Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺DIts den boeck van Godts gheboden, ende die wet die inder eewicheyt is, alle die haer houden sullen totten leuen comen, maer diese verlaten sullen comen ter doot.

+ A

2

Keert v wederom Iacob ende aengrijpse, wandelt doer den wech tot haer schijnsel teghen haer licht.

3

En gheeft gheenen anderen v glorie, ende v weerdicheyt den vreemden volcke.

4

Wy sijn salich Israel want tgene dat Gode behaecht is ons openbaer.

5

Weest goets moets Gods volck, ghy Israel weerdich om ghedencken,

6

ghy sijt vercocht den Heydenen, niet tot verderffenisse, maer daer om, want ghy in Gods gramscap den Heere ghecreyt hebt, ghy sijt den teghepartijders gheleuert.

7

Want ghi hebt hem verbittert die v lieden ghemaect heeft, den eewighen Godt, offerande doende den duyuelen ende niet Gode,

8

want ghy hebt sijns vergheten die v lieden opghevoet heeft, ende ghy hebt v voestere Ierusalem bedroeft.

9

⁺Want sij heeft die gramscap van Gode v comende ghesien, ende sij heeft gheseyt. Hoort ghy byligghende palen van Sion, ⁺want Godt heeft my eenen grooten rouwe aenghebracht,

+ B

+ C

10

want ic heb die gheuanghenisse mijns volcs ghesien, mijnder sonen ende dochteren, die welcke hen die eewighe ouerghebracht heeft.

11

Want ick hebse opgheuoedt met blijscap, maer ick hebse laten gaen, met weenen ende rouwich beclaghen.

12

Niemant en sij blijde ouer my weduwe ende verlatene, van vele ben ic verlaten om die sonden van mijnen kinderen, want sij hebben affgheweken van Godts wet.

13

Maer sijn rechtuerdicheden en hebben sij niet gheweten, noch sij en hebben niet ghewandelt doer die weghen van Godts gheboden, noch sij en sijn doer die paden der waerheyt met rechtuerdicheyt niet inghegaen.

14

⁺Laet die by ligghende palen van Sion comen, ende laetse ghedencken die gheuanghenisse van mijn sonen ende dochteren, die welcke hen die eewighe ouerghebracht heeft.

+ D

15

Want hy heeft ouer henlieden ghebracht een volck van verre landen, een quaet volck, ende van een ander tale,

16

die den ouden man niet ontsien en hebben, noch der kinderen ontfermt, ende sij hebben wechgheleydt die beminde der weduwen, ende die eenighe hebben sij van kinderen berooft.

17

Maer wat mach ic v lieden helpen?

18

Want die de quade dinghen op v lieden ghebracht heeft, die sal v selue verlossen wt uwer vianden handen.

19

Wandelt kinderen, wandelt, want ick ben alleen ghelaten.

20

Ic heb my ontcleedt van dat eerlijck cleedt des vreedts, ⁺maer ick heb my ghecleedt met eenen sack des verbiddens, ende ick sal totten alderhoochsten roepen in mijn daghen.

+ E

21

Weest goets moets kinderen, roept totten Heere ende hy sal v verlossen wt die hant van die princen der vianden.

22

Want ick heb inder eewicheyt v lieder salicheyt ghehoept, ende my is blijscap ghecomen vanden heylighen ouer die bermherticheyt, die v lieden comen sal van onsen eewighen salichmaker.

23

Want ic heb v lieden wtghesonden met droeuicheyt ende gheween, maer die Heere sal v mi wederom brenghen, met blijscap ende vrolijcheyt, inder eewicheyt.

24

Want ghelijck die byligghende palen van Sion v gheuanghenisse vanden Heere ghesien hebben, ⁺van Gode, alsoo sullen sij oock met haestichede v salicheyt sien van Gode, die v lieden ouercomen sal met grooter eeren, ende eewighe claerheyt.

+ F

25

Kinderen verdraecht verduldichlijck die gramscap die v ouerghecomen is. Want v viant heeft v veruolcht, maer ghy sult haestelijck zijn verderffenisse sien, ende op sijn necken suldi climmen.

26

Mijn wellustighe teedere hebben scarpe weghen ghewandelt, want sij zijn gheleydt als een cudde dat vanden vianden gherooft is.

27

Weest goets moets kinderen, ende roept luyde totten Heere, want v lieder ghedenckenisse sal zijn vanden ghenen die v lieden gheleyt heeft.

28

⁺Want ghelijck uwen sin gheweest is dat ghy van Gode dolen soudt, soe suldi thienmael soe vele wederom bekeerende hem soecken.

+ G

29

Want die v die quade dinghen ouerghebracht heeft, die sal v oock aenbrenghen die eewighe ghenoechlijcheyt met v lieder salicheyt.

30

Weest goets moets Ierusalem, want hy vermaent u, die v ghenoemt heeft.

31

Die misdadighe sullen vergaen die v ghequelt hebben, ende die hen verblijdt hebben in uwen val sullen ghepijnicht worden.

32

Die steden den welcken v kinderen ghedient hebben, sullen ghepijnicht werden, ende die ghene v sonen ghenomen heeft.

33

Want ghelijck sij haer verblijdt heeft in uwen val, ende haer

[p. *636]

verhuecht heeft in uwe vallinghe, alsoo sal sij bedroeft worden in haer verderffenisse.

34

Ende dat verhuegen van haer menichte sal affghesneden worden ende haer blijscap sal tot een beweeninghe wesen,

35

want haer sal een vier ouercomen vander eewicheyt in langhe duerende daghen, ende sij sal bewoont worden van die duyuels in die menichte des tijts.

36

Siet rontsomme Ierusalem oostwaerts, ende siet die blijscap v van Godt comende,

37

want siet v kinderen comen die ghy verstroeyt ghelaten hebt, sij comen vergadert vanden oosten totten westen toe, in des heylichs woort hen verblijdende ter eeren Godts.