone en sal sijns vaders boosheyt niet draghen, ⁺ende die vader en sal sijns soons boosheyt niet draghen, die rechtuerdicheyt des rechtuerdighens sal op hem sijn, ende die ongoddelijcheyt van den ongoddelijcken sal op hem sijn.

+ E

21

Maer ist dat die ongoddelijcke penitencie doet van alle zijn sonden die hy ghedaen heeft, ende dat hy alle mijn gheboden onderhoudt, ende doet ordeel ende rechtuerdicheyt, soo sal hy dleuen leuen, ende niet steruen.

22

Alle zijnder boosheden die hy ghedaen heeft, en sal ick niet ghedencken, in zijn rechtuerdicheyt die hy ghedaen heeft sal hy leuen.

23

Ist mijnen wille die doot vanden ongoddelijcken, seyt die Heere Godt, ende niet dat hy bekeert worde van zijn weghen ende leue?

24

Maer ist dat die rechtuerdighe hem affkeert van sijn rechtuerdicheyt, ende boosheyt doet, ⁺nae alle die affgrijselijcheden die een ongoddelijcke pleech te doen, sal hy leuen? alle zijn rechtuerdicheden die hy ghedaen hadde en salmen niet ghedencken, in die ouertredinghe waer doer hy ouertreden heeft, ende in sijn sonde die hy ghedaen heeft, daer in sal hy steruen.

+ F

25

Ende ghy hebt gheseyt, Den wech des Heeren en is niet rechtuerdich. Hoort dan ghy huys van Israel. En is mijnen wech niet rechtuerdich, ende en zijn niet meer v weghen quaet?

26

Want als hem die rechtuerdighe affkeert van zijn rechtuerdicheyt, ende boosheyt doet, soo sal hy daer in steruen, in die onrechtuerdicheyt die hy ghedaen heeft sal hy steruen.

27

Ende als hem die ongoddelijcke affkeert van zijn ongoddelijcheyt, die hy ghedaen heeft, ende dat hy ordeel ende rechtuerdicheyt doet, soe heeft hy zijn ziele leuende ghemaect.

28

⁺Want hy aenmerckende ende sij seluen affkeerende van alle zijn boosheden, die hy ghedaen heeft, sal dat leuen leuen, ende niet steruen.

+ G

29

Ende die kinderen van Israel segghen. Den wech des Heeren en is niet rechtuerdich. En sijn mijn weghen niet rechtuerdich ghy huys van Israel, ende en sijn niet meer uwe weghen quaet?

30

Daer om sal ick eenen ieghelijcken nae zijn weghen ordeelen ghy huys van Israel, seyt die Heere Godt, Bekeert v ende doet penitencie, van alle uwe boosheden ende die boosheyt en sal v ten valle niet wesen.

31

Werpt van v lieden alle uwe ouertredinghen, in die welcke ghy ouertreden hebt, ende maect v een nieuwe herte ende eenen nieuwen gheest, waerom suldi steruen, ghy huys van Israel?

32

Want ic en wil die doot des steruende niet, seyt die Heere Godt, keert wederom, ende leuet.