Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺ENde dwoort des Heeren is tot my ghesciet segghende.

+ A

2

Sone des menschen propheteert tot die propheten van Israel, die propheteren, ende ghy sult hen segghen die wt hen eyghen herte propheteren. Hoort des Heeren woort.

3

Dit seyt die Heere God. Wee den dwasen propheten die haren gheest volghen, ende niet en sien.

4

Als vossen in die woestijne soo waren v propheten Israel,

5

ghy en hebt niet teghen opgheclommen, noch ghy en hebt gheenen muer teghen ghestelt voor thuys van Israel, dat ghy inden strijt staen soudt inden dach des Heeren.

6

Sij sien ydel dinghen, ende sij propheteren loghenen, segghende. Die Heere seyt, daer die Heere hen niet ghesonden en heeft, ⁺ende sij hebben ghestadich ghebleuen het woort te vestighen.

+ B

7

En hebdy niet een ydel visioen ghesien, ende een loghenachtige prophetie ghesproken? ende ghy segt. Die Heere seyt, daer ic niet ghesproken en hebbe.

8

Daerom dit seyt die Heere God, om dat ghi ydel dinghen ghesproken hebt, ende loghenen ghesien. Daerom siet ic come tot v lieden seyt die Heere God.

9

Ende mijn hant sal zijn op die propheten die ydel dinghen sien, ende logenen propheteren, in mijns volcs raet en sullen si niet wesen, ende int ghescrifte des huys van Israel en sullen sij niet ghescreuen worden, noch sij en sullen int lant van Israel niet comen, ende ghi sult weten dat

[p. *645]

ick die Heere God ben.

10

Om dat sij mijn volc bedroghen hebben segghende. Vrede, ende ten is gheenen vrede, ende hy heeft den wandt opghericht, ende sij beplacten dien met leem sonder caf.

11

Segt tot hen die sonder beslach placken dat den wandt vallen sal, want daer sal eenen oueruloedende reghen wesen, ende ick sal ouergroote steenen gheuen van bouen daer op vallende ende den verstroeyende storm wint,

12

want voorwaer siet den wandt is gheuallen, en salt v niet gheseyt worden waer is die plackerie die gheplact hebt?

13

Daerom dit seyt die Heere God. Ende ick sal doen wtbersten den gheest der tempeesten in mijn verbolghentheyt, ende eenen oueruloeude plasreghen sal in mijn rasende gramscap wesen, ende groote steenen in mijnen torn tervernielinghen.

14

Ende ick sal den wandt breken den welcken ghy gheplact hebt sonder beslach, ende ick sal dien der eerden effen ghelijc maken, ende zijn fundament sal ontdect worden, ⁺ende hy sal vallen, ende hy sal vernielt worden int midden van haer, ende ghy sult weten dat ick die Heere ben.

+ C

15

Ende ic sal mijn verbolgentheyt volbrenghen inden wandt, ende in die ghene die hem placken sonder beslach, ende ick sal tot v lieden segghen. Den wandt en is niet, ende sij en zijn niet die dien placken.

16

Die propheten van Israhel die tot Ierusalem propheteren, ende haer sien het visioen des vreedts, ende ten is gheenen vrede seyt die Heere God.

17

Ende ghi sone des menschen stelt v aensicht teghen die dochteren ws volcs, die wt hen herte propheteren, ende propheteert ouer die,

18

ende segt. Dit seyt die Heere God. Wee den ghenen die cussenen te samen naeyen onder alle ellenboghe vander hant, ende oorcussenen maken onder die hoofden van alle ouderdom om zielen te vanghen, ende als sij die zielen mijns volcks vinghen, soo maecten sij hen zielen leuende.

19

Ende sij ontheylichden my tot mijnen volcke, om een handtvol ghersten, ende een stuck broots, om dat sij dooden souden die zielen die niet en steruen, ⁺ende leuende maken die zielen die niet en leuen, lieghende mijnen volcke dat den loghenen ghelooft.

+ D

20

Daerom dit seyt die Heere God. Siet ick tot v cussenen met die welcke ghi die vlieghende zielen vanghet, ende ick sal die verscoeren van uwen armen, ende ick sal die zielen vrijlaten, die ghilieden vanghet, die zielen om te vlieghen.

21

Ende ick sal v lieder oorcussenen verscooren, ende ick sal mijn volc verlossen wt v hant, noch sij en sullen voorts niet meer in v handen wesen om te roouen, ende ghy sult weten dat ic die Heere ben.

22

Om dat ghy therte des rechtuerdighens hebt doen trueren valschelijck, den welcken ick niet bedroeft en hebbe, ende hebt die handen vanden ongoddelijcken versterct, dat hy niet wederkeeren en souden van sijnen quaden weghe ende leuen.

23

Daerom en suldi gheen ydel dinghen sien, ende ghy en sult voorts gheen prophetien meer propheteren, ende ick sal mijn volc verlossen wt v lieder hant, ende ghy sult weten dat ick die Heere ben.