Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺ENde hy heeft gheroepen in mijn ooren met een groote stemme segghende. Die besoeckinghen der stadt zijn nae by ghecomen, ende een ieghelijc heeft zijn instrument der doodinghen in zijn hant,

+ A

2

Ende siet daer quamen ses mannen vanden wech der ouerster poorten, die noortwaerts siet ende een ieghelijcs instrument der doodinghe was in zijn handt. Oock wasser int midden van hen een man met lijnwaet ghecleedt, ende eens scrijuers inckpot was aen zijn lendenen, ende sij zijn binnen ghegaen, ende hebben ghestaen neffens den metalen outaer.

3

Ende die glorie des Heeren van Israel is opghenomen vanden Cherub, die op hem was aen den dorpel des huys, ⁺ende hy heeft den man gheroepen die met lijnwaden cleederen ghecleedt was, ende hadde eens scrijuers inckpot aen zijn lendenen

+ B

4

Ende die Heere heeft tot hem geseyt. Gaet voorts door dmidden der stadt, int midden van Ierusalem, ende teekent Thau op die voorhoofden der mannen die suchten ende rouwich zijn ouer alle die affgrijselijcheden die int midden van haer ghescieden.

5

Ende hy heeft dien gheseyt, dat ict hoorde. Ghaet voorts door die stadt hem volghende ende slaet, en laet v ooghe niet sparen, noch en hebt gheen bermherticheyt

6

Den ouden man, den ionghelinck, ende die maghet die cleyn kinderkens, ende die vrouwen slaet doot, totten laetsten mensch toe,⁺, maer alle die ghene opden welcken ghy Thau siet, en slaet niet doodt, ende beghint van mijn heylighe plaetse. Hierom hebben sij begonst vanden ouderen die voor des huys aensicht waren.

+ C

7

Ende hy heeft tot hen gheseyt. Besmet het huys, ende vult die voorhouen met die verslaghene gaet wt. Ende sij zijn wtghegaen, ende sij sloeghen die ghene die in die stadt waren.

8

Ende als den slach voldaen was, soo ben ick ouerghebleuen, ende ick heb op mijn aensicht gheuallen, ende al roepende segghe ic. Wee, wee, wee, Heere Godt. Suldi dan verderuen alle die bleuelinghen van Israel, wtstortende v rasende gramscap op Ierusalem?

9

Ende hi heeft tot my gheseyt. ⁺Die boosheyt des huys van Israel ende Iuda is bouen maten seer groot, ende die eerde is veruult met bloeden, ende die stadt is vol gheworden van affkeeringhe, want sij hebben gheseyt. Die Heere heeft dlant verlaten, ende die Heere en siet niet.

+ D

10

Daerom en sal mijn ooghe niet sparen, noch ick en sal niet ontfermen, ick sal haren wech op hen hoofden keeren.

11

Ende siet die man die met lijnwaet ghecleedt was, die den inckpot hadde op sijnen rugghe, heeft een woort ghesproken segghende. Ic heb ghedaen alsoo ghy my gheboden hadt.