Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺ENde des Heeren woort is tot my gheschiet segghende.

+ A

2

Sone des menschen, maect Ierusalem kenlijc allen haer affgrijselijcheden

3

ende ghy sult segghen. Dit seyt die Heere God van Ierusalem. V wortele ende v gheslachte is van dlant van Chanaan. V vader is een Amorrheus, ende v moeder is een Cethea,

4

ende doen ghy gheboren waert, opden dach uwer gheboorten, soo en is uwen nauel niet afghesneden gheweest, ende ghy en zijt niet metten water ghewasschen gheweest ter ghesontheyt, noch met soute ghesouten, noch in wendeldoecken ghewonden.

5

Die ooghe en heeft ouer v niet ghespaert, dat die v iet doen soude van desen dinghen, ws ontfermende maer ghy zijt gheworpen gheweest opt aensicht der eerden, in die verworpinghe uwer zielen, inden dach als ghy gheboren waert.

6

Ende ick neffens v voorbi gaende heb ghesien datmen v vertreedde in v bloet, ende ick heb v gheseyt als ghy in v bloet waert. Leeft, ick heb (seg ic) v gheseyt. In v bloet, leeft.

7

Ick heb v menichfuldich ghemaect als het spruytsel des velts, ende ghy zijt vermenichfuldicht ende groot gheworden, ende ghy zijt voorts ghegaen, ende zijt ghecomen tot der vrouwen cierlijcheyt, v borsten zijn opgheswollen, ende v hayr is ghegroeyt, ende ghy waert naect ende vol scandelijcheden.

8

Ende ic heb omtrent v voorby ghegaen ende ic heb v ghesien, ende siet uwen tijt was den tijt der gheender die vrijen, ende ic heb mijn cleedt ouer v ghespraeyt ende ic heb v scandelijcheyt bedect. Ende ic heb v ghesworen, ende ick heb een verbont met v aenghenomen seyt die Heere Godt, ende ghy zijt mijn gheworden.

9

Ende ick heb v met water ghewasschen, ende ick heb v bloet ghesuyuert van v, ende ick heb v met olie ghesalft.

10

Ende ick heb v ghecleedt met cleederen van versceyden verwen, ende ick heb v met Hyacinthen ghescoeyt, ende ick heb v ghegort met fijn wit lijnwaet, ⁺ende ick heb v ghecleedt met dunne cleederen.

+ B

11

Ende ick heb v verciert met een cieraet, ende ick heb ringhen in v handen ghegheuen, ende eenen halsbant om uwen hals,

12

ende heb eenen oorinck op uwen mont ghegheuen, ende ringhen uwen ooren, ende een cierlijcke croone op v hooft,

13

ende ghy zijt verciert geweest met gout ende siluer, ende ghy zijt ghecleedt gheweest met fijn lijnwaet, ende van borduerwerc, ende van veelderhande verwen, bloeme van tarwen, ende honich ende olie hebdi gheten, ende ghy zijt wtermaten seer cierlijc gheworden, ende ghy zijt gheuordert tot een conincrijck.

14

Ende uwen naem is wtghegaen tot die Heydenen, om uwer schoonheyt wille, want ghy waert volmaect door mijn cieraet dat ick op v ghesteldt hadde, seyt die Heere God.

15

Ende ghy betrouwen hebbende in v schoonhede hebt oncuyscheyt bedreuen in uwen naem, ende ghy hebt v oncuyscheyt gheboden eenen ieghelijcken die voorby ghinc, dat ghy sijne worden soudt.

16

Ende nemende van uwen cleederen hebdi v hoochden ghemaect van hier ende daer aff tsamen ghenaeyt, ende ghy hebt daer op onsuyuerheyt ghedaen ghelijc niet ghesciet en is, noch gheschieden en sal.

17

Ende ghy hebt die ghereetschap van v cieraet ghenomen van mijnen goude ende van mijnen siluere, die ick v ghegheuen hebbe, ende ghy hebt v ghemaect manlijcke beelden, ende ghy hebt daer mede oncuyscheyt bedreuen.

18

Ende ghy hebt v cleederen van versceyden verwen ghenomen, ende ghy hebt die beelden ghecleedt, ende mijn olie ende mijn ruecwerc hebdy voor hen ghestelt.

19

Ende mijn broot dat ick v ghegheuen hebbe, die tarwen bloeme, ende olie, ende honich, waer mede dat ick v opgheuoedt hebbe, ⁺die hebdi in hen aenschijn ghestelt tot eenen ruec der soeticheyt, ende tis ghesciet, seyt die Heere Godt.

+ C

20

Ende ghy hebt ghenomen v sonen, ende v dochteren die ghi my ghebaert hebt, ende ghy hebtse dien ten offer gedoodt om verslonden te worden, Is v oncuyscheyt cleyne?

