Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺ENde des Heeren woort is tot my gheschiet segghende.

+ A

2

Ende ghy sone des menschen. Dit seyt die Heere die Godt van Israhels lant. Het eynde coemt, het eynde coemt op die vier hoecken van eertrijc.

3

Nv ist eynde op v, ende ic sal mijn rasende gramscap in v seynden, ende ic sal v ordeelen na uwe weghen, ende ick sal teghen v stellen alle uwe affgrijselijcheden.

4

Ende mijn ooghe en sal ouer v niet sparen, ende ick en sal niet ontfermen, maer v weghen sal ick op v legghen, ende v affgrijselijcheden sullen int midden van v wesen, ende ghy sult weten dat ic die Heere ben

5

Dit seydt die Heere Godt. Een pijninghe, siet daer coemt een pijninghe,

6

het eynde coemt, het eynde coemt, ⁺het is teghen v wacker gheworden, siet het coemt.

+ B

7

Die vernielinghe coemt ouer v, die op deerde woont, den tijt coemt, den dach der doodinghen is nae by, ende niet van die glorie der berghen.

8

Nv sal ick ter stont mijn gramschap wtstorten op v, ende ick sal mijn rasende gramschap in v volbrenghen, ende ick sal v ordeelen nae v weghen, ende ick sal v oplegghen alle v groote misdaden.

9

Ende mijn ooghe en sal niet sparen noch ick en sal niet ontfermen, maer uwe weghen sal ic v op legghen ende v affgrijselijcheden sullen int midden van v wesen, ende ghy sult weten dat ick die staende Heere ben.

10

Siet den dach, siet hy coemt die vernielinghe is wtgegaen, ⁺die roede is ghebloeyet die hoouerdie is ghegroeyt.

+ C

11

Die boosheyt is opghestaen in die roede der ongoddelijcheyt, niet wt henlieden, ende niet wten volcke noch wt haren gheluydt ende daer en sal gheen ruste in henlieden zijn.

12

Den tijt is ghecomen, den dach is nae by ghecomen, wie coopt die en sij nie blijde, ende wie vercoopt die en sij niet droeuich, want die gramschap coemt ouer alle sijn volc,

13

want die vercoopt, en sal tot tghene dat hy vercocht heeft niet wederkeeren, ende al noch is in die leuende hen leuen, want dat visioen en sal tot allen haer menichte niet wederkeeren, ende die man en sal in die boosheyt zijns leuens niet ghesterct worden.

14

⁺Slaet het trompette, laetse alle bereyt worden, ende daer en is niemant die ten strijde ghae, want mijn gramscap is ouer alle zijn volc.

+ D

15

Tsweert buyten, ende die pestilencie, ende den hongher binnen, die int velt is die sal metten sweerde steruen, ende die in die steden sijn sullen van die pestilencie ende vanden hongher verslonden worden.

16

Ende sij sullen behouden worden die van hen vlieden sullen, ende sullen op die berghen zijn als die duyuen der valleyen allegader veruaert, een yeghelijck in zijn boosheyt.

17

Alle handen sullen onmachtich worden, ende alle knien sullen van wateren vloeyen.

18

⁺Ende sij sullen hen met hairen cleederen omgorden ende die vreese salse ouerdecken, ende in alle aensichte sal bescaemtheyt wesen, ende in alle hen hoofden caluheyt.

+ E

19

Hen siluer sal buyten gheworpen worden, ende hen gout sal tot eenen mesthoop zijn, Hen siluer ende hen gout en sal hen niet moghen verlossen inden dach van des Heeren rasende gramscap. Sij en sullen hen zielen niet versaden, ende hen buycken en sullen niet veruult worden, want tis hen tot een struycsele van hen boosheyt gheworden.

20

Ende dat cieraet van haren halsbanden hebben sij ter hoouerdien ghestelt, ende die beelden van hen affgrijselijcheden, ende die afgodsbeelden hebben sij daer aff ghemaect, ⁺daerom heb ict henlieden dit ghegheuen tot een onreynicheyt,

+ F

21

ende ick sal dat gheuen inder vreemder hant om te roouen ende den ongoddelijcken des lants tot eenen roof, ende sij sullen dat besmetten.

22

Ende ick sal mijn aensicht van henlieden keeren, ende sij sullen mijn verbolgentheyt scheynden, ende die bespieders sullen daer ingaen, ende sij sullen dat besmetten.

23

Maect een besluytinghe, want dat eertrijck is vol van doordeel des bloets, ende die stadt is vol boosheyts.

24

Ende ick sal die alderquaetste van die Heydenen aenbrenghen, ende die sullen hen huysen besitten, ende ick sal doen rusten die hoouerdie der machtigher, ⁺ende si sullen hen heylighe plaetsen besitten.

+ G

25

Als die benautheyt ouercoemt soo sullen si vrede versoecken, ende daer en sal gheenen zijn.

26

Daer sal verbaestheyt op verbaestheyt comen, ende deen ghehoor op dander ghehoor, ende si sullen een visioen vraghen vanden propheet, ende die wet sal vergaen vanden priester, ende den raet van die ouderen.

27

Die coninck sal weenen, ende die prince sal met droefheyt ghecleedt worden, ende die handen van tvolck der eerden sullen heel ontsteldt worden. Nae hen weghen sal ick henlieden doen, ende nae hen ordeelen sal ickse ordeelen, ende sij sullen weten dat ick die Heere ben.