Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺ENde ghy sone des menschen neemt v eenen ghebacken steen, ende ghy sult dien stellen voor v, ende ghy sult daer op bescrijuen die stadt Ierusalem.

+ A

2

Ende ghy sult teghen haer ordineren een belegghinghe, ende ghy sult bolwercken oprichten ende eenen wal te hoope te draghen, ende ghy sult teghen haer heyrlegheren maken, ende ghy sult teghen haer die instrumenten stellen int ronde, om die mueren te breken.

3

Ende ghy neemt v een yseren roostpanne, ende ghy sult die stellen tot eenen yseren muer tusschen v ende tusschen die stadt, ende ghi sult v aensicht vast stellen teghen haer, ende si sal wesen tot een belegghinghe, ende ghy sultse omringhen, dits een tecken

[p. *640]

den huyse van Israel.

4

Ende ghy sult slapen op v slincke sijde, ende ghy sult die boosheden des huys van Israel stellen op dat ghetal der daghen in die welcke ghy daer op slapen sult, ende ghy sult hen ongherechticheyt aen nemen.

5

⁺Ende ick heb v die iaren van haer ongherechticheyt ghegheuen, int ghetal der daghen drij hondert ende neghentich daghen, ende ghy sult die ongherechticheyt des huys van Israel draghen.

+ B

6

Ende als ghy dese dinghen sult volbracht hebben soo suldi slapen op v rechte sijde, ten tweedenmale, ende ghy sult aen nemen die ongherechticheyt des huys van Iuda veertich daghen, eenen dach voor een iaer, eenen dach (seg ick) voor een iaer heb ick v ghegheuen.

7

Ende ghy sult v aensicht keeren tot die belegghinghe van Ierusalem, ende uwen arm sal wtghestrect worden, ende ghy sult propheteren teghen haer.

8

Siet ick heb v omuanghen met banden, ende ghy en sult v niet ommekeeren van deen sijde op dander sijde, tot dat ghy volbrenghet die daghen van uwer belegghinghen.

9

⁺Ende ghi neemt voor v tarwe ende gherste, ende boonen, ende milien saet, ende vitsen, ende ghy sult die worpen in eenen pot, ende ghy sult voor v brooden maken nae tghetal der daghen in die welcke ghy slapen sult op v sijde, drij hondert ende neghentich daghen suldy dat eten.

+ C

10

Ende v spijse die ghy eten sult, sal wesen in ghewichte twintich stateren des daechs, vanden eenen tijt tot den anderen tijt suldy dat eten.

11

Ende dwater suldi by een mate drincken, het seste deel van een hin mate, van den eenen tijt tot den anderen tijt suldi dit drincken.

12

Ende ghy sult dat eten als een ghersten broot onder dasschen ghebacken, ende metten dreck die wt den mensche gaet suldi dat ouerdecken voor hen ooghen.

13

Ende die Heere heeft gheseyt, alsoo sullen die kinderen van Israel hen broot eten, ⁺besmedt onder die Heydenen tot die welcke ic se wt drijuen sal.

+ D

14

Ende ick heb gheseyt. Ay ay ay Heere Godt, siet mijn ziele en is niet besmet, ende ick en heb gheen doode prye van selfs ghestoruen oft vanden beesten verscoert gheten, van mijn kintscheyt tot nv toe, ende gheen onreyn vleesch en is in mijnen mont ghegaen.

15

Ende hy heeft tot my gheseyt. Siet ick heb v ossen mest ghegheuen voor menschelijcken dreck, ende ghy sult v broot daer in maken.

16

Ende hy heeft tot my gheseyt. Sone des menschen. Siet ic sal den staff des broots breken in Ierusalem, ende si sullent broodt breken bi ghewichte, ende in sorchuuldichede, ende dwater sullen sij by een mate, ende in benautheden drincken.

17

Op dat (wanneer dbroot ende dwater faelgeren sal) een ieghelijck valle teghen sijnen broeder, ende dat si verdwijnen in hen boosheden.