21

Ghy hebt mijn kinderen ten offer ghedoodt ende ghy hebt die wijdende hen ghegheuen.

22

Ende nae alle uwe afgrijselijcheden ende oncuyscheden, soo en sijdi niet ghedachtich gheweest der daghen van uwer iongher iuecht, als ghy naect waert, ende vol bescaemtheden, vertreden in v bloet.

23

Ende tis ghesciet nae alle v quaetheyt (wee wee v seyt die heere God)

24

ende ghy hebt v een bordeel getimmert, ende ghi hebt voor v een hoeren cot ghemaect in alle straten.

25

Tot alle hoecken der weghen hebdy een teeken van uwe hoereringhe ghesteldt, ende ghy hebt v cierlijcheyt affgrijselijck ghemaect, ende ghy hebt v voeten ontploken alle den voorby gaende, ende ghy hebt v hoereringhen vermenichfuldicht.

26

Ende ghy hebt oncuyscheyt bedreuen met die sonen van Egipten uwe ghebueren, die groot van vleesche zijn, ende ghy hebt v hoereringhe vermenichfuldicht om my te verwecken tot gramscap

27

Siet ick sal mijn hant wtreycken ouer v, ende ick sal v rechtuerdich makinghe wechnemen, ende ick sal v gheuen in die zielen der gheender die v haten, der Philistijnen dochteren, die hen schamen van uwen seer misdadighen wech.

28

Ende ghi hebt ghehoereert met die sonen van Assyrien, om dat ghy noch niet versaedt en waert, ende nae dat ghy ghehoereert hadt,

[p. *647]

soo en sijdi alsoo noch niet versaedt gheweest.

29

Ende ghy hebt v oncuyscheyt vermenichfuldicht int lant van Chanaan metten Chaldeen, ende noch alsoo en sijdi niet versaedt gheweest,

30

waer mede sal ick v herte suyueren, ⁺seyt die Heere God, als ghi alle dese wercken van een ghemeyn ende ontschamel vrouwe doet?

+ D

31

want ghy hebt v bordeel ghetimmert int beghinsel van alle weghe, ende v hoochde hebdi ghemaect in alle strate, ende ghy en sijt niet gheworden als een hoere die met verdriet haren loon vermeerdert,

32

maer als een ouerspeelstere, die bouen haren man noch vreemde mannen inbrenght.

33

Alle den ghemeynen vrouwen gheeftmen loon, maer ghy hebt uwen boeleerders loonen ghegheuen, ende ghy gaeft hen ghiften dat si tot v van allen sijden incomen souden, om met v oncuyscheyt te bedrijuen.

34

Ende in v is ghesciet teghen die ghewoonte der vrouwen in v hoereringhen, ende nae v en sal gheen hoereringhe wesen, want in dien dat ghy loonen ghegheuen hebt, ende gheen loonen ontfanghen en hebt, soo is in v contrarie ghesciet.

35

Daer om ghy hoere hoort des Heeren woort.

36

Dit seyt die Heere God. Om dat v ghelt wtghestort is, ende v scandelijcheyt ontdect is in uwe oncuyscheden ouer v boeleerders, ende op die affgoden van uwe affgrijselijcheden, in uwer kinderen bloet die ghy hen ghegheuen hebt.

37

Siet ick sal alle uwe boeleerders verghaderen, met den welcken ghy hebt versaemt gheweest, ende alle die ghy lief ghehadt hebt, met alle die ghene die ghy haette, ende ick sal die ouer v vergaderen van alle sijden, ende ic sal v scandelijcheyt voor hen ontdecken, ende si sullen alle v leelijcheyt sien.

38

Ende ick sal v ordeelen met die ordeelen der ouerspeelsteren, ende die bloet wtstorten, ende ick sal v gheuen totten bloede der rasender gramscap ende der grammer liefden.

39

⁺Ende ick sal v in den hant gheuen, ende si sullen v bordeel bederuen, ende v hoeren cot affbreken, ende si sullen v blooten van uwen cleederen, ende si sullen wech nemen die ghereetscappen van uwe cierlijcheyt, ende v naect laten, ende vol versmaetheyt.

+ E

40

Ende si sullen op v een menichte brenghen, ende si sullen v met steenen steenighen, ende met haren sweerden dootslaen.

41

Ende sij sullen v huysen metten viere verbranden, ende sullen in v ordeelen doen in die ooghen van veel vrouwen ende ghy sult ophouden van oncuyscheyt te bedrijuen, ende ghy en sult voorts gheen loonen meer gheuen.

