Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺ENde des Heeren woort is tot my gheschiet segghende.

+ A

2

Sone des menschen, stelt v aensicht teghen die berghen van Israel ende ghy sult tot hen propheteren,

3

ende segghen. Ghy berghen van Israel hoort des Heeren Godts woort. Dit seyt die Heere Godt den berghen, ende den hueuelen, den steenrootsen, ende den valleyen. Siet ic sal op v tsweert brenghen, ende ick sal v hoochden heel verderuen,

4

ende v outaeren affbreken, ende v affgods beelden sullen ghe-

[p. *641]

broken worden, ende ick sal v ghedoodde nederworpen voor v affgoden.

5

Ende ic sal die doode lichamen der kinderen van Israel gheuen voor daensicht van uwen affgodts beelden, ⁺ende ick sal v ghebeenten verstroyen rontsom v outaeren

+ B

6

in allen v wooninghen. Die steden sullen verwoest wesen, ende die hoochden sullen affghebroken ende verstroeyt worden, ende v outaeren sullen vergaen, ende ghebroken worden, ende v affgoden sullen ophouden, ende uwer affgoden tempelen sullen vernielt worden, ende v wercken sullen te niet ghebracht worden.

7

Ende die verslaghene sal vallen int midden van v lieden, ende ghy sult weten dat ic die Heere ben.

8

Ende ick salse onder v lieden laten die tsweert ontuloden sullen wesen onder die Heydenen als ick v in die landen verstroeyt sal hebben.

9

Ende v verloste sullen mijns ghedencken onder die Heydenen tot die welcke sij gheuanghen zijn gheleyt, ⁺want ick heb heel in stucken ghewreuen hen herte dat oncuyscheyt bedrijuende is ende wechghaende van my, ende hen ooghen oncuyscheyt doende nae hen affgoden, ende sij sullen hen seluen mishaghen van die quade dinghen die sij ghedaen hadden in alle hen affgrijselijcheden.

+ C

10

Ende sij sullen weten dat ick die Heere niet te vergheefs ghesproken en hebbe, dat ick hen dit quaet doen soude.

11

Dit seydt die Heere Godt. Slaet v hant, ende stoot uwen voet, ende seght wee ouer alle die affgrijselijcheden der quaden des huys van Israel, want sij sullen door tsweert door den honger ende door die pestilencie vallen.

12

Die verre is sal vander pestilencie steruen, maer die by is sal metten sweerde vallen, ende die achterghelaten ende beleghen sal wesen die sal van hongher steruen, ⁺ende ick sal mijn verbolghentheyt in hen volbrenghen.

+ D

13

Ende ghy sult weten dat ick die Heere ben, als v ghedoodde sullen wesen int midden van uwen affgoden rontsomme van uwen outaeren, op alle die hooghe hueuelen, ende op alle die opperste tsoppen der berghen, ende onder alle loouerachtighe boomen, ende onder alle eycke dic van bladeren, die plaetse daer sij welrieckende wieroock ontsteken hebben allen haren affgoden.

14

Ende ick sal mijn hant ouer hen wtsteken, ende ick sal dlant verwoest maken, ende verlaten van die woestijne Deblatha in allen hen woonsteden, ende sij sullen weten dat ick die Heere ben.