Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺ENde ic heb ghesien, ende siet int firmament datter was opt hooft vanden cherubims als eenen Saphier steen, als die ghedaente van die ghelijckenisse eens throons heeft daer bouen ghesien geweest

+ A

2

Ende hy heeft gheseyt totten man die met lijnwaet ghecleedt was ende seyde. Gaet binnen int midden van die ra-

[p. *643]

deren die onder die Cherubims zijn, ende vult v hant met die colen des viers die tusschen die Cherubims sijn, ende stort die wt op die stadt. Ende hy is daer inghegaen voor mijn aenscouwen,

3

ende die Cherubims stonden aen die rechte sijde des huys als die man daer in ghinck, ende een wolcke heeft dbinnenste voorhof veruult.

4

Ende die glorie des Heeren is opghehauen bouen den Cherub aenden dorpel des huys, ende het huys is veruult gheweest met die wolcke, ende dat voorhoff is veruult gheweest met die claerheyt van des Heeren glorie.

5

Ende tgheluyt van die vloghelen der Cherubims worde ghehoort tot dat buytenste voorhoff ghelijck die stemme Godts almachtich sprekende,

6

⁺Ende als hy gheboden hadde den man die met lijnwaet ghecleedt was, segghende. Neemt vier wt dat midden der raderen die tusschen die Cherubims sijn soo is hy daer in ghegaen ende heeft ghestaen by dat radt.

+ B

7

Ende eenen Cherub heeft zijn hant wtghesteken wt dat midden der Cherubims totten viere datter was tusschen die Cherubims, ende hy heuet ghenomen, ende heuet in die hant ghegheuen des gheens die met lijnen cleederen ghecleet was, die welcke dat nemende is wtghegaen.

8

Ende in die Cherubims openbaerde die ghelijckenisse van eens menschen hant onder hen vloghelen,

9

ende ick heb ghesien ende daer waren vier raderen bi die Cherubims het een radt was by den eenen Cherub, ende dander radt by den anderen Cherub, ende die ghedaente der raderen was als tgesichte vanden Chrysolitus steen,

10

ende het aensien van dien was een ghelijckenisse van die viere, als ofter een radt ware in midden van een ander radt.

11

Ende als sij wandelden, soo ghinghen si aen vier sijden, ende si en keerden niet wederom als sij wandelden, ⁺maer tot der plaetsen waer toe hy wijcte om te ghane, die dierste was, derwaerts volchden ooc die andere, ende si en keerden niet wederom.

+ C

12

Ende alle hen lichamen ende hen halsen ende handen, endevloghelen ende omringhen waren vol ooghen, int ronde der vier raderen.

13

Ende dese raderen heeft hy ghenoemt omrollende daer ict hoorde,

14

maer dat eene hadde vier aensichten, het een aensicht was eens Cherubs aensicht, ende het tweede aensicht was eensmenschen aensicht, ende int derde was eens leews aensicht, ende int vierde eens arents aensicht.

15

Ende die Cherubims zijn opghehauen, het is tselue dier dat ic ghesien hadde by den vloet Chobar,

16

Ende als die Cherubims wandelden, soo ghinghen die raderen oock te samen neffens die, ende als die Cherubims hen vloghelen ophieuen, dat sij vander eerden souden opghehauen worden, soo en rusten die raderen niet, maer sij waren daer ooc neffens.

17

Als die stonden, soo stonden sij, ⁺ende metten verhauenen worden si verhauen, want den gheest des leuens was in die.

+ D

18

Ende die glorie des Heeren is wtghegaen vanden dorpel des tempels, ende heeft ghestaen op die Cherubims.

19

Ende die Cherubims hen vloghelen opheffende zijn verhauen gheweest vander eerden voor my, Ende als die wtghinghen, soo zijn die raderen oock nae gheuolcht, ende het heeft ghestaen inden inganc van die poorte van des Heeren huys die oostwaerts was, ende die glorie des Gods van Israel was daer ouer haer.

20

Dit is tselue dier dat ic ghesien hebbe onder den God van Israel by den vloet Chobar, ende ick heb verstaen dattet Cherubims waren.

21

Vier aensichten hadde het eene, ende vier vloghelen het eene, ende die ghelijckenisse van eens menschen hant was onder hen vloghelen.

22

Ende die ghelijckenisse van haren aensichten, was als die selue aensichten die ick ghesien hadde by den vloet Chobar, ende het ghesichte ende tghedruysch van elck besonder was voor zijn aensicht gaen.