42

Ende mijn verbolgentheyt sal rusten in v, ende mijn gramme liefde sal van v wech ghenomen worden, ende ick sal rusten, ende ic en sal niet meer gram wesen,

43

om dat ghy niet en hebt gedachtich geweest der daghen van uwer ioncheyt, ende hebt my vergramt in alle dese dinghen, daerom heb ick v weghen oock op v hooft ghegheuen, seyt die Heere Godt, ende ick en heb niet ghedaen nae uwe boose misdaden in alle uwe affgrijselijcheden.

44

Siet alle die een ghemeyn segwoort seydt, die sal dat op v aen nemen segghende. Ghelijc die moeder, alsoo is haer dochter ooc.

45

Ghy zijt ws moeders dochter, die haren man verworpen heeft, ende haer kinderen, ende ghy zijt een suster uwer susteren, die hen mans ende hen kinderen verworpen hebben.V moeder was een Cetheussche ende v vader was een Amorreus.

46

Ende v outste suster is Samaria, si ende haer dochteren die aen v slincke sijde woonen, ende v suster die iongher is dan ghy de aen v rechte sijde woont is ⁺Sodoma ende haer dochteren.

+ F

47

Maer ghy en hebt oock in haerlieder wech niet ghewandelt, noch ghy en hebt nae hen boose misdaden niet ghedaen een luttelken min, maer ghy hebt byna booser misdaden ghedaen dan si, in allen uwe weghen.

48

Alsoo warachtelijck als ick leue seyt die Heere Godt, soo en hebben v suster Sodoma ende haer dochteren selue niet ghedaen, ghelijck ghy ghedaen hebt ende uwe dochteren.

49

Siet dit was die boosheyt van Sodoma uwer suster, hoouerdie, versaetheyt van broode, ende oueruloedicheyt, ende haer ende haer der dochteren ledicheyt, ende si en reycten den armen ende behoeftighen die hant niet.

50

Ende si zijn verhauen gheweest, ende si hebben afgrijselijcheden voor my ghedaen, ende ick hebse wech ghenomen alsoo ghy ghesien hebt.

51

Ende Samaria en heeft die helicht van uwen sonden niet ghesondicht, maer ghy hebtse te bouen ghegaen met uwen grooten misdaden, ende ghy hebt v susteren gherechtuerdicht, in alle uwe affgrijselijcheden, die ghy ghedaen hebt.

52

Daerom draecht ghy oock uwe bescaemtheyt, die v susteren te bouen ghegaen zijt met uwen sonden, booselijcker doende dan si, want si zijn gherechtuerdicht van v, daerom wert ghy ooc bescaemt ende draecht v scandelijcheyt, die v susteren gherechtuerdicht hebt

53

Ende ick salse bekeeren die wederom stellende met die bekeeringhe der Sodomiten met haren dochteren, ende met die bekeeringhe van Samarien ende haer dochteren, ⁺ende ick sal v wederkeeringhe bekeeren int midden van haerlieden,

+ G

54

op dat ghy v scandelijcheyt draghet, ende dat ghy beschaemt moecht worden, in alle die dinghen die ghy ghedaen hebt, die vertroostende.

55

Ende v suster Sodoma ende haer dochteren sullen wederom keeren tot haren ouden staet, ende Samaria ende haer dochteren sullen wederom comen tot haren ouden staet, ende ghi ende v dochteren sult wederom keeren tot uwen ouden staet.

56

Maer Sodoma v suster en is niet ghehoort gheweest in uwen mont, inden dach van uwer hoouerdien,

57

eer uwe quaetheyt ontdect worde, ghelijck in desen tijt, tot een verwijt der dochteren van Syrien, ende alle der dochteren van die Palestijnen rontsomme v, die v omringhen int ronde.

58

V groote misdaet ende v scandelijcheyt hebt ghy ghedraghen, seydt die Heere Godt,

59

Want dit seyt die Heere God. Ende ic sal v doen ghelijc ghy den eedt versmaedt hebt, dat ghy tverbont breken soudt

60

ende ick sal ghedachtich wesen mijns verbonts met v in die daghen uwer ioncheyt, ende ick sal v een eewich verbont verwecken.

61

Ende ghy sult uwer weghen ghedachtich zijn, ende sult beschaemt worden, als ghy ontfanghen sult v susteren die ouder zijn dan ghy, met den ghenen die iongher zijn, ende ick salse v gheuen tot dochteren, maer niet wt uwen verbonde.

62

Ende ick sal mijn verbont met v verwecken, ende ghy sult weten dat ick Heere ben,

63

op dat ghi ghedencken moecht, ende bescaemt worden, ende dat ghy niet meer en hebt om den mont open te doen van uwer bescaemtheyt, als ick v sal versoent zijn in alle dat ghy ghedaen hebt, seyt die Heere Godt.