Den gheheelen Bybel, Inhoudende het oude ende nieuwe Testament (Leuvense bijbel 1548)

[p. *642]

Dat .viij. Capittel.

1

⁺ENde tis gheschiet int seste iaer, in die seste maent, inden vijfsten dach der maent, dat ic sadt in mijn huys, ende die ouders van Iuda saten voor my, ende daer viel des Heeren Gods hant op my.

+ A

2

Ende ick heb ghesien, ende siet een ghelijckenisse als een aensien des viers, van die ghedaente zijnder lendenen ende beneden wast vier, ende van zijn lendenen ende opwaerts, waert als een ghedaente des claerscijnsels, als die ghedaente van fijn blinckende metael.

3

⁺Ende een wtghesonden ghelijckenisse van eender hant heeft my ghegrepen metten hayrulechten mijns hoofts ende den gheest heeft my opghehauen tusschen die eerde ende den hemel, ende hy heeft my ghebracht in Ierusalem door Gods visioen, by die binnenste doere, die ten noorden waerts sach, daer den affgodt der Ialoursheyt ghesteldt was om den torn te verwecken.

+ B

4

Ende siet die glorie des Heeren van Israel was daer, nae dat visioen dat ick ghesien hadde opt velt.

5

Ende hi heeft tot my gheseyt. Sone des menschen heft v ooghen op totten wech van noorden, ende ick hebbe mijn ooghen opghehauen tot den wech van noorden, ⁺ende siet vanden noorden van die poorte des outaers was den affgodt der ialoursheyt inden inganc.

+ C

6

Ende hi heeft tot my gheseyt. Sone des menschen meyndi ooc dat ghi siet wat dese doen, die groote afgrijselijcheden, die thuys van Israel hier doet, dat ick verre gaen soude van mijn heylighe plaetse? Ende omghekeert sijnde suldi noch meerder affgrijselijcheden sien.

7

Ende hy heeft my binnen gheleyt tot die doere des voorhofs ende ic heb ghesien, ende siet daer was een gat inden wandt

8

⁺Ende hy heeft tot my gheseyt. Sone des menschen doorgraeft den wandt, ende als ic den wandt doorgrauen hadde soo is daer een doere ghesien.

+ D

9

Ende hi heeft tot my gheseyt. Gaet binnen ende besiet die alderquaetste affgrijselijcheden die dese hier doen.

10

Ende binnen ghecomen sijnde heb ic ghesien, ende siet alderhande ghelijckenisse van cruypende dieren, ende die affgrijselijcheyt der beesten, ende alle die affgoden des huys van Israel, waren ghescildert opden wandt rontsomme ouer al.

11

Ende tseuentich wannen van die ouders des huys van Israel, ⁺ende Iezonias Saphans sone stont int midden van henlieden der gheender die daer stonden voor die scilderien, ende een ieghelijck hadde een wieroocvat in zijn hant, ende eenen domp des neuels ghinc op van dat wieroock.

+ E

12

Ende hy heeft tot my gheseyt. Voorwaer sone des menschen, ghy siet wat die ouders des huys van Israel doen in die duysternisse, een ieghelijc int heymelijc van zijnder slaepcamer, want sij segghen. Die Heere en siet ons niet, die Heere heuet dlant verlaten,

13

Ende hy heeft tot mi gheseyt. Noch omghekeert sijnde suldi meerder affgrijselijcheden sien die dese doen.

14

⁺Ende hy heeft my binnen gheleyt door die doere van des Heeren huys, die noortwaerts sach, Ende daer saten die vrouwen bescreyende Adonidem.

+ F

15

Ende hy heeft tot my gheseydt. Voorwaer ghy sone des menschen hebbet ghesien, maer omghekeert sijnde suldi affgrijgrijselijcheden sien noch meerder dan dese.

16

Ende hy heeft my binnen gheleydt in dat voorhoff van des Heeren huys binnen. Ende siet in die doere van des Heeren tempel tusschen dat portael ende den outaer waren als vijuentwintich mannen hebbende die rugghen teghen des Heeren tempel, ⁺ende hen aensichten ten oosten, ende si aenbaden teghen den opganc der sonnen.

+ G

17

Ende hy heeft tot my gheseyt. Voorwaer ghy sone des menschen hebbet ghesien, is dat den huyse van Iuda licht, dat si dese affgrijselijcheyt doen souden, die sij hier ghedaen hebben, dat sij die eerde met boosheden veruullende omghekeert zijn om my te creyten? ende siet sij brenghen eenen tack tot haren noese.

18

Daerom sal ict oock doen in die rasende gramscap, mijn ooghe en sal niet sparen, noch ick en sal niet ontfermen, ende als si roepen tot mijn ooren met luyder stemmen, soo en sal ickse niet verhooren.