Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺ENde des Heeren woort is tot my gheschiet segghende.

+ A

2

Sone des menschen, ghi woont int midden van dat creytende huys die ooghen hebben om te sien, ende niet en sien, ende ooren om te hooren, ende en hooren niet, want het is een creytende huys.

3

Daerom ghy sone des menschen maect voor v ghereetscappen der oueruoeringhen, ende ghy sultse oueruoeren inden dach voor henlieden, ende ghy sult verhuysen van v plaetse tot een ander plaetse, voor hen aenscouwen, oft sijt by auontueren aensaghen, want het is een creytende huys.

4

Ende ghy sult uwen huysraet buyten wtdraghen, als den huysraet van eenen die vertrect inden dach voor hen aenscouwen, ⁺maer ghi sult des auonts wtgaen voor henlieden ghelijc een die verhuyst wtghaet.

+ B

5

Voor hen ooghen doorbreect v den wandt, ende ghi sult daer door gaen,

6

In hen aenscouwen suldi op die scouderen ghedraghen worden, in die donckerheyt suldi wtghedraghen worden, ghy sult v aensicht bedecken, ende ghy en sult die eerde niet sien, want ick heb v tot een wonderlijc teeken ghegheuen den huyse van Israel.

7

Hierom heb ick ghedaen alsoo hy my gheboden hadde. Ic heb mijn ghereetscappe wtghebracht als die ghereetscappen van eenen die vertrect by daghe, ende des auonts heb ick voor my den wandt doorbroken metter hant, ende in die duysterheyt ben ick wtghegaen, ende op die scouderen ghedraghen voor hen aenscouwen.

8

⁺Ende des Heeren woort is tot my ghesciet des morghens segghende.

+ C

9

Sone des menschen en heeft dat huys van Israel dat creytende huys niet gheseyt. Wat maecti?

10

Segt tot hen. Dit seyt die Heere Godt.Op den vorst die in Ierusalem is, is desen last ende op alle thuys van Israel, dat int midden van henlieden is.

11

Segt. Ick ben v voorteeken, Alsoo ick ghedaen hebbe soe sal v ghescieden sij sullen ter veruoeringhen ende gheuanghenisse gaen.

12

Ende die prince die int midden van henlieden is sal op die scouderen ghedraghen worden, int die duysterheyt sal hy wtgaen, sij sullen den wandt doorgrauen om hem wt te leyden, zijn aensicht sal bedect worden, dat hy die eerde metten ooghen niet en sie.

13

⁺Ende ick sal mijn net ouer hem wtspraeyen, ende hy sal gheuanghen worden in mijn net, ende ick sal hem brenghen in Babilonien inder Chaldeen lant, ende dat en sal hy niet sien ende daer sal hy steruen.

+ D

14

Ende alle die omtrent hem sijn, sijn helpe, ende alle sijn heyren, sal ick verstroeyen in alle winden, ende tsweert sal ick achter hen wter sceyden trecken.

15

Ende sij sullen weten dat ic die Hee ben, als ick die sal verstroeyt hebben onder die Heydenen, ende dat icse sal al om ghesaeyt hebben in die landen.

16

Ende ick salder van henlieden een luttel mannen achter laten van tsweert, ende vanden hongher, ende van die pestilencie, op dat sij allen hen groote misdaden vertellen moghen onder die Heydenen tot die welcke sij ingaen sullen, ende si sullen weten dat ick die Heere ben.

17

Ende des Heeren woort is tot my ghesciet segghende.

18

Sone des menschen, eedt v broot in verstoortheyt, ende v water drinct met haesticheyt ende trueringhe.

19

Ende ghy sult segghen totten volcke des lants. Dit seyt die Heere God tot hen die in Ierusalem woonen int lant van Israel. Hen broot sullen sij met sorchuuldicheyt eten, ende hen water sullen si in die verlatenheyt drincken, op dat het lant verlaten worde van zijn menichte, om die boosheyt van alle die ghene die daer in woonen.

20

⁺Ende die steden die nv bewoont werden sullen verwoest wesen, ende dlant verlaten, ende ghy sult weten dat ick die Heere ben.

+ F

21

Ende des Heeren woort is tot my ghesciet segghende.

22

Sone des menschen. Wat ghemeyn segghen is dit v lieden int lant van Israel der gheender die segghen. Die daghen sullen noch langhe wtghestelt worden, ende alle visioen sal vergaen.

23

Daerom segt tot hen. Dit seyt die Heere Godt. Ic sal dit ghemeyn woort doen rusten, noch men salt voortaen niet meer ghemeynlijc segghen in Israel, ende spreect tot hen dat die daghen aenghecomen sijn, ende dwoort van alle visioen,

24

Want alle visioen en sal voortaen niet meer ydel zijn, ⁺noch die prophetie twijfelachtich int midden der kinderen van Israel,

+ G

25

want ick die Heere sal spreken, ende soo wat woort dat ic spreken sal, dat sal ooc ghescieden, ende het en sal niet meer langhe wtghestelt worden, maer in uwe daghen ghy creytende huys sal ick een woort spreken, ende ick sal dat doen, seyt die Heere God,

26

Ende dwoort des Heeren is tot my ghesciet segghende.

27

Sone des menschen Siet het huys van Israel der gheender die segghen. Het visioen dat dese siet, is te veel daghen ende tot langhen tijt ghepropheteert dese.

28

Daerom segt tot henlieden. Dit seyt die Heere God. Alle mijn woort en sal voortaen niet meer lange vertrecken, dwoort dat ick ghesproken sal hebben, dat sal volbracht worden seyt die Heere.