Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺ENde tot my sijn ghecomen die mannen der ouderen van Israel, ende sij hebben voor my gheseten.

+ A

2

Ende dwoort des Heeren is tot my ghesciet segghende.

3

Sone des menschen dese mannen hebben hen onsuyuerheden ghestelt in hen herten, ende die arghernisse van hen boosheyt hebben sij ghestelt teghen hen aensicht, sal ic ghevraecht sijnde hen antwoorden?

4

Daerom spreect hen ende ghi sult tot hen segghen. Dit seyt die Heere God. Die mensch, die mensch van Israels huyse, die zijn onreynicheden ghesteldt heeft in sijn herte, ende die de arghernisse van zijn boosheyt ghestelt heeft teghen sijn aensicht, ende coemt totten propheet vraghende my door hem. Ic die Heere sal hem antwoorden nae die menichte sijnder onsuyuerheden,

5

⁺op dat het huys van Israel gheuanghen worde met hen herte, waer mede sij van my ghesceyden zijn, in allen hen affgoden.

+ B

6

Daerom segt totten huyse van Israel. Dit seydt die Heere Godt. Keert wederom ende gaet wech van uwen affgoden, ende van alle uwe besmettinghen keert v aensichten aff,

7

want die mensch, die mensch van Israels huys, ende vanden bekeerden Heydenen soo wie een aencomelinc is in Israel, ist dat hy van my verureemt wert, ende dat hy sijn affgoden steldt in sijn herte, ende dat hy die arghernisse sijnder boosheyt stelt tseghen sijn aensicht, ende dat hy coemt tot eenen propheet, om te vraghen door hem. Ick die Heere sal hem antwoorden door my,

8

Ende ick sal mijn aensicht stellen op dien mensch, ende ick sal hem maken tot een exempel, ⁺ende tot een ghemeyn segwoort, ende ic sal hem vernielen wt dat midden mijns volcs, ende ghy sult weten dat ick die Heere ben.

+ D

9

Ende als die propheet ghedoelt heeft, ende een woort ghesproken heeft. Ick die Heere heb dien propheet bedroghen, ende ick sal mijn hant op hem wtsteken, ende hem te niet doen van mijnen volcke Israhel.

10

Ende sij sullen hen boosheyt draghen, nae die boosheyt des vraghers, soo sal die boosheyt vanden prophete wesen.

11

Op dat het huys van Israel van my niet meer en dole noch besmet en worde in allen hen ouertredinghen, maer dat sij my wesen moghen tot een volck, ende dat ick henlieden zijn soude tot eenen Godt, seyt die Heere der heyrscaren.

12

Ende des Heeren woort is tot my gheschiet segghende.

13

Sone des menschen, als een lant my sondicht alsoo dattet ouertredende ouertredet, ⁺soo sal ic mijn hant daer op wtreycken, ende ick sal die roede sijns broots vernielen, ende ick sal daer in seynden den hongher, ende ick sal van haer dooden den mensch ende dat behelpich vee.

+ E

14

Ende ist dat dese drij mannen int midden van haer sijn Noe Daniel ende Iob, dese sullen door hen rechtuerdicheyt hen zielen verlossen, seydt die Heere der heyrscaren.

15

Ist dat ick die quaetste beesten brenghe op dlant, dat ict verderuen soude, ende dattet onwandelbaer gheworden si, om datter niemant door en gaet om der beesten wille,

16

Ist dat dese drij mannen daer in zijn, soo warachtelijck als ick leue seyt die Heere God, si en sullen noch sonen noch dochteren verlossen, maer si sullen alleen verlost worden, maer dlant sal verwoest worden.

17

Oft ist dat ic tsweert op dat lant brenghe ende dat ic den sweerde segghe. Gaet voorts door dlant, ⁺ende dat ic van dien lande verstae den mensch ende dat vee.

+ F

18

Ende dat dese drij mannen int midden van dat lant sijn. Alsoo waerlijck als ick leue seydt die Heere Godt, si en sullen noch sonen noch dochteren verlossen, maer si sullen alleen verlost worden.

19

Maer ist dat ic die pestilencie sende op dat lant, ende dat ic mijn verbolghentheyt op haer wtstorte door tbloet, dat ic van die wech nemen soude den mensche ende dat vee,

20

Ende dat Noe Daniel ende Iob int midden van dat lant zijn. Alsoo warachtelijck als ick leue seydt die Heere Godt, sij en sullen noch sone noch dochter verlossen, maer sij sullen in hen rechtuerdicheyt hen zielen verlossen,

21

want dit seyt die Heere Godt. Ist oock dat ick mijn vier quaetste ordeelen, het sweert, ende den hongher, ende die quade beesten, ende die pestilencie sende op Ierusalem om dat ick van haer verslaen soude den mensche ende

[p. *646]

dat vee,

22

⁺Nochtans sal in haer ghelaten worden een behoudenisse der gheender die sonen ende dochteren wtleyden, siet dese sullen tot v lieden wtcomen, ende ghi sult haerlieder wech sien, ende hen vonden, ende ghy sult vertroost worden ouer tquaet dat ick ghebracht hebbe in Ierusalem, in alle tgene dat ic inghebracht hebbe op haer.

+ G

23

Ende sij sullen v troosten als ghy haerlieder wech sult ghesien hebben, ende hen vonden, ende ghy sult bekennen dat ick niet te vergheefs ghedaen hebbe, alle tghene dat ick in haer ghedaen hebbe, seyt die Heere Godt.