Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺ENDE tis ghesciet int dertichste iaer, in die vierde maent, in den vijfsten dach der maent, als ick was int midden der gheuanghenen, by den vloet Chobar dat die hemelen gheopent zijn ende ick heb Godts visioenen ghesien.

+ A

2

In die vijfste maent dit is tvijfste iaer van des conincs Ioachims oueruoeringhe,

3

is het woort des Heeren ghedaen tot Ezechiel den sone Busi, den priester inder Chaldeen lant, neffens den vloet Chobar, ende die hant des Heeren is aldaer op hem ghesciet.

4

Ende ick heb ghesien, ende siet daer quam eenen stormende wint vanden noorden ende een groote wolcke, ⁺ende een inwoelende vier, ende een claer scijnsel rontsomme van die. Ende van sijn midden, was als een ghedaente van claerblinckende metael, dat is wt dat midden des viers,

+ B

5

ende wt sijn midden was een ghelijckenisse van vier dieren, ende dit was die ghedaente van die, die ghelijckenisse des menschs was in hem.

6

Ende elck hadde vier aensichten ende elck vier vloghelen,

7

Ende hen voeten waren rechte voeten, ende die plante van haren voeten was als die plante van eens calfs voet, ende gheynsteren als die ghedaente van gloeyende metael.

8

Ende menschen handen waren onder hen vloghelen aen die vier sijden, ende sij hadden aensichten ende vloghelen aen vier sijden.

9

⁺Ende hen vloghelen waren te samen gheuoecht des eens totten den anderen, si en keerden niet wederom als sij voorts ghinghen, maer een ieghelijck ghinc voor sijn aensicht.

+ C

10

Ende die ghelijckenissen van haren aensichte was eens menschen aensicht, ende eens leews aensicht aen die rechte sijde van hen viere, maer eens ossen aensicht was aen die slincke sijde van hen viere, ende des arents aensicht was bouen hen viere.

11

Ende hen aensichten, ende hen vloghelen waren bouen wtgestrect, die twee vloghelen van elck dier worden tsamen gheuoecht, ende die twee bedecten hen lichamen

12

ende een ieghelijck van hen wandelde voor sijn aensicht, waer dat het drijuen des geests was derwaerts ghinghen sij, ende sij en keerden niet wederom als si wandelden.

13

Ende die ghelijckenisse der dieren ende hen ghedaente was als van berrende colen des viers ende als die ghedaente van lampen. ⁺Dit was het al om loopende ghesichte int midden der dieren een claerheyt des viers, ende wten viere eenen blixem wtcomende.

+ D

14

Ende die dieren ghinghen ende keerden wederom in die ghelijckenisse van eenen schijnenden blixem.

15

Ende doen ick die dieren sach, soo openbaerde daer een rat op deerde neffens die dieren, hebbende vier aensichten.

16

Ende die ghedaente der raderen ende hen werc was als een ghedaente der zee, ende die ghelijckenisse van hen vieren was een, ende hen ghedaente ende wercken waren als oft deen radt ware int midden van dander radt,

17

Aen hen vier sijden ghinghen sij al ghaende, ende sij en keerden niet wederom als sij wandelden.

18

Ende in die raderen was ooc een lengde, ⁺ende een hoochde ende een veruaerlijcke ghedaente, ende het heel lichaem was vol ooghen inden omganc van hen vieren.

+ E

19

Ende als die dieren wandelden, soo wandelden die raderen oock te samen neffens die, ende als die dieren vander eerden ghehauen worden, soo worden die raderen ooc te samen opghehauen.

20

Soo waer henen den gheest ghinck als den gheest derwaerts ghinck, soo worden die raderen ooc te samen opghehauen hem volghende, want den gheest des leuens was in die raderen.

21

Metten gaenden ghinghen sij, ende metten staenden stonden si ende metten verhauenen vander eerden worden die raderen te samen oock opghehauen volghende die, want den gheest des leuens was in die raderen.

22

⁺Ende op die hoofden der dieren was een ghelijckenisse van dat firmament, als die ghedaente van een veruaerlijck cristal ende wtghestrect op hen hoofden van bouen,

+ F

23

Maer onder tfirmament waren hen rechte vlogelen des eens aen dandere, een ieghelijck bedecte met twee vloghelen zijn lichaem, ende het ander worde desghelijcs bedect.

24

Ende ick hoorde tgheluyt der vloghelen als tgheluyt van veel wateren, als tgheluyt vanden hooghen God als sij wandelden, het was als een gheluyt van een menichte, als tgheluyt van heyrlegheren, ende als si stonden soo worden hen vloghelen nederwaerts ghelaten,

25

want als die stemme ghedaen worde opt firmament, dwelck op hen hooft was, ⁺soo stonden si ende lieten hen vloghelen nederwaerts sincken.

+ G

26

Ende opt firmament dat bouen was op hen hoofden, was ghelijck die ghedaente vanden Saphier steen die ghelijckenisse vanden throon, ende op die ghelijckenisse vanden throon, was die ghelijckenisse als die ghedaente van eenen mensch van bouen.

27

Ende ick heb ghesien als die ghedaente des blinckende sijn metaels, als die ghedaente des viers van binnen dat al rontsomme, van sijn lendenen ende van daer opwaerts, ende van sijn lendenen tot beneden toe heb ick ghesien als een ghedaente eens blinckende viers int ronde.

28

Ghelijck die ghedaente vanden reghenboghe als hy in die wolcke is inden dach des reghens, dit was die ghedaente der blinckender claerheyt al rontsomme.