Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺IErusalem ontcleedt v van dat cleedt des screyens ende uwer quellinghe, ende cleedt v met die vercieringhe ende eere die v van Godt een eewighe glorie is.

+ A

2

Omhanghet v met dat dobbel cleedt der rechtuerdicheyt van Gode, ende stelt op v hooft den myter der eewigher eeren,

3

want Godt sal zijn claerheyt in v toonen die onder den hemel is,

4

⁺want uwen naem sal v ghenoemt worden van Gode inder eewicheyt. Den vrede der rechtuerdicheyt ende die eere der goedertierenheyt.

+ B

5

Staet op Ierusalem ende staet in die hoochde, ende siet rontsomme oostwaerts, ende siet v vergaderde kinderen van die opgaende sonne totten onderganc in des heylichs woort verblijt sijnde van Gods ghedenckenisse,

6

want sij zijn van v wt ghegaen te voete gheleyt vanden vianden, ⁺maer die Heere sal die tot v aenbrenghen ghedraghen ter eeren als kinderen des rijcs,

+ C

7

want Godt heeft voorghenomen te vernederen alle hooghe berghen, ende die eewighe steenrootsen, ende die valleyen te vullen tot een effenheyt der eerden, op dat Israel mach naerstelijc wandelen ter eeren Godts.

8

⁺Maer die bosschen ende alle boomen der soeticheyt hebben ouer Israel een lommer ghemaect nae Godts ghebodt,

+ D

9

want God sal Israel brenghen met blijscap int licht van sijnder maiesteyt, metter bermherticheyt ende rechtuerdicheyt die wt hem is.