Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺ENde nu almachtighe Heere Godt van Israel die ziele in benautheden, ende den beanxten gheest roept tot v.

+ A

2

Hoort Heere ende hebt ontfermen, want ghy sijt een bermhertich Godt, ende ontfermt v onser, want wy hebben voer v ghesondicht.

3

Want ghy sidt inder eewicheyt, ende wy sullen vergaen in der eewicheyt?

4

Almachtighe Heere Godt van Israel, hoort nu tghebedt der dooden van Israel, ende haerder kinderen die voer v ghesondicht hebben, ende die stemme des Heeren haers Godts niet ghehoort en hebben, ende die quaden sijn ons aenghecleeft.

5

En wilt niet ghedencken onservaderen boosheden, maer weest ghedachtich uwer hant, ende ws naems in desen tijt,

6

want ghy sijt die Heere onse Godt, ende wy sullen v louen Heere,

7

want daerom hebdi v vreese ghegheuen in onse herten, dat wy uwen naem souden aenroepen, ende v louen in onse gheuanghenisse. Want wy worden bekeert van onser vaderen boosheden, die voer v ghesondicht hebben.

8

Ende siet wy sijn heden in onse gheuanghenisse, waer mede ghy ons verstroyt hebt tot een verwijt, ende tot een vervloeckinghe ende tot een sonde, ⁺nae alle onser vaderen boosheden die van v ghesceyden sijn Heere onse Godt.

+ B

9

Hoort Israel die gheboden des leuens, vaetse metten ooren, op dat ghy voersienicheyt weten moecht.

10

Wat ist Israel dat ghy int lant der vianden sijt?

11

ghy sijt veroudert in een vreemt lant, ghy sijt besmet met die dooden, ghy sijt gherekent metten ghenen die in die helle dalen.

12

Ghy hebt die fonteyne der wijsheyt verlaten,

13

want haddi in des Heeren wech ghewandelt, soo soudi voerwaer inden vrede ghewoont hebben op deerde.

14

Leert waer die voersienicheyt is, waer die duecht is, waer tverstant is, op dat ghy te samen weten moecht, waer die lancheyt des leuens is, ende des leuens onderhoudinghe, waer dlicht der ooghen is, ende den vrede.

15

Wie heeft sijn plaetse gheuonden? ende wie heeft in zijn scatten ghegaen?

16

Waer sijn die princen der Heydenen, ende die heerscappie hebben ouer die beesten die op deerde sijn?

17

die in die voghelen des hemels spelen,

18

die tsiluer tot scatten vergaderen, ende tgout daer die menschen in betrouwen, ende der welcker vercrijghinghe gheen eynde en is? die siluer smeden ende sorchfuldich sijn, ende daer en is gheen vindighe

[p. *635]

van haerlieder wercken?

19

Sy zijn verdoruen ende ter hellen nederghedaelt, ende daer zijn andere in hen stede opghestaen.

20

Die ionghelinghen hebben dlicht ghesien ende sij hebben op deerde ghewoont, maer den wech der onderwijsinghen en hebben sij niet gheweten,

21

noch sij en hebben zijn paden niet gheweten, noch hen kinderen en hebben die niet ontfanghen, van hen aensicht is sij verre gheworden,

22

sij en is niet ghehoort int landt van Chanaan, noch ghesien in Theman.

23

Ende oock mede die kinderen van Agur die de wijsheyt versoecken die vander eerden is, die coopluyden der eerden, ende Theman, ende die clappers, ende die onder soeckers der voersichticheyt ende der wijsheyt, ⁺maer den wech der wijsheyt en hebben sij niet gheweten, noch si en hebben haerder weghen niet ghedachtich gheweest.

+ C

24

O Israel hoe groot is Godts huys, ende hoe groot is die plaetse van sijn besittinghe?

25

Groot is hi, ende hy en heeft gheen eynde, hooghe is hy ende onghemeten.

26

Daer hebben die vermaerde ruesen gheweest die van tbeghinne gheweest hebben, van grooter lingden, die orloghe wetende.

27

Dese en heeft die Heere niet vercoren, noch sij en hebben den wech des onderwijs niet ghevonden,

28

daerom sijn sij vergaen, ende om dat sij gheen wijsheyt en hadden soe zijn zij vergaen, om hen onwijsheyt.

29

Wie heeft inden hemel gheclommen ende heeftse ontfanghen, ende wie heefse neder afghebracht van die wolcken?

30

Wie heeft ouer die zee ghereyst ende heeft die gheuonden, ende heeftse ghebracht bouen wtghecoren gout?

31

⁺Daer en is niemant die haer weghen soude moghen weten, noch die haer paden versoecke,

+ D

32

maer die alle dinghen weet, die kentse, ende hy heeftse gheuonden doer zijn voersienicheyt, die deerde bereydt heeft inden eewighen tijt, ende heeftse veruult met vee, ende met viervoetighe dieren,

33

die dlicht wt sendt, ende tgaet, ende hy heuet gheroepen, ende tis hem onderdanich met beuinghe.

34

Ende die sterren hebben hen licht ghegheuen, in hen bewaringhen, ende sij sijn blijde gheweest,

35

sij zijn gheroepen ende hebben gheseyt, wy sijn hier, ende sij hebben hem ghelicht met blijscappen diese ghemaect heeft.

36

Dit is onse Godt, ende daer en sal gheen ander gheleken worden teghen hem.

37

Dese heeft gheuonden alle den wech der onderwijsinghen, ende heeft dien gheleuert Iacob sijnen knecht, ende Israel zijnen beminden.

38

Hier nae is hy op deerde ghesien, ende heeft met die menschen ghewandelt.