Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvij. Capittel.

1

ENde des Heeren woort is tot my gheschiet segghende.

2

⁺Sone des menschen brengt een gheraetsel voort, ende vertelt een parabel totten huyse van Israel

+ A

3

ende ghy sult segghen. Dit seyt die Heere God. Eenen grooten arent met groote vlogelen met een lanc ghetrec van leden, vol pluymen ende versceyden verwen, is totten Libanus ghecomen, ende heeft ghenomen dat merch vanden cederboom,

4

den tsop van sijnen bladeren heeft hy affghetrocken, ende heeft dien ouer-

[p. *648]

ghedraghen int lant van Chanaan, in die stadt der coopluyden heeft hy die ghestelt.

5

Ende hy heeft van des lants saet ghenomen, ende hy heeft dat in die eerde gheleyt voer saet, dat sijn wortele vast maken soude op veel wateren, in dopperste des lants heeft hy dat ghesedt.

6

Ende alst ghegroeyt was, soo ist ghewassen in eenen breederen wijngaert, van cleynder lingden sijn rancken saghen tot hem waerts, ende sijn wortelen waren onder hem, aldus ist dan eenen wijngaert gheworden, ende hi heeft rancken voertsghebrocht, ende heeft nieuwe rancken wt ghescoten.

7

⁺Ende daer is eenen anderen grooten arent gheworden, met groote vloghelen, ende veel pluymen, ende siet desen wijngaert was als sijn wortelen wtscietende tot dien, hy heeft sijn struycken tot hem wtghestrect dat hijse veruersschen soude van die groefkens sijns groeytsels.

+ B

8

In goede eerde op veel wateren is hy gheplant, dat hy looueren voertsbrenghen soude, ende vrucht draghen, dat hy tot eenen grooten wijngaert sijn soude.

9

Segt, Dit seyt die Heere Godt, Sal desen daerom voorspoet hebben? en sal hy zijn wortelen niet wt trecken ende zijn vruchten affstroopen, ende verdrooghen alle die rancken van zijnen groeytsele ende verdorren, ende niet met eenen grooten arm, ⁺noch met veel volcs dat hy die soude totten wortelen toe wttrecken?

+ C

10

Siet hy is gheplant, sal hy daer om voerspoedich wesen? ende en sal hy niet (als hem eenen berrende wint raect) verdrooghen, ende in die groefkens sijnder spruyten verdorren?

11

Ende des Heeren woert is tot my ghesciedt, segghende.

12

Segt tot dat creytende huys. En weetty niet wat dese dinghen beteekenen? Segt, Siet die coninck van Babilonien coemt in Ierusalem, ende hy sal den coninck ende sijn princen met hem nemen, ende hy salse brenghen tot hem seluen in Babilonien.

13

Ende hy sal van den sade des conincrijcs nemen, ende hy sal met hem een verbont maken, ⁺ende sal van hem eenen eedt ontfanghen, maer hy sal oock die stercke des lants wechnemen.

+ D

14

Op dat een vernedert rijck sijn soude, ende dat niet verhauen en worde, maer dat sijn verbont beware, ende dat onderhoude.

15

Die welcke van hem sceydende heeft boden ghesonden tot Egypten dat die hem peerden ende veel volcs gheuen soude. Sal hy oock voerspoedich wesen, oft salicheyt vercrijghen, die dese dinghen ghedaen heeft? ende diet verbont breect, sal hijt ontvlieden?

16

Alsoo warachtelijck als ick leue, seyt die Heere, soo sal hy in die plaetse des conincs die hem coninck ghemaect heeft, wiens eedt hy ghebroken heeft, ende het verbont ghebroken heeft dat hy met hem hadde, int midden van Babilonien steruen.

17

⁺Ende Pharao en sal teghen hem gheenen strijt maken met een groot heyr, oft met veel volcs, int legghen des dijcs, ende int oprichten der wallen om dat hy veel zielen dooden soude.

+ E

18

Want hy hadde den eedt versmaedt, om dat hy tverbont soude breken, ende siet hy heeft sijn hant ghegheuen, ende als hy alle dese dinghen ghedaen heeft, soo en sal hijt niet ontvlieden.

19

Daerom dit seyt die Heere Godt. Soe warachtelijck als ick leue, soe sal ick den eedt die hy versmaedt heeft, ende tverbondt dat hy ouertreden heeft, op zijn hooft setten.

20

⁺Ende ick sal mijn nette ouer hem wt spraeyen, ende hy sal in mijn net gheuanghen worden. Ende ick sal hem brenghen tot in Babilonien, ende daer sal ick hem ordeelen in die ouertredinghe waer mede hy my versmaedt heeft,

+ F

21

ende alle sijn vluchtighe met alle sijnen heyre sullen doert sweert vallen, maer die daer ouerblijuen, sullen in alle winden verstroyet worden, ende ghy sult weten dat ict die Heere ghesproken hebbe.

22

Dit seyt die Heere Godt, Ende ick sal nemen van dat merch des hooghen cederbooms, ende van den tsop zijnder tacken sal ick dat teer is affbreken, ⁺ende ick salt planten op den hooghen ende wtstekendenden berch.

+ G

23

Opden hooghen berch van Israel sal ick dat planten, ende het sal wt spruyten tot een spruytsel, ende tsal vrucht voertsbrenghen, ende tsal wesen tot eenen grooten Cederboom, ende onder hem sullen woonen alle die voghelen, ende alle tghevolghelte sal onder die scaduwe van zijnen bladeren nestelen.

24

Ende alle die boomen des lantscaps sullen weten dat ick die Heere den hooghen boom vernedert hebbe, ende den nederen boom verhauen hebbe, ende den groenen boom verdroocht hebbe, ende den dorren boom doen groeyen hebbe. Ick die Heere hebt ghesproken ende ghedaen.