Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺ENde den gheest heeft my opgehauen, ende heeft my inghebracht tot die oostersche poorte van des Heeren huys die teghen der sonnen opganck siet, ende siet inden inganck der poorten waren vijuentwintich mannen, ende ick heb ghesien int midden van hen Iezoniam Azurs sone, ende Pheltiam Banaias sone die princen des volcs.

+ A

2

Ende hy heeft tot my gheseyt. Sone des menschen, dit sijn die mannen die boosheyt dencken, ende tracteren eenen alderquaetsten raet in dese stadt,

3

segghende. En zijn die huysen niet hier voortijts ghetimmert? dits den metalen pot, ende wij zijn tvleesch.

4

Daerom propheteert van henlieden, propheteert ghy sone des menschen.

5

Ende den gheest des Heeren is in my gheuallen ende heeft tot my gheseyt. Spreect. Dit seyt die Heere. Also hebdi gesproken ghy huys van Israel, ende ick kenne die ghedachten van v lieder herten.

6

Ghi hebter seer vele ghedoot in dese stadt, ende ghy hebt haer weghen met verslagenen veruult.

7

Daerom seyt dit die Heere God. V verslaghene die ghy int midden van haer ghestelt hebt, ⁺die sijn het vleesch, ende dit is den metalen pot, Ende ick sal v lieden leyden wt dat midden van haer.

+ B

8

Ghy hebbet tsweert gheureest, ende ick sal tsweert ouer v brenghen seyt die Heere God.

9

Ende ick sal v lieden wtdrijuen wt dat midden van haer, ende ick sal v leueren inder vianden handen, ende ick sal in v lieden ordeelen doen,

10

Metten sweerde suldi vallen, in die palen van Israel sal ick v lieden ordeelen, ende ghy sult weten dat ick die Heere ben.

11

Dese en sal v lieden niet wesen tot eenen metalen pot, ende ghy en sult int midden van haer niet wesen tot vleesche, in die palen van Israel sal ick v ordeelen.

12

Ende ghy sult weten dat ick die Heere ben, want ghy en hebt in mijn gheboden niet ghewandelt, ende mijn ordeelen en hebdi niet ghedaen, maer nae die rechten der Heydenen die rontsomme v sijn, hebdi ghedaen

13

Ende tis ghesciet doen ick propheteerde dat Pheltias Banaias sone ghestoruen is, ende ick heb op mijn aensicht gheuallen roepende met luyder stemmen, ende ic heb gheseyt. Wee, wee, wee, Heere Godt, ⁺maecte ghy een voleyndinghe der bleuelinghen van Israel?

+ C

14

Ende des Heeren woort is tot my ghesciet segghende.

15

Sone des menschen v broeders v naeste mannen, ende alle thuys van Israel, alle den welcken die bewoonders van Ierusalem gheseyt hebben. Gaet verre van den Heere, dlant is ons ghegheuen tot een besittinghe.

16

Daerom dit seyt die Heere Godt. Om dat icse verre ghedaen hebbe onder die Heydenen, ende want icse verstroeyt hebbe in die landen, so sal ic hen wesen tot een cleyn heylichmakinghe in die landen, tot die welcke sij ghecomen zijn.

17

Daerom spreect. Dit seyt die Heere God. Ic sal v lieden vergaderen van die volcken, ende versamen van die landen in die welcke ghy verstroeyt zijt, ende ic sal v lieden gheuen die eerde van Israel,

18

Ende sij sullen daer in gaen, ende sij sullen alle die arghernissen, ende alle die afgrijselijcheden wech nemen van haer,

19

Ende ick sal hen een herte gheuen ende eenen nieuwen gheest sal ick in hen binnenste gheuen, ⁺ende ic sal dat steenen herte van haerlieden vleesche wech nemen, ende ick sal hen een vleeschachtich herte gheuen

+ D

20

op dat sij in mijn gheboden wandelen ende mijn ordeelen bewaren, ende die doen, ende dat sij my sijn moghen tot een volc, ende ick hen tot een Godt sij.

[p. *644]

21

Der welcker herte wandelt nae die verargernissen ende nae hen affgrijselijcheden, deser wech sal ic op hen hooft stellen, seyt die Heere Godt.

22

Ende die Cherubims hebben hen vloghelen opghehauen, ende die raderen met hen, ende die glorie van Israels Gods was bouen die,

23

Ende die glorie des Heeren is opgheclommen van dmidden der stadt, ende heeft ghestaen opden berch die aen die oostsijde vander stadt is.

24

Ende den gheest heeft my opghehauen, ende ghebracht in dlant van Chaldeen tot die oueruoeringhe, in een visioen in Gods gheest, ende het visioen dat ic ghesien hadde is van my wech ghenomen.

25

Ende ick hebbe tot die oueruoeringhe ghesproken alle des Heeren woorden die hy my ghetoont hadde.