Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

DIt was het gesichte van die glorie des Heeren, ende ic hebt ghesien, ⁺ende ben gheuallen op mijn aensicht, ende ick heb ghehoort die stemme van eenen die tot my sprack. Ende hy heeft tot my gheseyt. Sone des menschen staet op v voeten, ende ick sal met v spreken.

+ A

2

Ende den gheest is in mi ghegaen nae dat hy tot my ghesproken hadde, ende hy heeft my op mijn voeten ghesteldt, ende ick heb eenen ghehoort tot my sprekende

3

ende segghende. Sone des menschen ick sende v tot die kinderen van Israel, tot die afscey-

[p. *639]

deghe luyden, die van my ghesceyden sijn. Hen vaderen hebben mijn verbont ouertreden tot op desen dach toe.

4

Ende het sijn kinderen van harden aensicht ende ontemmelijck van herten tot die welcke ick v sende, ende ghy sult tot hen segghen. Dit seyt die Heere Godt.

5

Oft sijt by auontueren hoorden, ende oft sij by auontueren rusten, want het is een creytende huys, ende sij sullen weten datter een propheet gheweest is, int midden van henlieden.

6

⁺Daerom ghy sone des menschen en vreest hen niet, noch en ontsiet hen woorden niet, want die ongheloouighe ende verkeerders sijn met v, ende ghy woont met scorpioenen, en vreest hen woorden niet, noch en ontsiet hen aensichten niet, want het is een creytende huys.

+ C

7

Daerom suldi mijn woorden tot hen spreken, oft sij by auontueren hoorden ende rusten, want sij sijn creyters,

8

Maer ghy sone des menschen hoort alle dat ick tot v spreke, ⁺ende en wilt niet creytende sijn, ghelijck dat creytende huys is, doet uwen mont open, ende etet al dat ick v gheue.

+ D

9

Ende ick heb ghesien, ende siet daer was een hant tot mi ghesonden in die welcke was eenen opghevouwen boeck, ende hy heeft em voor my open ghedaen, die welcke was ghescreuen binnen ende buyten, ende daer in waren ghescreuen beclaghinghen, ende een liedt, ende wee.