Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺ENde ghy sone des menschen neemt v een scerp swaert hayr scerende, ende sult dat doen gaen ouer v hooft ende ouer uwen baert, ende ghy sult tot v nemen een weechschale, ende ghy sultse deylen.

+ A

2

Het derde deel suldi metten viere verbranden int midden der stadt, nae dat volbrenghen van die daghen der belegghinghen, ende ghi sult het derden deel tot v nemen, ende ghy sult dat metten sweerde in stucken houwen rontsomme die stadt, maer het ander derden deel suldi inden wint verstroeyen, ende ick sal tsweert daer nae bloot maken.

3

Ende ghy sult daer aff nemen een cleyn ghetal, ende ghy sult die binden int wterste van uwen mantel,

4

Ende van dien suldy wederom nemen, ende ghy sultse worpen int midden des viers, ende ghy sultse metten viere verbranden, ende daer wt sal een vier comen int gheheel huys van Israel.

5

Dit seyt die Heere Godt. Dit is Ierusalem int midden der Heydenen heb ickse ghestelt, ende rontsom haer die landen.

6

Ende sij heeft mijn ordeelen versmaedt, dat sij noch ongoddelijcker zijn soude dan die Heydenen, ⁺ende mijn gheboden heeftse versmaedt meer dan die landen die rontsom haer zijn, want sij hebben mijn ordeelen verworpen, ende in mijn gheboden en hebben sij niet ghewandelt.

+ B

7

Daerom dit seyt die Heere Godt. Want ghi die Heydenen te bouen ghegaen hebt, die rontsomme v lieden sijn ende want ghy in mijn gheboden niet ghewandelt en hebt, ende nae die ordeelen der Heydenen die rontsomme v lieden zijn niet ghedaen en hebt.

8

Daerom dit seyt die Heere Godt. Siet ick tot v, ende ick sal selue ordeelen doen int midden van v in die ooghen der Heydenen.

9

Ende ick sal in v doen dat ick niet ghedaen en hebbe, ende der welcker ghelijcke ick voortaen niet meer doen en sal, om alle uwe affgrijselijcheden.

10

Daerom sullen die vaderen hen kinderen eten int midden van v, ende die kinderen sullen hen vaderen eten, ende ick sal in v oordeelen doen, ⁺ende ick sal alle uwe bleuelinghen inden wint wannen in alle winden.

+ C

11

Daerom ick leue seydt die Heere Godt. Alleen om dat ghi mijn heylicheyt ghescent hebt, in alle uwe argernissen, ende in alle uwe affgrijselijcheden, soo sal ick oock heel in stucken breken, ende mijn ooghe en sal niet sparen, ende ick en sal niet ontfermen.

12

Het derde deel van v lieden sal vander pestilencien steruen, ende tsal vanden hongher verteert worden int midden van v, ende het derde deel van v lieden sal metten sweerde vallen rontsom v, maer v derde deel sal ick in allen winden verstroeyen, ende ick sal tsweert wter sceyden trecken nae hen.

13

Ende ick sal mijnen rasenden torn volbrenghen, ende ick sal mijn verbolghentheyt doen rusten in henlieden, ende ic sal vertroost worden, ende sij sullen weten dat ick die Heere dit ghesproken hebbe in mijn tornighe liefde, als ick mijn verbolghentheyt sal volbracht hebben in henlieden.

14

⁺Ende ick sal v gheuen tot een woestijne ende een versmaetheyt den Heydenen die rontsom v zijn, voor daenschijn van alle die ghene die daer voorby gaen.

+ D

15

Ende ghy sult wesen een versmaetheyt ende blasphemie, een exempel, ende een verwonderinghe onder die Heydenen, die rontsom v zijn, als ick in v lieden sal ghedaen hebben die ordeelen, in mijn rasende gramscap ende verbolghentheyt, ende in die berispinghen des torns.

16

Ick die Heere hebt ghesproken. Als ic die alderquaetste pijlen des honghers in hen sal ghescoten hebben, die welcke sullen dootelijck sijn, ende die ic schieten sal om v te verderuen, ende ick sal den hongher op v lieden vergaderen, ende in v lieden vernielen den staff des broots.

17

Ende ick sal onder v lieden senden den hongher, ende die alderquaetste beesten tot vernielinghe vanden laetsten man, ende die pestilencie ende dbloet sullen door v gaen, ende ick sal tsweert op v lieden brenghen. Ick die Heere hebt gheproken.